SALOME
[nalabit nagtaud iti Heb. a sao a kaipapananna ti “talna”].
1. Ti panangidilig iti Mateo 27:56 iti Marcos 15:40 mabalin nga ipasimudaagna a ni Salome ti ina ti annak ni Zebedeo—da Santiago ken Juan, nga apostol ni Jesu-Kristo. Ti immun-una a teksto inagananna ti dua kadagiti Maria, awan sabali, da Maria Magdalena ken Maria nga ina da Santiago (a Bassit) ken Joses; ket mairaman kadagitoy, dakamaten met dayta a ti ina ti annak ni Zebedeo addada a siiimatang idi mailansa ni Jesus; idinto ta ti naud-udi a teksto inagananna ti babai a kadua dagiti dua a Maria kas Salome.
Sigun kadagiti umasping a pangibatayan, naipagarup a ni Salome ket nainlasagan met a kabsat ni Maria, ti ina ni Jesus. Naidatag daytoy agsipud ta ti kasuratan iti Juan 19:25 inagananna ti isu met laeng a dua a Maria, ni Maria Magdalena ken ti “asawa ni Clopas” (tarusan ti kaaduan nga isu ti ina ni Santiago a Bassit ken ni Joses), ken kasta met a kunaenna: “Iti denna ti kayo a pagtutuokan ni Jesus, nupay kasta, adda nga agtaktakder ti inana ken ti kabsat a babai ti inana.” No daytoy a teksto (malaksid iti panangdakamatna iti ina ni Jesus) tuktukoyenna ti isu met laeng a tallo a tattao a dinakamat da Mateo ken Marcos, ipasimudaagna a ni Salome ket kabsat ti ina ni Jesus. Iti sabali a bangir, kunaen ti Mateo 27:55 ken Marcos 15:40, 41 nga adu a sabsabali pay a babbai ti adda idi a kimmuyog ken Jesus, ket ngarud mabalin a karaman kadakuada ni Salome.
Ni Salome ket adalan ni Apo Jesu-Kristo, karaman kadagiti babbai a kimmuykuyog kenkuana ken nagserserbi kenkuana manipud kadagiti sanikuada, kas ipamatmat da Mateo, Marcos, ken Lucas (8:3).
No umiso ti pakabigbiganna kas ti ina ti annak ni Zebedeo, ngarud isuna daydiay immasideg ken Jesus nga addaan iti kiddaw a maited iti annakna dagiti tugaw iti makannawan ken iti makannigid ni Jesus iti Pagarianna. Ni Mateo deskribirenna a ti ina ti agdawdawat, idinto ta ni Marcos ipakitana a da Santiago ken Juan ti agkidkiddaw. Nalawag a dagiti annak ti addaan iti tarigagay ket inuyotanda ti inada nga agkiddaw. Daytoy ket pasingkedan ti inlanad ni Mateo nga, idi nangngegda ti maipapan iti kiddaw, ti dadduma nga adalan nagrurodda, saan nga iti ina, no di ket kadagiti dua nga agkabsat.—Mt 20:20-24; Mr 10:35-41.
Idi pumarbangon iti maikatlo nga aldaw kalpasan ti ipapatay ni Jesus, karaman ni Salome kadagiti babbai a napan iti tanem ni Jesus tapno sapsapuanda ti bagina kadagiti especia, ngem naduktalanda a naituliden ti bato ket, iti uneg ti tanem, adda anghel a nangipakaammo kadakuada: “Isu naibangonen, awan ditoy. Kitaenyo! Ti disso a nangipaiddaanda kenkuana.”—Mr 16:1-8.
2. Anak a babai ni Herodes Felipe ken kakaisuna nga anak ti inana a ni Herodias. Idi agangay, inasawa ni Herodes Antipas ti ina ni Salome, a buyogen pannakikamalala nga innalana manipud iti kabsatna iti ama a ni Felipe. Sakbay unay ti Paskua ti 32 K.P., nangangay ni Antipas iti panangrabii idiay Tiberias kas panangrambak iti kasangayna. Inawisna ti prinsesa a ni Salome, a siumanna itan, tapno agsala iti sanguanan ti grupo, a buklen idi dagiti “nangato ti saadna a tattaona ken dagiti komandante ti militar ken dagiti kangrunaan ti Galilea.” Naayatan unay ni Herodes iti panagsala ni Salome ta inkarina nga ited kenkuana ti aniaman a kiddawenna—agingga iti kagudua ti pagarianna. Iti balakad ti nadangkes nga inana, kiniddaw ni Salome ti ulo ni Juan a Manangbautisar. Ni Herodes, nupay nagleddaang, “maipagapu kadagiti sapatana ken kadagidiay kaduana a sisasadag imbilinna a maited dayta; ket nagbaon ket pinaputolanna ni Juan iti pagbaludan. Ket ti ulona naiyeg iti maysa a bandeha ket naited iti balasang, ket inyegna dayta ken inana.”—Mt 14:1-11; Mr 6:17-28.
Nupay saan a naibaga ti naganna iti Kasuratan, nataginayon dayta iti sursurat ni Josephus. Ibagana met ti maipapan iti pannakiasawana iti sabali pay a kabsat ni Herodes Antipas iti ama, ni Felipe nga agturay iti distrito, ngem saan a naaddaan iti anak manipud iti dayta a panagtipon. Kalpasan ti ipapatay ni Felipe, kuna ti salaysay ni Josephus, nakiasawa iti kasinsinna a ni Aristobulo ket nangipasngay kenkuana iti tallo nga annak a lallaki.