PASUKSOK

Ti napateg a banag a maited tapno maimpluensiaan ti umawat a mangaramid iti pagimbagan ti nangted, gagangay nga iti di nainkalintegan wenno dakes a pamay-an. Ti Hebreo a sao maipaay iti pasuksok (shoʹchadh) ket mabalin met nga ipatarus a “sagut” wenno “rangkap,” depende iti konteksto. (Ex 23:8, Rbi8 ftn; 1Ar 15:19; Pr 17:8) Dakamaten ti Kasuratan a ti panangawat kadagiti pasuksok ket agtungpal iti pannakaballikug ti hustisia kasta met iti pannakaibukbok ti dara.​—De 16:19; 27:25; Eze 22:12.

Iti linteg ti Dios iti Israel, espesipiko a naiparit ti panangawat kadagiti pasuksok, ket kas Katan-okan nga Ukom, impasdek ni Jehova ti perpekto nga ulidan babaen ti kanayon a panangyetnagna kadagiti awanan panangidumduma a pangngeddeng ken ti saanna a pulos panangawat iti pasuksok. (Ex 23:8; 2Cr 19:7) Gapuna, dagidiay sangaili iti tolda ni Jehova masapul a tuladenda ti Dios maipapan iti daytoy a banag.​—Sal 15:1, 5; kitaenyo met ti Isa 33:15, 16.

Naglaon ti Biblia iti adu a pagarigan dagidiay immawat iti pasuksok. Napasuksokan ni Dalila tapno liputanna ni Samson, a ti tunggal aliado nga apo dagiti Filisteo ket nagbayad iti 1,100 a kapisi a pirak ($2,422, no dagiti “kapisi a pirak” ket siklo). (Uk 16:5) Ti annak ni Samuel a mammadto ken ukom, saan a kas iti amada, immawatda iti pasuksok ket binallikugda ti panangukom. (1Sm 8:3; 12:3) Dinakamat ni David dagiti tattao a napno iti pasuksok ti makannawan nga imada, a mangitandudo koma iti kinalinteg. (Sal 26:10) Da Ari Asa ken Acaz pinasuksokanda ti ari ti Siria ken ti ari ti Asiria maipaay iti namilitariaan a tulong. (1Ar 15:18, 19; 2Ar 16:8) Dagiti pannakaulo, wenno piprinsipe, ti di matalek a Jerusalem nagbalinda a managayat iti pasuksok. (Isa 1:23; 5:23; Mik 3:11) Saan a kas kadagiti gagangay a balangkantis nga umawat iti tangdan, ti di matalek a Jerusalem nangted ketdi iti pasuksok ti sabsabali tapno umayda kenkuana.​—Eze 16:33.

Idi umuna a siglo K.P., arigna immawat ni Judas Iscariote iti pasuksok tapno liputanna ni Jesu-Kristo (Mt 26:14-16, 47-50), ket imbaybayag ni Gobernador Felix ti kinahustisia iti kaso ni Pablo idi ninamnamana nga umawat iti pasuksok manipud iti apostol.​—Ara 24:26, 27.

Ad-adda a matarusan ti sasao a “pasuksok manipud iti saklot” ken “pasuksok iti saklot” no laglagipen a ti sao a “saklot” iti Hebreo ket mabalin met a tumukoy iti kupin ti maysa a kawes iti ngatuen ti sinturon. Dagitoy a sasao ipakitada ngarud a ti pasuksok ket nalawag a nakalemmeng iti makinngato a kupin ti kawes sa sililimed a maited iti sabali a mangilemmeng met iti dayta.​—Pr 17:23; 21:14; kitaenyo ti SAGSAGUT, RANGKAP.