Panangtarus Kadagiti Padto ni Ezekiel

ANIA TI PADTO?

Iti Biblia, ti Hebreo a sao a na·vaʼʹ, a naipatarus kas “padto,” ket nangnangruna a tumukoy iti panangideklara iti mensahe, panangukom, naimbag a sursuro, wenno bilin a naggapu iti Dios. Mabalin met a tumukoy iti panangipakaammo iti mapasamak iti masanguanan nga ipalgak ti Dios. Amin dagitoy a kita ti panangipalgak ti Dios ket karaman kadagiti padto ni Ezekiel.​—Ezek. 3:10, 11; 11:4-8; 14:6, 7; 37:9, 10; 38:1-4.

PAMAY-AN TI PANNAKAIPAKAAMMONA

• 

  SIRMATA

• 

  ILUSTRASION

• 

  PANANGYAKTO

Naglaon ti libro nga Ezekiel kadagiti sirmata, ilustrasion, pangngarig, ken panangyakto kadagiti naimpadtuan a mensahe.

KAITUNGPALANDA

No dadduma, saan la a maysa ti kaitungpalan dagiti padto nga insalaysay ni Ezekiel. Kas pagarigan, dagiti padto maipapan iti pannakaisubli ti nadalus a panagdaydayaw ket saan nga interamente a natungpal idi nagsubli ti ili ti Dios iti Naikari a Daga. Ngem kas mailawlawag iti Kapitulo 9 daytoy a libro, adu kadagita a padto ti addaan iti kaitungpalan ita ken matungpalto manen iti masanguanan.

Iti napalabas, adu ti imbilangtayo a paset dagiti padto ni Ezekiel kas pangibatayan no ti pannakatungpal dagita ket tipiko (simbolo) ken antitipiko (isimsimbolona a realidad). Ngem iti daytoy a libro, naliklikan ti pannakailadawan ti aniaman a persona, banag, lugar, wenno pasamak a kas tipiko a padto nga addaan ita iti antitipiko wenno isimsimbolona a realidad malaksid no adda nalawag a pangibatayan iti dayta manipud iti Kasuratan.a Imbes ketdi, maitampok ditoy ti dakdakkel a kaitungpalan ti adu a padto ni Ezekiel. Mausig pay dagiti leksion a maadaltayo manipud iti mensahe ni Ezekiel, ken kadagiti tattao, lugar, ken pasamak a dinakamatna.