ABIEL

[Ti Ama(k) ket Dios].

1. Anak ni Zeror, ken kaputotan da Becorat ken Afias, iti tribu ni Benjamin. Adda pakaibatayan ti panamati a ni Abiel ket naawagan met iti “Jeiel” iti salaysay ti Cronicas no idilig ti 1 Cronicas 8:29-33 ken 9:35-39 iti 1 Samuel 9:1, 2 ken 14:50, 51, yantangay naipakita kadagita a ni Jeiel ti ama ni Ner, a nagbalin nga ama ni Kis, ti ama ni Saul. Ti 1 Samuel 14:50, 51 ipakitana met a ni Abiel (wenno Jeiel) ket ama ni Ner. Ipakita ti rekord iti Cronicas nga adda siam a sabsabali pay nga annak ni Jeiel (wenno Abiel), a maysa kadakuada ket agnagan iti Kis, ket daytoy laklakay a Kis isu ti uliteg ti anak ni Ner a Kis met ti naganna.

No ipapantayo a ti Abiel ken Jeiel ket nagnagan ti maymaysa a tao, makaibalabalatayo iti kapuonan a kas iti daytoy a tsart.

Isu a no mabasatayo iti 1 Samuel 9:1 a ni Kis (kayatna a sawen, ti maikadua a Kis, ti ama ni Saul) ket “ti anak ni Abiel,” agparang a ti kayatna a sawen ket apoko ni Abiel, a kasta ti masansan a mapaspasamak kadagiti kapuonan iti Biblia no naikkat ti dua wenno ad-adu pay a kasilpo ti kapuonan. (Gapuna, nupay nadakamat iti 1 Samuel 10:21 a nairaman da Kis ken Saul iti “pamilia dagiti Matrita,” awan ti nagan ni Matri kadagiti salaysay nga us-usigentayo, uray iti dadduma pay a paset ti Biblia.)

Kasla sigurado ti panangidatag ti rekord iti 1 Cronicas (8:33; 9:39) a ni Ner ket ama a mismo ti maikadua a Kis, ken nabatad a kadagitoy dua a salaysay nalawlawag daytoy.​—Kitaenyo ti KIS Num. 2 ken 3.

2. Maysa met a Benjamita.​—Kitaenyo ti ABI-ALBON.