Ammoyo Kadi?
Kasano a dagiti ladrilio (bricks) a nasarakan kadagiti rebba ti nagkauna a Babilonia ken ti naammuanda a pamay-an a pannakaaramid dagita ti mangpaneknek nga umiso ti Biblia?
ITI ayan ti nagkauna a Babilonia, nagadu a ladrilio a naluto kadagiti urno ti nakali dagiti arkeologo. Maus-usar idi dagita a pagbangon iti siudad. Sigun iti arkeologo a ni Robert Koldewey, dagita a ladrilio ket naluto kadagiti urno iti ‘ruar ti siudad, a sadiay a nasayaat ti klase ti pila ken adu ti pagsungrod.’
Adda dagiti nagkauna a rekord a nasarakan iti Babilonia. Mabasa kadagita nga us-usaren met dagiti opisial sadiay dagiti urnoda para iti dakdakes a panggep. Imbaga ni Paul-Alain Beaulieu, a propesor ti Assyriology iti University of Toronto: “Naisurat iti sumagmamano a reperensia manipud iti Babilonia ti imbilin ti ari a pannakapuor dagiti tattao kas dusa iti krimen a rebelion ken saan a panangrespeto kadagiti didiosen ti Babilonia.” Mabasa iti maysa a dokumento idi kaaldawan ni Ari Nabucodonosor daytoy nga impaulogna a sentensia: “Dadaelenyo ida, puoranyo ida, itunoyo ida, . . . iti urno a paglutuan . . . pagasukenyo ida, papatayenyo ida iti nakapudpudot nga apuy.”
Ipalagip daytoy kadagiti agbasbasa iti Biblia dagiti pasamak a nairekord iti Daniel kapitulo 3. Sigun iti dayta, nagpaaramid ni Ari Nabucodonosor iti nagdakkel nga imahen a balitok iti tanap ti Dura—iti ruar ti siudad ti Babilonia. Saan a nagruknoy iti dayta nga imahen ti tallo nga agtutubo a Hebreo a da Sidrak, Mesak, ken Abednego. Gapu iti dayta, nakapungtot ni Nabucodonosor. Imbilinna a mapapudot ti urno iti “mamimpito ngem iti gagangay,” sa impaipalladawna ti tallo a lallaki “iti gumilgil-ayab nga urno.” Adda mannakabalin nga anghel a nangisalakan kadakuada iti sigurado nga ipapatayda.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Ladrilio a naluto iti urno a nakasurat iti dayta ti nagan ni Nabucodonosor
Paneknekan met dagiti ladrilio iti Babilonia dagiti nairekord iti Biblia. Naisurat iti adu kadagita dagiti sasao a mangpadayaw iti ari. Mabasa iti maysa kadagita: “Nabucodonosor, Ari ti Babilonia . . . Ti palasio nga imbangonko kas Natan-ok nga Agturay . . . Agnanayon koma nga agturay iti dayta dagiti kaputotak.” Dandani kapada dayta ti mabasa iti Daniel 4:30, a sadiay nga impangas ni Nabucodonosor: “Saan kadi a daytoy ti Babilonia a Dakkel nga imbangonko a mismo kas balay ti ari babaen ti bukodko a pigsa ken pannakabalin tapno maipakitak ti dayag ken kinatan-okko?”