AGSILSILNAG

Mangiladawan nga awag a nayaplikar iti “ari ti Babilonia.” (Isa 14:4, 12) Ti Hebreo nga ebkas a kasta ti pannakaipatarusna (NW, Ro, Yg) ket nagtaud iti sao a kaipapananna ti “agsilnag.” (Job 29:3) Ti patarus a “Lucifer” (KJ, Da) ket naadaw manipud Latin a Vulgate.

Ti “agsilsilnag” nailadawan kas agkunkuna iti pusona: “Iti ngatuen dagiti bituen ti Dios ingatokto ti tronok, ket agtugawakto iti rabaw ti bantay ti gimong.” (Isa 14:13) Ti pammaneknek iti Biblia ipatuldona ti Bantay Sion kas ti “bantay ti gimong.” (Kitaenyo ti BANTAY TI GIMONG.) Gapuna, yantangay dagiti bituen mabalin a tukoyenda ti ar-ari (Nu 24:17; Apo 22:16), “dagiti bituen ti Dios” isuda la ketdi ti ar-ari iti Davidiko a linia a nagturay manipud Bantay Sion. Ti “ari ti Babilonia” (ti dinastia ti ar-ari ti Babilonia), a nangyanninaw iti kababalin ni Satanas a dios daytoy a sistema ti bambanag, impasimudaagna ti ambisionna a mangitan-ok iti tronona “iti ngatuen dagiti bituen ti Dios” babaen ti panangtarigagayna a mamagbalin iti ar-ari iti linia ni David kas basbasalio laeng ken mangikkat kadakuada iti trono kamaudiananna. Kas bitbituen a mangipaay iti lawag, ti “ari ti Babilonia” nagsilnag a siraraniag iti kadaanan a lubong ken mabalin a maawagan “agsilsilnag.”