TALENTO

Ti kadakkelan kadagiti Hebreo a rukod ti dagsen ken ti gatad ti kuarta. (Ex 38:29; 2Sm 12:30; 1Ar 10:10; 2Ar 23:33; 1Cr 29:7; 2Cr 36:3; Esd 8:26) No kuentaen sigun iti katupagna a gatad nga 60 a mina wenno 3,000 a siklo (Ex 38:25, 26; kitaenyo ti MINA), agdagsen iti 34.2 kg ti maysa a talento (75.5 lb avdp; 91.75 lb t; 1101 oz t). Kadagiti agdama a gatad, ti maysa a talento a pirak mabalin a katupagna ti $6,606.00 ket ti maysa a talento a balitok $385,350.00.

Yantangay ti maysa a mina ket katupag ti 100 a Griego a drakma idi umuna a siglo K.P., ti maysa a talento nga 60 a mina agdagsen iti 20.4 kg (44.8 lb avdp; 54.5 lb t; 654 oz t), nalaglag-an ngem kadagidi tiempo ti Hebreo a Kasuratan. Maitunos iti dayta, kadagiti agdama a gatad, ti maysa a pirak a talento idi umuna a siglo aggatad iti $3,924.00, ket ti maysa a balitok a talento aggatad iti $228,900.00.

No pattapattaen sigun iti pagrukodan dagiti Griego, dagiti simboliko a bato ti uraro nga agdagsen iti agarup maysa a talento (20.4 kg; 44.8 lb), kas natukoy iti Apocalipsis 16:21, ket makadidigra a saplit ti itdenna.