NASANTUAN A KONTRIBUSION
Paset ti daga iti sirmata ni Ezequiel maipapan iti pannakabingbingay ti Naikari a Daga.
Manipud daya nga agpalaud, naipaayan iti bingay a daga ti tunggal maysa kadagiti 12 a tribu, malaksid iti Levi (a ti Jose ket inrepresentar ti Efraim ken Manases, isu nga agdagup latta iti 12). Iti abagatan ti naited a bingay ti Juda, nga isu ti maikapito manipud iti makin-amianan nga ungto, adda masarakan a maysa nga administratibo a paset ti daga. (Eze 48:1-8) Ti makin-amianan a pagpatinggaan daytoy a paset ti daga ket nayunnat iti pangatiddogan iti makin-abagatan a beddeng ti naited a bingay ti Juda; ti kabinneddengna iti abagatan ket ti naited a bingay ti Benjamin, nga isu ti maikalima a bingay manipud iti ungto iti abagatan. (Eze 48:23-28) Daytoy nga administratibo a paset ti daga ket agakaba iti 25,000 a kasiko (13 km; 8 mi) manipud iti amianan nga agpaabagatan. Inted dayta dagiti umili tapno aramaten ti gobierno.—Eze 48:8.
Ti santuario ni Jehova ket adda iti tengnga ti 25,000-kasiko-kuadrado nga “intero a kontribusion” iti uneg dayta nga administratibo a daga. Ti nabatbati pay a benneg daytoy iti daya ken laud ket dua a paset agpaay iti panguluen. (Eze 48:20-22; kitaenyo ti PANGULUEN.) Kastoy ti pannakabingay ti “intero a kontribusion”: Naited kadagiti saan a papadi a Levita ti maysa nga immatiddog a paset iti makin-amianan a beddeng a ti kaakabana ket 10,000 a kasiko (5.2 km; 3.2 mi). Awan kadagitoy naited a bingay a daga ti mailako wenno maisukat, “ta nasantuan a banag dayta ken Jehova.” (Eze 48:13, 14) Ti makin-abagatan a beddeng ti naited a bingay dagiti Levita ket maysa nga immatiddog a paset a 10,000-kasiko, maysa a “nasantuan a kontribusion maipaay iti papadi.” Iti daytoy a paset a kukua ti papadi ti ayan ti santuario, wenno templo, ni Jehova. (Eze 48:9-12) Adda pay nabati a maysa nga immatiddog a paset iti abagatan a ti kaakabana ket 5,000 a kasiko (2.6 km; 1.6 mi). Daytoy a paset ket “maysa . . . a banag a di nasantuan maipaay iti siudad, maipaay a disso a pagnaedan ken maipaay a pagpaaraban.” (Eze 48:15) Ti siudad a maawagan iti “Ni Jehova a Mismo Adda Sadiay” ket adda iti tengnga daytoy a paset. Ti siudad ket 4,500 a kasiko (2.3 km; 1.4 mi) kuadrado, nga addaan 12 a ruangan, ken addaan pagpaaraban a 250 a kasiko (130 m; 425 pie) ti kaakabana iti intero nga aglikmutna. Ti nabatbati pay a paset ti 25,000-kasiko kuadrado, nga isu dayta ti 10,000 a kasiko iti daya ti siudad ken 10,000 a kasiko iti laud (5,000 a kasiko ti kaakabana), ket naibilang met a di nasantuan ken talonen dagiti tribu ti Israel tapno adda pangalaan iti pagtaraon ti siudad.—Eze 48:15-19, 30-35.
Gapuna, ti aktual a rukod ti “nasantuan a kontribusion” ket 25,000 a kasiko manipud daya nga agpalaud ken 20,000 a kasiko manipud amianan nga agpaabagatan. Buklen dayta ti dua nga immatiddog a daga a sag-10,000-kasiko ti kaakabana, a ti maysa ket naituding kadagiti papadi ket ti sabali naituding met kadagiti Levita. Ti nabatbati a paset ti 25,000-kasiko-kuadrado a kontribusion ket ‘maysa a banag a di nasantuan,’ isu a naaramat “maipaay iti siudad, maipaay a disso a pagnaedan ken maipaay a pagpaaraban.”—Eze 48:10, 13-15, 18, 20, 21.