PANULBEKAN, TRANGKA

Alikamen a pangpunit iti rikep wenno ruangan tapno manglapped iti iseserrek. (Uk 3:23, 24; Ne 3:3, 6, 13-15) Ti panulbekan wenno trangka kadagidi nagkauna a tiempo gagangay a buklen ti maysa a tornok a kayo a mayalus-os nga agpasikigan iti maysa a kanal iti nakapatakder a kayo a naikapet iti rikep. Tapno matulbekan ti rikep, naiduron ti tornok a sumrek iti maysa a susulbongan iti bautek ket natengngel babaen kadagiti kayo wenno landok a sanat nga agpababa kadagiti abut iti tornok manipud pannakaipatakderda. Tapno maikkat ti pannakaitulbek ti ridaw, maiserrek idi ti maysa a tulbek tapno agpangato dagiti sanat, iti kasta mapagsubli ti tornok iti di nakatulbek a kasasaad. Ti susulbongan, wenno lungog, a nakaiserrekan ti tornok tinukoy ti Sulamita a babai iti panangibinsabinsana iti natagtagainepna nga iti dayta nayadayo kenkuana ti pastor a kaayan-ayatna babaen iti natulbekan a ruangan.​—Sol 5:2-5; kitaenyo ti TULBEK.