NANGATNGATO NGA AUTORIDAD
Sasao a naaramat iti Roma 13:1 a tumukoy kadagiti natauan nga autoridad ti gobierno. Nadumaduma ti pannakaipatarus dayta a teksto kas: “Tunggal kararua paiturayan koma kadagiti nangatngato nga autoridad, ta awan ti autoridad no saan a babaen iti Dios; dagiti adda nga autoridad impasdek ti Dios kadagiti relatibo a saadda.” (NW) “Tunggal iturayan agtulnog koma kadagiti agturturay nga autoridad, ta awan ti autoridad a saan nga iturayan ti Dios, ket iti sidong ti panangiturayna napataud dagiti adda nga autoridad.” (We) “Tunggal maysa masapul nga agtulnog kadagiti autoridad ti estado, ta awan maadda nga autoridad no awan pammalubos ti Dios, ket dagiti adda nga autoridad inkabil sadiay ti Dios.”—TEV.
Ni Jehova a Dios, nupay saan nga isu ti nangbukel kadagitoy nga autoridad ti gobierno ti tao (idiligyo ti Mt 4:8, 9; 1Jn 5:19; Apo 13:1, 2), impalubosna a maadda dagita, ket agtultuloy dagita gapu iti pammalubosna. Nupay kasta, no kayat ni Jehova nga ikkaten, iturong, wenno iturayan ti kakasta nga autoridad tapno maibanag ti pagayatanna, kabaelanna nga aramiden dayta. Kinuna ni mammadto Daniel maipapan ken Jehova: “Pagbalbaliwenna dagiti tiempo ken pampanawen, mangikkat iti ar-ari ken mangipasdek iti ar-ari.” (Da 2:21) Ket kunaen ti Proverbio 21:1: “Ti puso ti maysa nga ari ket kas barbaresbes ti danum iti ima ni Jehova. Iti sadinoman a pakaragsakanna, iturongna dayta.”—Idiligyo ti Ne 2:3-6; Est 6:1-11.
Dagiti Rason nga Agpasakup Dagiti Kristiano. Yantangay awan rason a bumusor dagiti Kristiano iti urnos nga impalubos ti Dios, adda naimbag a rason nga agpasakupda kadagiti nangatngato nga autoridad. Dagiti agtuturay iti gobierno, nupay mabalin a rinukerda a mismo, gagangay a saanda a dusaen ti sabsabali gapu iti naimbag nga aramid, kayatna a sawen, gapu iti panangannurotda iti linteg ti pagilian. Ngem ti tao a nagtakaw, pimmatay, wenno nagaramid iti dadduma pay a panagsalungasing iti linteg ekspektarenna ti nadagsen a dusa manipud agturturay nga autoridad. Kas pagarigan, ti maysa nga inggagarana ti pimmatay mabalin a mapapatay gapu iti naaramidanna a krimen. Yantangay kalpasan ti Layus (Ge 9:6) impalubos ni Jehova a Dios a maipataw ti dusa nga ipapatay maipaay kadagiti mammapatay, ti natauan nga autoridad a nangbitay iti nangsalungasing iti linteg ket agtigtignay kas “ministro ti Dios, maysa a manangibales tapno mangyebkas ti pungtot iti daydiay mangan-annurot iti dakes.”—Ro 13:2-4; Tit 3:1; 1Pe 2:11-17.
Agpasakup ti Kristiano kadagiti nangatngato nga autoridad saan laeng a gapu ta madusa dagiti agar-aramid iti dakes no di ket gapu ta dayta ti ikeddeng ti konsiensiada. Agpaspasakup dayta kadagiti natauan nga autoridad gapu ta bigbigenna a maitunos daytoy iti pagayatan ti Dios. (Ro 13:5; 1Pe 2:13-15) Gapuna, ti panagpasakup kadagiti nangatngato nga autoridad—nailubongan a napolitikaan nga autoridad—ket saan a mainaig iti tunggal aramid. Imposible a mapagtalinaed ti maysa a Kristiano ti naimbag a konsiensiana ken maaramidna ti pagayatan ti Dios no salungasingenna met ti linteg ti Dios gapu ta dayta ti kalikaguman ti napolitikaan nga autoridad. Gapu itoy, ti panagpasakup kadagiti nangatngato nga autoridad kanayon koma a maibatay iti sasao dagiti apostol iti Sanhedrin dagiti Judio: “Masapul nga agtulnogkami iti Dios kas agturay imbes a kadagiti tattao.”—Ara 5:29.
Yantangay mangipapaay dagiti autoridad ti gobierno iti napapateg a serbisio tapno masigurado ti kinatalged, seguridad, ken pagsayaatan dagiti iturayanda, karbenganda ti maipaayan iti buis ken impuesto kas subad kadagiti serbisioda. Dagiti autoridad ti gobierno mabalin a maawaganda iti “publiko nga ad-adipen ti Dios” iti anag a mangipapaayda kadagiti makatulong a serbisio. (Ro 13:6, 7) No dadduma ti kakasta a serbisio direkta a makatulong kadagiti adipen ti Dios, kas idi inyetnag ni Ari Ciro ti panagsubli dagiti Judio idiay Juda ken Jerusalem ket bangonenda manen ti templo. (2Cr 36:22, 23; Esd 1:1-4) Masansan a dagiti pagimbagan ket sagrapen ti isuamin no umiso ti panangitungpal dagiti autoridad iti pagrebbenganda. Karaman ditoy ti panangtaginayonda iti maysa a sistema ti linteg a mabalin a pagkiddawan dagiti tattao iti hustisia, salaknib manipud kadagiti kriminal ken kadagiti ilegal a bunggoy dagiti agderderraaw a tattao, ken dadduma pay.—Fil 1:7; Ara 21:30-32; 23:12-32.
Siempre, ti maysa nga agturay a di umiso ti panangusarna iti autoridadna ket manungsungbat iti Dios. Insurat ni apostol Pablo: “Dikay ibalesan ti bagbagiyo, dungdungnguen, no di ket ipaayanyo ti lugar ti pungtot; ta adda a naisurat: ‘Kukuak ti pammales; supapakakto, kuna ni Jehova.’”—Ro 12:19; Ec 5:8.