Dagiti Masursuro iti Templo a Nasirmata ni Ezekiel

Naitan-ok ken Nasalakniban ti Nadalus a Panagdaydayaw

Ti templo iti sirmata ket naitan-ok iti “nakangatngato a bantay” (1). Impangatotayo kadin ti nadalus a panagdaydayaw, a daytan ti kangrunaan iti biagtayo?

Ti pader iti aglawlaw (2), a nanglakub iti nalawa nga espasio iti ruar dagiti patakder iti templo (3), ipalagipna kadatayo a masapul a ditay pulos ipalubos nga adda mangdadael iti panagdaydayawtayo ken Jehova. No ti bambanag iti “di nasantuan a disso” ket masapul a maisina iti nadalus a panagdaydayaw, lallalo koma ngarud a saan a paset iti biag ti maysa nga agdaydayaw ken Jehova ita dagiti narugit wenno immoral a kababalin!—Ezek. 42:20.

Dagiti Agnanayon a Bendision

Adda karayan nga aggapu iti santuario ti templo nga agay-ayus ken mangbibiag ken mangpadpadam-eg iti daga (4). Dagitoy a bendision ket mailawlawag iti Kapitulo 19 daytoy a libro.

Agpapada a Pagalagadan Para iti Amin

Dagiti nangato a makinruar a ruangan (5) ken dagiti makin-uneg a ruangan (9) ipalagipda kadatayo a nangato dagiti moral a pagalagadan ni Jehova iti amin a mayat a makipaset iti nadalus a panagdaydayaw. Siputanyo ta agpada ti rukod dagiti makinruar ken makin-uneg a ruangan. Maitutop dayta ta dagiti nalinteg a pagalagadan ni Jehova ket agpapada iti amin nga adipenna, aniaman ti saad wenno responsabilidadda.

Pannakipangan iti Lamisaan ni Jehova

Dagiti siled a panganan (8) ipalagipda kadatayo nga idi un-unana, mabalin a pagsasanguan a kanen dagiti tattao ti dadduma kadagiti indatonda iti templo, a kasla makipanganda ken Jehova. Naiduma dayta iti naespirituan a templo a pagdaydayawan dagiti Kristiano ita, ta ti “daton” ket naidatonen. (Heb. 10:12) Ngem mangipapaaytayo latta iti daton ti panangidaydayaw.—Heb. 13:15.

Garantia ti Dios

Mabalin a marigatanka a mangtarus iti amin a rukod a naidetalye iti sirmata. Ngem adda isuroda a napateg a punto: Garantiaanda a talaga a sigurado ti panggep ni Jehova nga isubli ti nadalus a panagdaydayaw, kas kadagiti eksakto ken di agbalbaliw a rukod. Nupay awan ti nadakamat ni Ezekiel a tattao a nakitana iti sirmata, insuratna ti nadagsen a balakad ni Jehova kadagiti padi, panguluen, ken tattao. Masapul a suroten ti amin nga adipen ti Dios dagiti nalinteg a pagalagadanna.