Ti Kuna Dagiti Nagannak

Bayat a dumakdakkel ti annakmo, kasano a maisurom kadakuada ti kinapateg ti panagtulnog? Kasano a maisurom dagiti praktikal a paglaingan bayat nga agmatmataenganda? Usigem ti komento ti dadduma a nagannak manipud iti nadumaduma a paset ti lubong.

PANNAKILANGEN KEN PANAGTRABAHO ITI BALAY

“Bayat a mangmangankami ken agiinnestoria maipapan iti nagmalem, masursuro ti annakmi no kasano ti dumngeg. No makitadakami a dumdumngeg a naimbag, masursuroda a raemen ti tunggal maysa ken ti mismo a bagida.”—Richard, Britain.

“Makaparagsak a makita nga agririnnaem ti annakmi ken ammoda a risuten dagiti dida pagkikinnaawatan uray no dikamin makibiang. Natalged met ti riknada a makisarita kadagiti nataengan.”—John, South Africa.

“Saanak a perpekto, ket no dadduma masairko ti annakko uray diak igaggagara. No mapasamak dayta, nagpateg nga agpadispensarak.”—Janelle, Australia.

“Sansanayenmi dagiti annakmi kadagiti trabaho iti balay. Gapu ta nasursuroda ti agtrabaho agpaay iti sabsabali, natalna ken adda panagtutunos iti pamiliami. Mariknada nga adda magapgapuananda.”—Clive, Australia.

“Saan a nalaka ngem nasken nga isuro kadakuada no kasanoda nga agkinnaawatan, agrinnaem, ken agpinnakawan.”—Yuko, Japan.

KINADALUS KEN SALUN-AT

“Idi ubbing pay ti annakmi, insuromi ida nga agdigus a bukbukodda. Tapno kaay-ayoda dayta, nagusarkami iti sabon a nadumaduma ti sukogna, shampoo nga addaan kadagiti ladawan dagiti cartoon character, ken espongha a sinan babassit nga animal.”—Edgar, Mexico.

“Idi nagnaedkami iti balay nga awanan iti gripo, kanayon a siguraduek nga adda sabon ken pagkargaan iti danum iti kombiniente a lugar tapno makapagbuggokami iti ima apaman a sumangpetkami.”—Endurance, Nigeria.

“Inaldaw nga idasaranmi dagiti annakmi iti nasustansia a taraon, ken ilawlawagmi no apay a napateg ti balanse a taraon. Kayatda a maammuan dagiti ramen ti nadumaduma a putahe isu nga agpatulongak kadakuada nga agisagana kadagiti taraonmi. Gundawaymi met dayta a makapagiinnestoria.”—Sandra, Britain.

“Napateg ti ehersisio, ket kas nagannak, ikagkagumaanmi nga iyulidan dayta. Magustuan ti annakmi no sangapamiliaankami nga ag-jogging, ag-swimming, ag-tennis, ag-basketball, wenno agbisikleta. Nasursuroda a saan la a napateg ti agehersisio no di ket makaparagsak pay.”—Keren, Australia.

“Ti kangrunaan a kasapulan ti annak ket ti tiempo a kaduada ti dadakkelda. Awan ti aniaman a mabalin nga isukat iti dayta, uray kuarta, regalo wenno panagpasiar. Umawatak laeng iti trabaho a pang-agsapa bayat nga ages-eskuela ti annakko tapno iti malem, maipamaysakon nga asikasuen ida.”—Romina, Italy.

DISIPLINA

“Naduktalanmi nga awan ti maymaysa a kasayaatan a pamay-an a panangdisiplina; depende dayta iti kasasaad. No dadduma, ti disiplina ramanenna ti serioso ken napasnek a pannakisarita ken no maminsan ti panangiparit iti magustuanna nga aramiden.”—Ogbiti, Nigeria.

“Ipaulitmi kadagiti annakmi ti bilinmi tapno masiertomi a naawatanda. Kalpasanna, sustinerenmi ti imbagami. No kayatmi nga ipangagdakami, masapul a siiinget nga ipakatmi dagiti pannusa no agsukirda.”—Clive, Australia.

“No korehirek dagiti annakko, napaneknekak nga epektibo no agrukob wenno agparintumengak tapno agbatog ti rupami ken maalak ti atensionda. Iti kasta, makitada a naimbag ti ekspresion ti rupak, nga ad-adu ti maipasimudaagna ngem iti sasaok laeng.”—Jennifer, Australia.

“Likliklikanmi nga ibaga kadagiti annakmi ti, ‘Dikay pulos dumdumngeg,’ uray no kasla agpayso dayta. Dimi met ungtan ti annakmi iti sango ti kabsatna. Iyarasaasmi laengen wenno iyadayomi tapno makasaomi nga awan sabali a makangngeg.”—Rudi, Mozambique.

