PALGAAK, PALTIING, PANNAKAIPANAYAG

Ti Griego a sao (a·po·kaʹly·psis) a naipatarus kadagita a sasao ipasimudaagna ti “panangilukais” wenno “panangibutaktak” ken masansan a maar-aramat mainaig kadagiti pannakaipalgak ti naespirituan a bambanag wenno ti pagayatan ken pangpanggep ti Dios. (Lu 2:32; 1Co 14:6, 26; 2Co 12:1, 7; Ga 1:12; 2:2; Efe 1:17; Apo 1:1; Int) Posible ti kakasta a pannakaipalgak gapu iti panagtignay ti espiritu ti Dios. Maipapan iti pannakaipalgak ti “sagrado a palimed,” insurat ni apostol Pablo: “Iti sabsabali a kaputotan saan a naipakaammo daytoy a palimed iti annak ti tattao a kas ti pannakaipalgakna ita kadagiti nasantuan nga apostolna ken kadagiti mammadto babaen ti espiritu, awan sabali, tapno dagiti tattao iti nasnasion agbalinda a kadua a makipagtawid ken pada a kamkameng iti bagi ken makiraman kadatayo iti kari a maikaykaysa ken Kristo Jesus babaen ti naimbag a damag.”​—Efe 3:1-6; Ro 16:25.

Sibibileg a patalgedan ti libro ti Aramid a daytoy a pannakaipalgak ti sagrado a palimed ket bunga ti panagtignay ti espiritu ti Dios. Nangasaba da Pedro, Pablo, ken Bernabe kadagiti di Judio gapu iti panangiwanwan ti espiritu. Dagiti di Judio a mamati, “tattao iti nasnasion,” immawatda iti nasantuan nga espiritu nupay saanda a nakugit, iti kasta nagbalinda nga ili maipaay iti nagan ti Dios. (Ara 10:9-48; 13:2-4) Impadto daytoy ni Amos babaen ti pannakapaltiing, ket idi umuna a siglo K.P., nagbalin a nabatad ti kaitungpalan ti padtona babaen ti panagtignay ti espiritu ti Dios.​—Ara 15:7-20; idiligyo ti Am 9:11, 12, LXX.

Dakamaten met ti Biblia ti “pannakaipanayag ti nalinteg a panangukom ti Dios” (Ro 2:5), ti “pannakaipanayag ti annak ti Dios” (Ro 8:19), ken ti “pannakaipanayag ni Jesu-Kristo” ken “ti dayagna.” (1Pe 1:13; 4:13) Ti panangusig iti konteksto ken kadagiti nainaig a teksto tumulong iti panangammo no kaano a mapasamak ti kakasta a pannakaipalgak, wenno pannakaipanayag. Kada mapasamak ti kasta a pannakaipalgak, wenno pannakaipanayag, tiempo dayta ti panangipaay kadagiti piho a gunggona ken bembendision kadagiti nalinteg a tattao wenno tiempo ti panangyeg iti pannakadadael kadagidiay nadangkes.

Pannakaipanayag Dagiti Annak ti Dios. Iti suratna kadagiti taga Roma, impatuldo ni apostol Pablo a dagiti “annak” ti Dios ket isuda dagidiay immawat iti espiritu ti pannakaampon. Yantangay makipagtawidda ken Kristo, dagitoy nga annak ti Dios ket maipadayagto. (Ro 8:14-18) Balbaliwanto ni Apo Jesu-Kristo ti langa ti naipababa a bagida tapno mayannurot iti nadayag a bagina (Fil 3:20, 21), ket makipagturaydanto kenkuana kas ar-ari. (2Ti 2:12) Gapuna ti tiempo a tuktukoyen ti “pannakaipanayag ti annak ti Dios” ket inton nakabatbataden a pudno a naipadayagda ken makipagturturaydan ken Kristo Jesus. Ti dayag a maipanayagto kadakuada ket naindaklan unay ta pagbalinennanto a kasla awan dagiti amin a naglabas a panagsagabada ditoy daga. (Ro 8:18, 19) Daytoy a pannakaipanayag ket nabuyogan kadagiti naindaklan a bendision, ta isurat ni apostol Pablo: “Ti mismo a sangaparsuaan met mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios.”​—Ro 8:21.

Pannakaipanayag ti Nalinteg a Panangukom ti Dios. Iti Roma 2:5 “ti pannakaipanayag ti nalinteg a panangukom ti Dios” ket nainaig iti ‘aldaw ti pungtot ti Dios.’ Gapuna, maipanayag ti nalinteg a panangukom ti Dios inton ‘supapakanna ti tunggal maysa sigun iti ar-aramidna,’ agnanayon a biag kadagidiay nagib-ibtur iti panagaramid iti naimbag ken pannakadadael kadagidiay nagtulnog iti kinakillo.​—Ro 2:6-8.

Pannakaipanayag ni Jesu-Kristo. Ti “pannakaipanayag ni Jesu-Kristo” ken ti pannakaipanayag “ti dayagna” ket tiempo a pananggunggona kadagiti matalek a pasurotna ken panangipakat iti pammales kadagiti di nadiosan. Ngarud, isu maipalgak kas nadayag nga Ari, a maipaayan iti pannakabalin a manggunggona ken mangdusa. Ipakita ti Kasuratan a dagiti napulotan-espiritu a Kristiano a simamatalek a nagibtur iti panagsagaba ‘agrag-odanto . . . iti napalalo’ bayat ti pannakaipanayag ti dayag ni Kristo. (1Pe 4:13) Ti nasubok a kualidad ti pammatida masarakanto a pakaigapuan ti pannakaidayaw ken dayag ken dayaw inton maipanayag ni Jesu-Kristo, ket umawatto dagitoy a Kristiano iti di kaikarian a kinamanangngaasi. (1Pe 1:7, 13) Iti sabali a bangir, dagidiay saan a makaammo iti Dios ken saan nga agtulnog iti naimbag a damag maipapan ken Apo Jesus madadaeldanto iti agnanayon, a pakapabang-aranto dagidiay pinarparigatda.​—2Te 1:6-10.