Brooklyn Bethel—100 a Tawenen
NAKALLALAGIP ti tawen 1909 idiay New York City. Naluktan ti Rangtay ti Queensboro a mamagkamang iti ili ti Queens ken Manhattan. Naluktan met ti Rangtay ti Manhattan a mamagkamang iti Manhattan ken Brooklyn.
Ti Pagtaengan a Bethel 122-124 Columbia Heights
13-17 Hicks Street (1909-1918)
Nakallalagip met dayta a tawen para kadagiti Saksi ni Jehova. Kasakbayanna, ti posibilidad ti nasaknap a pannakaikasaba ti naimbag a damag ti Pagarian ti Dios ket nakita ni Charles Taze Russell a presidente idi ti Watch Tower Bible and Tract Society, ti legal a korporasion nga us-usaren dagiti Saksi ni Jehova. (Mateo 24:14) Para kenkuana, nagpateg nga addang no ti hedkuarter ti Sosiedad idiay Pittsburgh, Pennsylvania ket mayakar idiay Brooklyn, New York. Naisagana ti panagakar idi 1908, ket idi rugrugi ti 1909, nayakar met laengen dayta.
Apay a Mayakar Idiay Brooklyn?
Ammo dagidiay mangidadaulo iti trabaho a panangasaba idi a ti panagebanghelio babaen kadagiti sermon a maipablaak kadagiti diario ket epektibo a pangisaknap kadagiti kinapudno ti Biblia. Kinaagpaysuanna, idi 1908, dagiti linawas a naibasar-Biblia a sermon ni Russell ket maipabpablaaken iti 11 a diario nga 402,000 ti dagup ti mayim-imprenta a kopia dagita.
Dagiti sermon ni Russell a naipablaak kadagiti diario
Nupay kasta, insurat ni Russell: “Dagiti kakabsat a makaammo no kasano a dagiti artikulo ket pagraranudan dagiti periodiko . . . impanamnamada kadakami a no iti dakdakkel a siudad ti paggappuan dagiti linawas a sermon, posible nga iti intero nga Estados Unidos ti pakaipablaakan dagita; nga iti makatawen laeng, nalabit ginasut a diario ti regular a mangipablaakton kadagita.” Gapuna, tapno maisaknap ti trabaho a panangasaba, rinugianda ti agbirok iti kasayaatan a lugar.
18 Concord Street (1922-1927)
117 Adams Street (1927 agingga ita)
Apay nga idiay Brooklyn? Kinuna ni Russell: “Kalpasan nga inkararagmi, nagnunumuanmi amin a gapu ta ti Brooklyn, New York ket aduan iti umili . . . ken pagaammo kas ‘Ti Siudad Dagiti Relihion,’ dayta ti kasayaatan a sentro para iti trabaho a panagani.” Ipakita dagiti resulta a nainsiriban dayta a desision. Di nagbayag, 2,000 a diario ti mangipabpablaaken kadagiti sermon ni Russell.
Adda pay sabali a pagimbagan ti pannakapili ti New York. Idi 1909, naipasdek dagiti sanga nga opisina idiay Gran Britania, Germany, ken Australia, ken iti daddumanto pay. Gapuna, rumbeng laeng a ti hedkuarter ket masarakan iti siudad nga addaan iti puerto ken aduan met iti kalsada ken riles.
Apay a Naawagan iti Bethel?
Naipasdek ti immuna a hedkuarter ti Watch Tower Bible and Tract Society idi dekada ti 1880, idiay Allegheny (a paset itan ti Pittsburgh), Pennsylvania. Maawagan idi dayta iti Bible House. Idi 1896, adda 12 nga agtartrabaho iti dayta a pasilidad.
35 Myrtle Avenue (1920-1922)
Ngem idi 1909 a pannakayakar dayta idiay Brooklyn, ti baro a pagnaedan dagiti agtartrabaho ket naawagan iti Bethel.a Apay a Bethel? Ti lote ken pasdek a nagatang ti Watch Tower Society idiay 13-17 Hicks Street ket kukua idi ti nalatak a padi a ni Henry Ward Beecher. Pagaammo idi dayta kas Beecher Bethel. Nagatang met ti dati a pagnanaedan ni Beecher, a masarakan idiay 124 Columbia Heights. Kastoy ti impadamag ti Marso 1, 1909 a ruar Ti Pagwanawanan: “Talaga a naisangsangayan ti pannakagatangtayo iti daan a Beecher Bethel ken uray ti naiparna a pannakagatangtayo iti dati a pagnanaedanna. . . . Ti baro a pagtaengan ket awagantayo iti ‘Bethel.’ Ti met baro nga opisina ken auditorium ket awagantayo iti ‘Brooklyn Tabernacle.’ Dagitan ti maisukat iti termino a ‘Bible House.’”
Ita, maaw-awagan pay laeng iti Bethel dagiti napalawa a pasilidad idiay Brooklyn, agraman iti Wallkill, ken Patterson, New York State, kasta met dagiti pagnaedan, pagimprentaan, ken opisina. Kinapudnona, addan pagtaengan a Bethel iti 113 a pagilian iti intero a lubong. Nasurok a 19,000 a ministro ti agtartrabaho kadagita a pagtaengan a tumultulong iti pannakaiwaras ti impormasion manipud iti Biblia.
Ti printery idiay Wallkill
Naimpusuan a Maawiska nga Agpasiar
Naidedikar dagiti pasilidad idi Enero 31, 1909. Napili met ti Lunes, Setiembre 6, 1909 kas aldaw a panangpasangbay kadagiti agpasiar iti Bethel. Ginasut nga Estudiante ti Biblia, kas awag idi kadagiti Saksi ni Jehova, ti nagpasiar iti pasilidad. Kagapgapu ti adu kadakuada iti Nakristianuan a kombension a naangay idiay Saratoga Springs, agarup 320 a kilometro iti amianan ti New York City. Ni Charles Taze Russell a mismo ti nangpasangbay ken nangkablaaw kadakuada.b
Patterson Educational Center
Mapaspasangbay pay laeng dagiti agpasiar iti Bethel. Kinapudnona, tinawen a nasurok nga 40,000 ti agpaspasiar kadagiti pasilidad ti Brooklyn. Agtultuloy ti napateg nga akem ti Brooklyn Bethel iti idudur-as ti bambanag a nainaig iti Pagarian ni Jehova, a pakabendisionan ti di mabilang a minilion a tattao.
a Ti Hebreo a sao a “Bethel” kaipapananna ti “Balay ti Dios.” Iti Biblia, ti Bethel ket maysa a nalatak a siudad iti Israel. Sumaruno dayta iti siudad ti Jerusalem no iti kasansan ti pannakadakamatna.
b Para iti ad-adu pay nga impormasion iti daytoy a pasamak, kitaem ti libro a Dagiti Saksi ni Jehova—Manangiwaragawag iti Pagarian ti Dios, panid 718-723, nga impablaak dagiti Saksi ni Jehova.