KIMAH A KONSTELASION

Daytoy a termino naaramat iti Job 9:9; 38:31; ken Amos 5:8 a tumukoy iti maysa a nailangitan a konstelasion. Gagangay a maibilbilang a tumukoy daytoy iti Pleiades, maysa a grupo dagiti bituen a buklen ti pito a dadakkel a bituen ken dadduma pay a babbabassit a bituen, a napalikmutan iti ulep a gas ken tapok ken agarup 380 a tawen a daliasaten ti lawag ti kaadayona manipud iti init. Iti Job 38:31, ni Jehova sinaludsodanna ni Job no kabaelanna nga ‘igalut a siiirut dagiti reppet ti Kimah a konstelasion,’ ket ti sumagmamano inaigda daytoy iti kinapusek ti rimmuok ti Pleiades, ti rimmuok dagiti bituen a dakkel posibilidadna a makita ti mismo a mata. Nupay saan a masinunuo ti pakabigbigan ti mismo a konstelasion a matuktukoy, nabatad a ti nayimtuod a saludsod ket kayatna a sawen a ti kadi tao laeng marimmuongna ti grupo dagiti bituen tapno mabukel ti maysa a permanente a konstelasion. Ngarud, babaen itoy a saludsod, ni Jehova impaawatna ken Job ti kinababa ti tao no idilig iti Soberano iti Uniberso.