JEHOACAZ

[Tenglen Koma ni Jehova; Tinengngel ni Jehova].

1. Naiduma nga ispeling ti nagan ni Ocozias, a nangsuno ken amana a Jehoram kas ari ti Juda idi maudi a paset ti maikasangapulo a siglo K.K.P. (2Cr 21:16, 17; 22:1) Iti daytoy sabali pay nga ispeling a masarakan met iti Masoretiko a teksto iti 2 Cronicas 25:23, nayakar laeng ti nadibinuan a nagan tapno agbalin a pangrugian a sao imbes a pagnguduan a sao. Daytoy nga ari ti Juda ket naawagan met idi iti Azarias.​—2Cr 22:6b; kitaenyo ti OCOZIAS Num. 2.

2. Anak ni Ari Jehu ken simmuno kenkuana kas ari ti Israel. Nagturay ni Jehoacaz iti 17 a tawen, manipud 876 agingga idi agarup 860 K.K.P. (2Ar 10:35; 13:1) Idi sinunuanna ni amana iti trono, ti kaaduan a paset ti masaksakupanna ket iturturayan ti Sirio nga Ari Hazael ti Damasco, a nangagaw manipud ken Jehu ti intero a teritoria ti Israel iti daya ti Karayan Jordan. (2Ar 10:32-34) Ket gapu ta inaramid ni Jehoacaz ti dakes kadagiti mata ni Jehova, impalubos ti Dios nga agtultuloy nga irurumen ni Hazael ti Israel iti amin nga al-aldaw ni Jehoacaz, agingga a napabassitna ti buyot ni Jehoacaz a pakigubat nga immabut laengen iti 50 a kumakabalio, 10 a karuahe, ken 10,000 a magmagna a soldado. Idi agangay, sinapul ni Jehoacaz ti anamong ni Jehova, ket gapu iti tulag kada Abraham, Isaac, ken Jacob, saan nga impalubos ni Jehova a ti Siria naan-anay a talipuposenna ti Israel. (2Ar 13:2-7, 22, 23) Idi natay ni Jehoacaz naitabon idiay Samaria ket ni Jehoas nga anakna ti nangsuno kenkuana iti trono.​—2Ar 13:8, 9; 2Cr 25:17.

Adda dagiti patarus, kasta met ti Masoretiko a teksto, a Joacaz ti ilanadda a nagan iti 2 Ar-ari 14:1.​—Kitaenyo ti JOACAZ Num. 1.

3. Anak ni Josias ken simmuno kenkuana kas ari ti Juda. Hamutal ti nagan ti inana. (2Ar 23:31) Sigun iti sumagmamano a manuskrito, isu ket inawagan da Esdras ken Jeremias iti Sallum, a kunaen ti dadduma a mabalin a dayta ti naganna sakbay a nagtugaw iti trono. (1Cr 3:15; Jer 22:11) Kalpasan ti ipapatay ni amana iti im-ima ni Faraon Necoh ti Egipto, nalawag a ni Jehoacaz (nupay saan nga isu ti kalakayan kadagiti sibibiag nga annak ni Josias) ti pinili dagiti umili kas suno iti trono. (2Ar 23:29, 30) Iti 2 Cronicas 36:2, a nangdakamat iti daytoy met laeng a pasamak, inusar ti dadduma a patarus (AS, AT, JP, Ro) ti napaababa a porma a Joacaz maipaay iti Jehoacaz.​—Kitaenyo ti JOACAZ Num. 3.

Duapulo ket tallo ti tawen ni Jehoacaz idi nagbalin nga ari, ket nakadakdakes ti panagturayna iti tallo a bulan idi nasapa a paset ti tawen 628 K.K.P., agingga nga imbalud ni Faraon idiay Ribla. Idi agangay naipan idiay Egipto, a sadiay a natay bayat a kautibo, kas iti impadto ni mammadto Jeremias.​—2Ar 23:31-34; Jer 22:10-12.