ANGIN

Ti Hebreo a sao a ruʹach, masansan a maipatpatarus nga “espiritu,” mabalin a tumukoy met iti angin nga aggargaraw. (Ec 1:6) Ti dadduma pay a Hebreo a termino ken sasao mabalin a maipatarus a “bagyo nga angin” (Os 8:7), “nadawel a bagyo,” “agal-alipuno a nadawel a bagyo” (Jer 25:32; 23:19), “nadawel unay nga angin,” ken “allawig” (Sal 148:8; 2Ar 2:11). Nupay iti Juan 3:8 ti pneuʹma (gagangay a naipatarus nga “espiritu”) kaipapananna ti “angin,” ti Griego a termino nga aʹne·mos ti ad-adda a masansan a naar-aramat a pangtukoy iti angin. (Mt 7:25, 27; 11:7; Jn 6:18) Ti “napalayupoy a paset [Heb., ruʹach] ti aldaw” nalawag a tumukoy kadagiti oras ti naladaw a paset ti malem sakbay a mismo ti ilelennek ti init, no dagiti makapabang-ar a nalamiis a puyupoy gagangay a tumaud iti rehion a maipagarup nga ayan idi ti minuyongan ti Eden.​—Ge 3:8; kitaenyo ti ESPIRITU.

Ni Jehova a Dios ti Namarsua iti angin. (Am 4:13) Nupay saan a literal nga adda iti dayta (1Ar 19:11; idiligyo ti Job 38:1; 40:6; Sal 104:3), ti Dios kabaelanna a medmedan ti angin ken usaren a mangibanag iti pangpanggepna, kas idi inaramatna dayta iti panamagati iti dandanum ti Layus. (Ge 8:1; Ex 14:21; Nu 11:31; Sal 78:26; 107:25, 29; 135:7; 147:18; Jer 10:13; Jon 1:4) Ti Anakna, idi adda ditoy daga, nangiparangarang met iti pannakabalin a mangmedmed kadagiti angin, a pinagtalnana ida. (Mt 8:23-27; 14:24-32; Mr 4:36-41; 6:48, 51; Lu 8:22-25) Nalawag a babaen laeng iti panangipalubos ni Jehova, nabaelan ni Satanas ti mangpataud wenno mangituray iti “dakkel nga angin” a nangpapatay iti annak ni Job.​—Job 1:11, 12, 18, 19.

Gagangay a napanaganan dagiti angin sigun iti naggapuanda a turong, kas pagarigan, ti “wayaway nga angin” nga agpuyupoy nga agpalaud manipud iti daya. (Ex 10:13, 19; Sal 78:26; Sol 4:16) Amin nga uppat a direksion​—amianan, abagatan, daya, ken laud​—ti saklawen ti tukoyen ti sasao nga “uppat nga angin” ti langit wenno daga. (Jer 49:36; Eze 37:9; Da 8:8; Mt 24:31) Iti Apocalipsis 7:1, “uppat nga anghel” ti nailadawan kas “agtaktakder iti uppat a suli ti daga, a siiirut a tengtenglenda ti uppat nga angin ti daga.” Babaen ti panagtakder dagiti anghel kadagiti “suli,” mabalin a pariwis a maibulosda dagiti angin manipud kadagiti dariwis a direksion, nga awan paset ti daga ti makalisi iti makadadael a panagpuyupoy dagiti angin.

Nalamiis dagiti angin ti amianan (amian) ken mangyegda iti napipigsa a tudo. (Job 37:9; Pr 25:23) Ti angin nga aggapu iti abagatan (abagat) ket agpuyupoy kadagiti disso ti napudot a desierto nga agturong iti Palestina isu a makapataud iti nakaro a pudot (Lu 12:55); nalabit dagiti bagyo nga angin agtaudda met iti abagatan. (Isa 21:1; Zac 9:14) Iti kalgaw, ti angin nga aggapu iti daya (wayaway nga angin), iti panagturongna iti Egipto ken Palestina, lumasat kadagiti disso ti nakalawlawa a desierto ket ngarud napudot ken namaga, a kesseten wenno ganguenna ti mulmula. (Ge 41:6, 23, 27; Eze 17:7-10; idiligyo ti Os 13:15; Jon 4:8.) Bayat ti panagtutudo, awit ti angin nga aggapu iti laud (pangagdan nga angin) ti alnaab nga agturong iti Palestina manipud Baybay Mediteraneo ket mangyegda iti tudo iti daga. (1Ar 18:42-45) No dagiti agpalpaliiw sadiay makakitada iti ulep nga aggapu iti laud, mainanamada nga adda bagyo. (Lu 12:54) Iti namaga a kalgaw, ad-adda a makaay-ayo ti paniempo gapu iti inaldaw a puyupoy ti angin manipud Mediteraneo.​—Kitaenyo ti EUROAQUILO; ULEP.

Piguratibo nga Usar. No kasano kapartak a dumteng ti angin kasta met laeng ti kapartakna nga agpukaw, isu a mayanatup nga iladawanna ti kinaababa ti biag ti tao. (Job 7:7) Yantangay awanan iti solido a sangkap, ti angin ket mabalin a tumukoy iti barengbareng a pannakaammo ken panagbannog, iti ubbaw a sasao ken namnama (Job 15:1, 2; 16:3; Ec 5:16; Os 12:1), kasta met iti awan mamaayna. (Isa 26:18; 41:29; Jer 5:13) No kasano a ti ubbaw nga ar-aramid manungpal iti kinabarengbareng, ti panangsurot kadakuada kasla “panangkamkamat iti angin.” (Ec 1:14; 2:11) Ket ti tao a mangyeg iti pannakailaksid iti balayna ‘agtagikua iti angin.’ Awan ti aniaman a maganabna a makagunggona wenno pudpudno a napateg.​—Pr 11:29.

Dagiti angin agiwarawara ken agipallayogda iti bambanag, ket ngarud ti ‘pannakaiwaris iti tunggal angin’ wenno ‘pannakabingbingay iti uppat nga angin’ ipasimudaagna ti naan-anay a pannakawarawara wenno pannakabingbingay. (Jer 49:36; Eze 5:10; 12:14; 17:21; Da 11:4) Kas iti barko nga ipallapallayog dagiti angin nga awan masnup a turongenna, dagiti Kristiano a saan a nataengan iti naespirituan ket ‘mayallaalla ditoy ken idiay ti tunggal angin ti sursuro babaen ti panangallilaw dagiti tattao, babaen ti kinasikap iti panangparnuay iti biddut.’​—Efe 4:13, 14.