“Naglaka a maim-impluensiaan dagiti ubbing ken pagay-ayatda ti agtulad. Gapu iti dayta, masapul a sumraenmi ti dakes nga impluensia ti media, aglawlaw, ken dagiti kaeskuelaanda. Tultulonganmi ida a mangpatanor kadagiti nasayaat a kababalin a naibatay iti naimbag a prinsipio. Ti nasayaat a pundasion ket makatulong tapno mapagkedkedanda ti aniaman a dakes.”—Grégoire, Democratic Republic of the Congo.

“Ti disiplina ket masapul a natibker, nainkalintegan, ken di agbaliwbaliw. Nasken a matarusan dagiti ubbing nga adda dakes nga ibunga ti panagsukirda ken ammoda a paypaysuenyo ti disiplina nga imbagayo.”—Owen, England.

[Blurb iti panid 14]

“Dikay rurruroden ti annakyo, tapno saan a maupay ti riknada.”—Colosas 3:21

[Kahon/Ladawan iti panid 15]

KAPADASAN TI PAMILIA

Panagballigi kas Agsolsolo nga Ina

Interbiu ken ni Lucinda Forster

Ania ti karirigatan iti panagbalinmo nga agsolsolo nga ina?

Nagrigat ti agbalin a nagannak. Ngem gapu ta agsolsoloak, ad-adda a marigatanak a mangbingay iti tiempo ken pigsak. Kasapulan ti tiempo tapno maipasagepsep dagiti nasayaat a prinsipio ngem nasken nga adda met gundaway nga agkakaduakami nga agrelaks ken agragragsak. Masansan a nasken nga isakripisiok ti tiempok nga aginana tapno mairingpasko dagiti trabaho iti balay.

Kasanom a mapagtalinaed a nasayaat ti komunikasionyo nga agiina?

Kalpasan ti diborsio, makapungtot ken madanagan dagiti ubbing. Nakitak a no rumsua dagiti problema, nagpateg ti panangkita iti mata ken kalmado a timek. Urayek nga agkalmakami, sa ibagak ti pakaseknak a diak padpadakkelenen ti problema. Damagek no ania ti makunada, dumngegak a naimbag, ken ipakitak a talaga a napateg kaniak ti riknada. Interesadoak iti panageskuelada ken komendarak dagiti magapuananda. Kanayon a kalmado, naragsak, ken aggigiddankami a mangan. Kanayonko met nga ibaga a dungdungnguek unay ida.

Kasano ti panangdisiplinam?

Masapul ti ubbing dagiti masnup ken di agbaliwbaliw a pagannurotan. Ikagkagumaak ti agbalin a naasi ngem natibker. Nasken a makirinnasonak kadagiti annakko ken ilawlawagko no apay a di umiso ti partikular nga inaramidda. Sakbay a mangdisiplinaak, damagek no ania ti pampanunoten ken marikriknada tapno maammuak no apay a kasdiay ti inaramidda. No siak ti nagkamali, kas pagarigan ta diak naawatan ti situasion, agpadispensarak.

Kasano ti panangisurom iti annakmo a raemenda ti sabsabali?

Ipalagipko ti insuro ni Jesus—tratuem ti sabsabali iti wagas a kayatmo a pannakatrato. (Lucas 6:31) Iparparegtak kadagiti annakko a no mabalin, solbarenda dagiti dida pagkinnaawatan, ken isurok kadakuada ti kinapateg ti naalumamay ken nasingpet a panagsao uray no makapungtotda.

Ania dagiti paglinglingayanyo?

Dimi kabaelan ti kanayon nga agbakasion isu a kumitakami iti diario kadagiti di nangina a paglinglingayan. Mapankam agpiknik wenno agpagnapagna tapno makitami dagiti mula kadagiti nursery. Agmulakami kadagiti yerba iti hardinmi ken pagay-ayatmi ti agala iti ilaokmi iti ilutomi. Napateg ti panaglinglingay uray no mapankami laeng iti asideg a parke.

Ania dagiti sagsagrapem a rag-o ken gunggona?

Nagrigat ti agsolsolo a mangpadakkel iti annak, ngem nagbalinkami a nasingsinged nga agiina ken nasursuromi nga apresiaren dagiti bendision a maaw-awatmi. Maragragsakanak a makakita iti in-inut nga irarang-ay ti personalidad ti dua nga annakko. Iti edadda ita, kayatda a kaduadak a kanayon ket tagipatgek dayta. Madlawda no naragsak wenno nalidayak ket no dadduma arakupendak lattan tapno maliwliwaak. Maragsakanak unay no iyebkasda ti ayatda kaniak. Kapatgan iti amin, marikriknami ti ayat ti nadungngo a Namarsua a tumultulong kadakami iti adu a narigat a kasasaad. Ti Biblia ti mangpabpabileg kaniak a mangitultuloy iti panagreggetko nga agbalin a nasayaat nga ina.—Isaias 41:13.

[Ladawan]

Ni Lucinda ken ti annakna a da Brie ken Shae