JEHOSEBA

[Ni Jehova Aglaplapusanan].

Asawa ti Nangato a Padi a ni Jehoiada; anak a babai ni Ari Jehoram ti Juda, nupay mabalbalin a saan a babaen iti asawana a ni Athalia. Ti sabali pay nga ispeling ti naganna ket “Jehosabeat.” (2Cr 22:11) Kalpasan ti ipapatay ti kabsatna (wenno kabsatna iti ama) a ni Ari Ocozias, ni Jehoseba inlemmengna ti maladaga a ni Jehoas nga anak ni Ocozias tapno mailisi iti panangpapatay ni Athalia kadagiti naarian a putot. Pinagtalinaed da Jehoiada ken Jehoseba a silelemmeng ti kaanakanda kadagiti siledda iti templo iti innem a tawen sakbay nga isu inruar ni Jehoiada tapno maideklara kas ari. (2Ar 11:1-3; 2Cr 22:10-12) Ti tignay ni Jehoseba, kasta met ti asawana, ket panangiwanwan ti Dios tapno mataginayon ti naarian a kapuonan manipud ken David agingga iti Mesias.