URIAS

[Silawko ni Jehova].

1. Ti Heteo nga asawa ni Bat-seba. Maysa ni Urias kadagiti ganggannaet a mannakigubat iti buyot ni David. (2Sm 23:39; 1Cr 11:41) Ti sasao, kababalin, pannakiasawa ni Urias iti maysa a babai a Judio, ken ti panagnaedna idiay Jerusalem iti asideg ti palasio ti ari ket mangipasimudaag nga inabrasana ti panagdaydayaw ken Jehova a Dios kas nakugit a proselita.​—2Sm 11:3, 6-11.

Bayat a makidangdangadang ni Urias kadagiti Ammonita idiay Rabba, nakikamalala ni David ken Bat-seba nga asawa ni Urias. Saan a pulos naammuan ni Urias daytoy nga inaramid ni David. Kalpasan dayta, nagbaon ni David ket imbilinna a mapan ni Urias idiay Jerusalem, sa nagimtuod maipapan iti kasasaad ti gubat ken pinagawidna iti pagtaenganna tapno agparang a putot ni Urias ti sikog ni Bat-seba. Nupay kasta, nagkedked ni Urias nga agawid agsipud ta ti buyot ket adda iti paggugubatan. (De 23:9-11; idiligyo ti 1Sm 21:5.) Uray idi binartek ni David, nagkedked latta a maturog iti pagtaenganna. (2Sm 11:1-13) Kalpasanna, nanayonan manen ti basol ni David maibusor ken Urias, ta pinagsubli ni David iti paggugubatan ket imbilinna nga ipamuspusan ni Joab ti pannakapapatay ni Urias iti bakal.​—2Sm 11:14-26.

2. Maysa a padi a nangsaksi iti panangisurat ni Isaias iti nagan ti anakna a ni Maher-salal-has-baz iti maysa tapi. (Isa 8:1, 2) Iti dadduma a teksto, Uria ti naaramat a nagan imbes nga Urias.​—2Ar 16:10; kitaenyo ti URIA Num. 1.

3. Nalabit maysa a padi, a nagtakder iti makannawan ni Esdras idi binasana ti Linteg iti sanguanan dagiti nagsubli a destiero a naguummong iti Ruangan ti Danum idiay Jerusalem.​—Ne 8:1-4.