LEKSION 27
Kasano a Maisalakannatayo ti Ipapatay ni Jesus?
Agbasol, agrigat, ken mataytayo gapu ta nagsukir iti Dios ti umuna nga agassawa a da Adan ken Eva.a Ngem adda namnamatayo. Nangaramid ni Jehova iti pamay-an tapno maisalakantayo iti basol ken ipapatay babaen ti Anakna, ni Jesu-Kristo. Isursuro ti Biblia a gapu iti ipapatay ni Jesus, naipaay ti subbot. Ti subbot ket ti bayad a maited tapno mawayawayaan ti maysa a tao. Ti imbayad ni Jesus ket ti pateg ti perpekto a biagna kas tao. (Basaen ti Mateo 20:28.) Gapu ta perpekto ni Jesus, mabalinna koma ti agbiag nga agnanayon ditoy daga, ngem situtulok nga intedna ti biagna tapno maisubli kadatayo ti amin a napukaw da Adan ken Eva. Impakita met ni Jesus no kasano kauneg ti panagayatna ken ti panagayat ni Jehova kadatayo. Makatulong daytoy a leksion tapno mas maapresiarmo ti pateg ti ipapatay ni Jesus.
1. Ania ti pagimbaganna kadatayo ita ti ipapatay ni Jesus?
Gapu ta managbasoltayo, adu dagiti maar-aramidtayo a saan a kayat ni Jehova. Ngem no talaga a pagbabbabawyantayo dagiti basoltayo ken dawatentayo a pakawanennatayo ni Jehova babaen ken Jesu-Kristo, ken ikagumaantayo a saanen nga uliten dagita a kamali, agbalintayo a nadekket a gayyem ti Dios. (1 Juan 2:1) Kuna ti Biblia: “Naminsan laeng a natay ni Kristo gapu kadagiti basol, maysa a nalinteg a tao para kadagiti nakillo, tapno maiturongnakayo iti Dios.”—1 Pedro 3:18.
2. Kasano a pagimbagantayo iti masanguanan ti ipapatay ni Jesus?
Imbaon ni Jehova ni Jesus a mangipaay iti perpekto a biagna kas tao “tapno saan a madadael ti asinoman a mangipakita iti pammati [ken Jesus] no di ket maaddaan iti biag nga agnanayon.” (Juan 3:16) Gapu iti inaramid ni Jesus, asidegen nga ikkaten ni Jehova ti amin a dakes nga epekto ti panagsukir ni Adan. Kayatna a sawen, no ipakitatayo ti pammati iti sakripisio ni Jesus, maaddaantayo iti gundaway nga agbiag nga agnanayon iti paraiso a daga!—Isaias 65:21-23.
AMMUEM TI AD-ADU PAY
Ammuem ti ad-adu pay no apay nga inted ni Jesus ti biagna, ken no kasano a pagsayaatam dayta.
3. Ti ipapatay ni Jesus winayawayaannatayo iti basol ken ipapatay
I-play ti VIDEO, sa pagsaritaan ti sumaruno a saludsod.
Perpekto idi ni Adan, ngem gapu ta sinukirna ti Dios, amin a tattao ket agbasol ken matay
Perpekto idi a tao ni Jesus ken nagtulnog iti Dios, isu a posible para kadagiti tattao ti agbalin a perpekto ken agbiag nga agnanayon
4. Ti ipapatay ni Jesus ket pagimbagan ti amin a tattao
I-play ti VIDEO, sa pagsaritaan ti sumaruno a saludsod.
Kasano a ti ipapatay ti maysa a tao ket pagimbagan ti amin?
Basaen ti 1 Timoteo 2:5, 6, sa pagsaritaan daytoy a saludsod:
Perpekto idi ni Adan. Ngem gapu ta nagbasol, amin a tattao ket agbasol ken matay. Perpekto met idi a tao ni Jesus. Ania ti naaramidan ti ipapatayna ken kasano a nagbalin a “katupag a subbot?”
5. Ti subbot ket regalo ni Jehova kenka
Ibilang dagiti gagayyem ni Jehova ti subbot kas personal a regalo para kadakuada. Kas pagarigan, basaen ti Galacia 2:20, sa pagsaritaan daytoy a saludsod:
Kasano nga impakita ni apostol Pablo nga imbilangna ti subbot kas personal a regalo kenkuana?
Idi nagbasol ni Adan, nasentensiaan a matay agraman ti amin nga agbalin nga annakna. Ngem imbaon ni Jehova ti Anakna tapno matay para kenka ket maaddaanka iti gundaway nga agbiag nga agnanayon.
Bayat a basbasaem dagitoy a teksto, imadyinem ti narikna ni Jehova idi makitkitana nga agrigrigat ti Anakna. Basaen ti Juan 19:1-7, 16-18, sa pagsaritaan daytoy a saludsod:
Ania ti mariknam iti inaramid ni Jehova ken ni Jesus para kenka?
NO ADDA AGSALUDSOD: “Kasano koma a pagsayaatan ti amin ti ipapatay ti maysa a tao?”
Ania ti isungbatmo?
SUMARIO
Gapu iti ipapatay ni Jesus, pakawanen ni Jehova dagiti basoltayo ken adda gundawaytayo nga agbiag nga agnanayon.
Rebiu
Apay a natay ni Jesus?
Kasano a ti perpekto a biag ni Jesus ket nagbalin a katupag a subbot?
Kasano a pagimbagam ti ipapatay ni Jesus?
AGDISKOBREKA PAY
Ammuem no apay a naawagan a subbot ti perpekto a biag ni Jesus kas tao.
“Kasano a ti Sakripisio ni Jesus ket ‘Pangsubbot Kadagiti Adu’?” (Artikulo iti website)
Kitaem no ania ti masapul nga aramidentayo tapno maisalakantayo.
Mapakawan kadi ni Jehova uray dagiti serioso a basol?
“Sungbat Dagiti Saludsod Maipapan iti Biblia” (Ti Pagwanawanan, Mayo 1, 2013)
Kitaem no kasano a nabalbaliwan ti personalidad ti maysa a lalaki idi naammuanna ti sakripisio ni Kristo.
a Ti basol ket saan laeng a ti panagaramid iti dakes. Tumukoy met dayta iti tendensiatayo nga agaramid iti dakes gapu ta annaknatayo da Adan ken Eva.