Sungbatan Ngata ti Dios Dagiti Kararagko?
Sungbat ti Biblia
Wen, sungbatanna. Ipakita ti Biblia ken dagiti kapadasan iti pudno a biag a sungbatan ti Dios dagiti kararag. Kuna ti Biblia: “Ti tarigagay dagidiay agbuteng kenkuana aramidennanto, ken ti panagpatulongda denggennanto, ket isalakannanto ida.” (Salmo 145:19) Ngem agpannuray kenka no sungbatan ti Dios wenno saan dagiti kararagmo.
Ti napateg iti Dios
Agkararagka iti Dios, saan a ken ni Jesus, Maria, dagiti santo, anghel, wenno imahen. Ni laeng Jehova a Dios ti “Managdengngeg iti kararag.”—Salmo 65:2.
Agkararagka maitunos iti pagayatan ti Dios, wenno kadagiti kalikagumanna, kas mabasa iti Biblia.—1 Juan 5:14.
Agkararagka babaen iti nagan ni Jesus, a bigbigem ti autoridadna. “Awan ti umay iti Ama malaksid no baeten kaniak,” kuna ni Jesus.—Juan 14:6.
Agkararagka buyogen ti pammati, a dumawatka iti ad-adu pay a pammati no kasapulan.—Mateo 21:22; Lucas 17:5.
Ipakitam ti kinapakumbaba ken kinapasnek. Kuna ti Biblia: “Ni Jehova nangato, ket kaskasdi a makitana daydiay napakumbaba.”—Salmo 138:6.
Agkararagka nga agpatpatuloy. Kuna ni Jesus: “Itultuloyyo ti agdawat, ket maitedto dayta kadakayo.”—Lucas 11:9.
Ti saan a napateg iti Dios
Ti puli wenno nasionalidadmo. “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”—Aramid 10:34, 35.
Ti posision wenno posturam nga agkararag. Mabalinmo ti agkararag iti Dios a situtugaw, sidudumog, sipaparintumeng, wenno sitatakder.—1 Cronicas 17:16; Nehemias 8:6; Daniel 6:10; Marcos 11:25.
No napigsa wenno naulimek ti kararagmo. Sungbatan ti Dios uray dagiti naulimek a kararag a saan nga ammo dagiti dadduma.—Nehemias 2:1-6.
Nadagsen man wenno saan dagiti pakaseknam. Parparegtaennaka ti Dios nga ‘iyallatiwmo kenkuana ti isuamin a pakaringgoram, agsipud ta isu maseknan kenka.’—1 Pedro 5:7.