URIA

[Silawko ni Jehova].

1. Maysa a padi bayat ti panagturay ni Ari Acaz ti Juda (761-746 K.K.P.). Idi napan ni Acaz idiay Damasco tapno mangted iti impuesto ken Tiglat-pileser III, impatulodna ken Uria ti disenio ken pagtuladan ti dakkel nga altar a nakitana sadiay ket imbagana kenkuana a mangbangon iti kaasping dayta, nga idi agangay imbilinna ken Uria nga usarenna dayta imbes a ti altar ni Jehova. Nagtungpal ni Uria. (2Ar 16:8-16) Nasaksian met ni Uria (Urias) ti pannakaaramid ti maysa a surat ni Isaias. (Isa 8:1, 2) Maipagarup nga isu ket nangato a padi nupay saan a nadakamat a kasta, gapu iti kinapategna ken iti kaawan ti kasta a titulo ti asinoman a tao iti daydi a tiempo.

2. Maysa a mammadto ni Jehova, anak ni Semaias a taga Kiriat-jearim. Bayat ti panagturay ni Jehoiaquim, nagipadto ni Uria maibusor iti Juda ken Jerusalem kas iti inaramid ni Jeremias. Nupay kasta, idi naammuan ni Uria nga isu ket kayat a papatayen ni Jehoiaquim, nagkamang idiay Egipto, ngem naisubli ken napapatay sa naipuruak ti bangkayna iti gagangay a pagitaneman.​—Jer 26:20-23.

3. Anak ni Hacoz; maysa a padi a ti anakna a ni Meremot ket maysa kadagiti papadi a nangitalkan ni Esdras ti pannakaaywan ti balitok ken pirak ken dagiti basehas ti templo a naipan idiay Jerusalem. Idi agangay, timmulong ti anak ni Uria a ni Meremot iti pannakatarimaan iti pader ti Jerusalem.​—Esd 8:33; Ne 3:4, 21.