Kasapulam Kadi ti Ad-adu a Tiempo?
NO MINARKAAM ti maikadua wenno ti maikatlo a pagpilian kadagiti saludsod iti kannawan, nalabit talaga a kasapulam ti ad-adu a tiempo. Ken saan la a sika ti kasta. Iti dandani amin a lugar, dagiti tattao ket agap-apura a mangaramid kadagiti nasken a mairingpas—ken nalabit awan pakainaigan dagita iti talaga a napateg kadakuada. Imbes ketdi, mabalin a mainaig dagita kadagiti nasken a maaramid iti dayta a tiempo—panangtarimaan iti lugan, panangaramid iti kayat ti boss-da, ken panangasikaso kadagiti di ninamnama a pakasingaan. Bayat nga as-asikasuem ti agsasaruno nga aktibidad, mabalin a mariknam a dimo makontrol ti pakaus-usaran ti tiempom. Mabalin a panagriknam ket dimon matagtagiragsak ti biag gapu ta kanayon nga agap-apuraka.
Siempre, pampanunotem a temporario laeng dayta. Inton agangay, addanto met la tiempom a mangasikaso kadagiti banag a talaga a napateg iti biagmo—bambanag a makapnek ken makagunggona kenka, iti pamiliam, ken iti sabsabali. Ngem kaano? Maisamiram kadi dagita ita nga aldaw? Ita a lawas? Inton umay a bulan?
Kinaagpaysuanna, saan a guminad ti taray ti lubong. Ngem adda maaramidam tapno maaddaanka iti ad-adu a tiempo. Kasano?
[Kahon iti panid 3]
Kasano kasansan a maiwayaam ti bambanag a talaga a napateg kenka?
◯ Inaldaw
◯ Tunggal ngudo ti lawas
◯ Dandani awan a pulos
Iti gagangay nga aldaw,
◯ Aramidem kadi dagiti inyeskediulmo?
◯ Aramidem kadi ti ipapaaramid ti dadduma uray no adda dagiti sabali a kayatmo nga aramiden?
◯ Basta kadi aramidem lattan ti aniaman a rumsua nga aktibidad?
Iti gagangay nga aldaw, mariknam kadi a
◯ Kontroladom ti kasasaad?
◯ Maap-apuraka a mangiringpas kadagiti narigat unay a maipapaaramid kenka?
◯ Nagabsuonankan iti trabaho a kas man la dimon magabenan dagita?
Kalpasan ti agmalem,
◯ Nairingpasmo kadi dagiti napateg a banag?
◯ Nalpasmo kadi ti nasken nga iringpasmo, ngem kumporme lattan ti namay-am iti dayta?
◯ Awan kadi ti tiempom kadagiti talaga a napateg?
Ania ti gagangay a mariknam kalpasan ti agmalem?
◯ Kontento ken naragsak
◯ Malmalday, nabambannog, ken maab-aburido
◯ Dismayado