DEDIKASION
Pannakaisina wenno pannakailasin maipaay iti sagrado a panggep. Ti Hebreo a berbo a na·zarʹ (idedikar) addaan iti kangrunaan a kaipapanan nga “agtalinaed a naisina; maisina; maisanud.” (Le 15:31; 22:2; Eze 14:7; idiligyo ti Os 9:10, Rbi8 ftn.) Ti nainaig a Hebreo a sao a neʹzer tumukoy iti pagilasinan wenno simbolo ti nasantuan a dedikasion a naibalangat kas korona iti rabaw ti nasantipikar nga ulo ti maysa a nangato a padi wenno iti ulo ti maysa a napulotan nga ari; tumukoy met dayta iti kina-Nazareo.—Nu 6:4-6; idiligyo ti Ge 49:26, Rbi8 ftn.
Idi naisaad ni Aaron kas nangato a padi, naikabil iti ulona ti turbante a naaramid iti napino a lienso. Babaen iti singdan nga asul a sinulid iti sango daytoy a turbante tapno makita ti amin, naigalut ti nasantuan a “pagilasinan ti dedikasion [neʹzer],” maysa a sumilsilnag a plata a puro a balitok a nakitikitan kas selio iti sasao nga, iti Hebreo, “Ti kinasanto kukua ni Jehova.” Ti nasantuan a pangpulot a lana simmaruno a naibukbok iti nangato a padi iti seremonia ti pannakaisaad. (Ex 29:6, 7; 39:30, 31, Rbi8 ftn; Le 8:9, 12) Kankanayon a kasapulan nga agannad ti nangato a padi tapno maliklikan ti panagaramid iti aniaman a banag a mangtabbaaw iti santuario, “agsipud ta ti pagilasinan ti dedikasion, ti pangpulot a lana ti Diosna, adda kenkuana.”—Le 21:12.
Umasping iti dayta, ti sao a neʹzer timmukoy iti “balangat,” maysa nga opisial nga abbong ti ulo nga inyaruat dagiti napulotan nga ari ti Israel kas simbolo ti nasantuan nga akemda.—2Sm 1:10; 2Ar 11:12; 2Cr 23:11; Sal 89:39; 132:18; Pr 27:24.
No ti maysa a tao ket nagkari ken Jehova iti kari ti Nazareo saanna a putdan ti buokna wenno kiskisan ti barbasna bayat nga adda kenkuana ti kari. Iti kasta, ti atiddog a buokna nagbalin a pannakakorona a pagilasinan ti kina-Nazareona (neʹzer). (Nu 6:4-21) Iti panangiladawanna iti Jerusalem a kasla persona a nangrakrak kadagiti sagrado a karina iti kinasanto ken Jehova, inyebkas ni mammadto Jeremias: “Pukisam ti di naputdan a buokmo [wenno “naidedikar a buok”; niz·rekhʹ, maysa a porma ti neʹzer] ket ibellengmo.” (Jer 7:29) Babaen ti sabali pay a mammadto, deskribiren ni Jehova no kasano a ti nasungit nga Israel “napanda ken Baal ti Peor, ket indedikarda ti bagbagida [wai·yin·na·zeruʹ, maysa a porma ti berbo a na·zarʹ] iti nakababain a banag.”—Os 9:10.
Iti Kristiano a Griego a Kasuratan natukoy ti sumagmamano a naidedikar a banag. Ti “piesta ti dedikasion” (en·kaiʹni·a) iti kalam-ekna ket nadakamat mainaig iti naindagaan a ministerio ni Jesus. (Jn 10:22; kitaenyo ti PIESTA TI DEDIKASION.) Daytoy a Griego a sao nga en·kaiʹni·a ket addaan iti isu met laeng a ramut a sao a kas iti en·kai·niʹzo, nga iti Hebreo 9:18 impatarus ti sumagmamano a patarus kas “idedikar” (AS, KJ, Dy, Sp), ngem “inaguraran” ti dadduma. (CC, Mo, NE, NW, We) Umasping iti dayta, iti Hebreo 10:20 ipatarus dayta ti sumagmamano kas “idedikar” (AS, Dy, Sp), ti dadduma, “inaguraran.” (CC, Mo, NW) Inturong ni Jesus ti atension kadagiti kadawyan a sursuro dagiti Fariseo maipapan iti “korban,” kayatna a sawen, maysa a sagut a naidedikar iti Dios. (Mr 7:11; Mt 15:5; kitaenyo ti KORBAN.) Impakdaar met ni Jesus nga um-umay ti tiempo inton marba ti templo ni Herodes, agraman ti “nasayaat a batbato ken ti naidedikar a bambanag [a·na·theʹma·sin]” dayta.—Lu 21:5, 6.