PANAGPASIKAL

Ti rigat a mainaig iti panagpasngay. Kalpasan a nagbasol ti umuna a babai a ni Eva, inyebkas ti Dios kenkuana no ania ti ibunga dayta iti panagpasngayna. No koma ta nagtulnog, nagtultuloy koma kenkuana ti pamendision ti Dios ket bin-ig a rag-o ti bunga ti panagpasngayna ta “ti bendision ni Jehova​—isu dayta ti mangpabaknang, ket awan rigat nga inayonna iti dayta.” (Pr 10:22) Ngem sipud idin, ti panagandar ti bagi ti amin nga imperpekto a tattao ket makarikna iti ut-ot. Maitutop unay a kinuna ti Dios (ta masansan a ti bambanag nga ipalpalubosna ket naikuna nga ar-aramidenna): “Paaduekto unay ti rigat ti panagsikogmo; kadagiti ut-ot iti panaganak agipasngaykanto iti annak.”​—Ge 3:16.

Ti literal a kaipapanan ti Hebreo a sasao iti daytoy a teksto ti Kasuratan ket “ti panagpaut-otmo ken ti panagsikogmo,” ken impatarus ti sumagmamano a managipatarus kas “dagiti ladingitmo ken panaginawmo.” (KJ; Yg) Ngem ti naaramat a porma ti gramatika ket maaw-awagan iti hendiadys, nga iti dayta ti dua a sasao ket pinagsilpo ti “ken” nupay maysa laeng a banag ti matuktukoy. Kastoy met laeng ti panangipatarus dagiti agdama a patarus kadagitoy a sasao. (AT; Mo; RS) Gapuna, saanna kayat a sawen a lumanlan ti panaginaw no di ket ti ut-ot.

Pudno a mabalin a maep-ep ti rigat ti panagsikog ken ut-ot ti panagpasngay babaen kadagiti pamay-an ti panangagas ken mabalin pay ketdi a malapdan dayta babaen kadagiti pamay-an ti pannakataripato ken ti nasakbay a panagsagana. Ngem, kaaduanna, ti panagpasngay ket panagpasar latta iti pisikal a panagrigat.​—Ge 35:16-20; Isa 26:17.

Simboliko nga Usar. Iti laksid ti ut-ot ti panagpasikal a kakuykuyog iti panagpasngay, kinaragsak ti ibungana apaman a mayanak ti ubing. Idi kinasarita ni Jesu-Kristo dagiti apostolna iti daydi rabii sakbay ti ipapatayna, inaramatna daytoy a kasasaad kas maysa a pangngarig. Inlawlawagna kadakuada a panawanna ida ket kalpasanna kinunana: “Pudno unay kunak kadakayo, Agsangit ken agdung-awkayto, ngem agrag-onto ti lubong; agladingitkayto, ngem ti ladingityo mapagbalinto a rag-o. Ti maysa a babai, no agpaspasngay, addaan ladingit, agsipud ta dimtengen ti orasna; ngem no naipasngaynan ti ubing, saannan a malagip ti rigat gapu iti rag-o a nayanak ti maysa a tao iti lubong. Ngarud, dakayo met ita, iti kinapudnona, addaankayo iti ladingit; ngem makitakayto manen ket agrag-onto dagiti pusoyo, ket ti rag-oyo awanto ti mangikkat manipud kadakayo.”​—Jn 16:20-22.

Napasamak kadakuada daytoy nasaem a kasasaad iti nakurang a tallo nga aldaw, idi nagsangitda ken ‘pinarigatda dagiti kararuada’ babaen ti panagayunar. (Lu 5:35; idiligyo ti Sal 35:13.) Ngem iti agsapa ti maikatlo nga aldaw, Nisan 16, ken iti 40 nga aldaw kalpasan dayta, nagparang ti napagungar a ni Jesus iti sumagmamano kadagiti adalan. Kasta unay ti rag-oda! Idi aldaw ti Pentecostes, ti maika-50 nga aldaw nanipud panagungar ni Jesus, naiparukpok kadakuada ti nasantuan nga espiritu ti Dios, ket narag-oanda ti panagbalinda kas saksi iti panagungarna, umuna idiay Jerusalem ken idi agangay iti kaadaywan a paspaset ti daga. (Ara 1:3, 8) Ket awan ti makaikkat kadakuada iti rag-oda.​—Jn 16:22.

Idi inladawan ti salmista ti panaguummong ti ar-ari bayat a buybuyaenda ti kinangayed ken kinatan-ok ti Sion a nasantuan a siudad ti Dios, agraman dagiti nabileg a torre ken baluartena, kinunana: “Nakitada a mismo; ket ngarud nagsiddaawda. Nariribukda, napagtatarayda a silalagaw. Ti met laeng panagpigerger pinetpetanna ida sadiay, dagiti ut-ot iti panaganak a kas kadagiti ut-ot ti maysa a babai nga agpaspasngay.” (Sal 48:1-6) Nalawag ti panangiladawan daytoy a teksto iti aktual a pasamak a dagiti kabusor nga ar-ari naglagawda gapu iti naisayangkat a pannakaraut ti Jerusalem.

