APOLION

[Manangdadael].

Ti Griego a nagan nga inaramat ni apostol Juan a pangipatarus iti Hebreo nga “Abaddon” iti Apocalipsis 9:11. Ti Apolion kaipapananna ti “Manangdadael,” ket naipaay kas nagan ti “anghel ti mangliwengliweng.” Nupay iyaplikar daytoy ti kaaduan a reperensia a libro kas nagan ti dakes a persona wenno puersa, saan a kasta ti pakabuklan a salaysay ti apokaliptiko a sirmata, ta kankanayon nga iladawanna dagiti anghel nga us-usaren ti Dios a mangipagteng kadagiti ay-ay iti kabkabusorna.

Iladawan daytoy ti pannakaaramat ti nainaig a berbo nga a·polʹly·mi, kas iti Santiago 4:12, nga agkuna maipapan iti Dios: “Adda maymaysa a manangted-linteg ken ukom, daydiay a makabalin a mangisalakan ken mangdadael.” (Idiligyo ti Mt 10:28.) Binigbig ti narugit nga espiritu a pinaruar ni Jesus iti maysa a lalaki iti sinagoga idiay Capernaum a ni Jesus ket ahente ti Dios ken kinunana: “Ania ti bibiangmi kenka, Jesus sika a Nazareno? Immayka kadi tapno dadaelennakami?” (Mr 1:24; Lu 4:34) Pinakdaaran ni Jesus dagiti awanan panagbabawi a bumusbusor a karaman kadagiti agim-imdeng kenkuana nga agpegpeggadda a madadael. (Lu 13:3-5; 20:16) Dagitoy ken ti dadduma pay a teksto ipatuldoda a ti naipadayag a ni Kristo Jesus ti matuktukoy babaen iti daytoy a titulo.​—Idiligyo ti Apo 19:11-16; Lu 8:31; kitaenyo ti ABADDON.