Iti padto ni Jeremias a pannakaabak a dumteng iti nabileg a Babilonia, dinakamatna ti maipapan iti maysa nga ili manipud iti amianan, a ti damag maipapan iti dayta nga ili ti pakaigapuan a maaddaan ti ari ti Babilonia kadagiti nakaro nga ut-ot, kas iti babai nga agpasngay. Natungpal daytoy idi a ni Ciro immay maibusor iti Babilonia ken aglalo idi nagparang iti diding ti misterioso a surat ti ima bayat ti padaya ni Ari Belsazar ti Babilonia. Imbaga ni mammadto Daniel ti kaipapanan daytoy misterioso a surat ken Belsazar kas pakpakauna iti dagus a pannakatnag ti Babilonia iti ima dagiti Medo ken Persiano.​—Jer 50:41-43; Da 5:5, 6, 28.

Inlawlawag ni apostol Pablo nga inton ipukpukkawda ti “Talna ken talged!” isunton ti iyaay ti “aldaw ni Jehova.” Iti kasta “giddato a dumteng kadakuada ti kellaat a pannakadadael kas iti ut-ot ti panagrigat a dumteng iti masikog a babai; ket saandanto a pulos makalisi.” (1Te 5:2, 3) Dumteng a giddato ti panagpasikal, a saan nga ammo no ania nga aldaw ken oras. Agarup 15 agingga iti 20 minuto ti baet ti damo a panagpasikal, ngem agdadarandan dayta bayat nga umad-adanin ti panagpasngay. Kaaduanna, ababa laeng ti tiempo ti panagpasikal, nangnangruna iti maikadua a tukad dayta, ngem apaman a mangrugin ti ut-ot ti panagpasikal, ammo ti babai a dandanin agpasngay ket agpasar iti nakaro a rigat. Saanna a ‘malisian.’

Iti sirmata ni apostol Juan iti Apocalipsis, nakitana ti nailangitan a babai nga agik-ikkis gapu “kadagiti panagpasikalna ken iti nakaro a panagrigatna nga agpasngay.” Ti ubing a nayanak ket “maysa nga anak, maysa a lalaki, a mangipastor kadagiti amin a nasion babaen iti sarukod a landok.” Iti laksid dagiti panangikagumaan ti dragon a mangalun-on iti dayta, “ti anakna narabsut a naipan iti Dios ken iti tronona.” (Apo 12:1, 2, 4-6) Ti panangrabsut ti Dios iti anak ipasimudaagna ti panangawat ti Dios iti ubing kas kukuana, kas iti kaugalian kadagidi nagkauna a tiempo a maidatag ti kappasngay nga ubing iti amana tapno awatenna. (Kitaenyo ti PANAGANAK, PANAGIPASNGAY.) Kaawatan a ti “babai” ket “asawa” ti Dios, ti “Jerusalem sadi ngato,” ti “ina” ni Kristo ken ti naespirituan a kakabsatna.​—Ga 4:26; Heb 2:11, 12, 17.

Siempre, ti nailangitan a “babai” a kukua ti Dios ket perpekto, ket ti panagpasngayna saan a literal a makarikna iti ut-ot. Ngarud ti panagpasikal ipasimudaagna nga iti simboliko a pamay-an, ammon ti “babai” a dandanin agpasngay; nga inanamaenna nga asidegen a mapasamak dayta.​—Apo 12:2.

Asino daytoy nga “anak, maysa a lalaki”? ‘Ipastoranna dagiti amin a nasion babaen iti sarukod a landok.’ Naipadto daytoy iti Salmo 2:6-9 ti maipapan iti Mesianiko nga Ari ti Dios. Ngem nakita ni Juan daytoy a sirmata adu a tawen kalpasan ti pannakayanak ni Kristo ditoy daga ken ti ipapatay ken panagungarna. Gapuna, nabatad a ti sirmata ket tumukoy iti pannakaipasngay ti Mesianiko a Pagarian nga iturayan ti Anak ti Dios a ni Jesu-Kristo, nga idi naibangon manipud kadagiti natay, “nagtugaw iti makannawan ti Dios, nanipud idin agur-uray agingga a dagiti kabusorna maikabilda a pagbatayan dagiti sakana.”​—Heb 10:12, 13; Sal 110:1; Apo 12:10.

Mapadpadaanan idi daytoy a pasamak, ket bayat nga umad-adani dayta a tiempo, kumarkaro met ti panangsegga iti dayta idiay langit ken ditoy daga, ta dagiti natungpalen a padto ket sigurado a pammaneknek nga asidegen dayta. Kas imbaga ti apostol kadagiti Kristiano, kastanto ti iyaay ti “aldaw ni Jehova”: “Ita no maipapan kadagiti tiempo ken kadagiti panawen, kakabsat, saanyon a kasapulan ti masuratan.” “Dakayo, kakabsat, awankayo iti sipnget, tapno kellaatennakayo dayta nga aldaw a kas kadagiti mannanakaw.”​—1Te 5:1, 4.