Matiu

25 “A dẹ sabọ re Agbejele nọnsi Osẹnobulua* rẹ khọkhọ imanmhẹn* igbe ne muno orukpa nọnsele mhọnlẹn yẹ dagbare dọ bu okpea nọn guanọ nọn re amhẹn.* 2 Isẹn bhi ẹwẹ ele da ha wanlan, isẹn nekẹle bha ha wanlan. 3 Ene bha ha wanlan da muno orukpa nọnsele mhọn, ọkpakinọn, ele bha sa abhili rẹkhan egbe. 4 Sokpan, ene wanlan da sa abhili ọbhi ukoko mun rẹkhan orukpa nọnsele. 5 Ẹghe nan ki rẹ miẹn ghe, ọne okpea nọn ha rẹ okhuo bha kẹ vare, owe da ha sun ele rebhe. Ele da wẹ fia. 6 Bhi ọsasọn ogiziẹn ele da họn ukpuru nọn yọle; ‘Ọne okpea nọn khian la re okhuo vare o! Ibha dagbare bu ọle re o.’ 7 Ẹghenin, ene imanmhẹn rebhe da kpanọ, yẹ hẹnhẹn orukpa nọnsele. 8 Ene imanmhẹn ne iwanlan da taman ene wanlan yọle, ‘Ibha sa bhi abhili nọnsẹbha nin imhan, ranmhude, orukpa nọnsẹmhan khian la wẹ a.’ 9 Ene imanmhẹn ne wanlan da wanniẹn ele yọle: ‘Asabọmiẹn ọnan ida sẹ imhan bi ibha ko gha, ibha wo ha bu ene khiẹn ọlẹn nian, nin ibha dọ dẹ ọsẹbha.’ 10 Ẹghe nin ele ki rẹ ha khian dọ dẹ ọne abhili, ọne okpea nọn ho nọn re okhuo da vae. Ene imanmhẹn ne muegbe da rẹkhan ọlẹn nabhi eji a da lu ọne iluemhin ọsi ibọdọ bi ireokhuo. Ele ki nabhọ fo, a da khue ọne odẹ. 11 Ene imanmhẹn nekẹle ki vae, ele da ha yọle, ‘Ọwanlẹn, Ọwanlẹn, tuje odẹ a nin imhan!’ 12 Ọle da wanniẹn ele yọle, ‘Nin imẹn wo ta ẹmhọanta man ibha, imẹn bha lẹn ibha.’

13 “Bhiriọ, ibha ha babegbe, ranmhude, ibha bha lẹn ọne ukpẹdẹ la ọne uriagogo.

14 “Inian Agbejele nọnsi Osẹnobulua diabe okpea nọn ho nọn ha khian agbaẹbho ọbhebhe. Ọle kuẹ kpanọ, ọle da datie eguọmhandia nesọle, yẹ mun emhin nesọle ele bhi obọ. 15 Ọle da muno talẹnt* isẹn nin ọguọmhandia nin ọhẹnhẹn, ọle da muno talẹnt eva nin ọguọmhandia nọnzi eva, ọle da mun talẹnt ọkpa nin ọguọmhandia nọnzi ea, beji ahu ọsi ọdeọde gbele. Ọle da ki kpanọ. 16 Ẹjẹje, ọne a mun talẹnt isẹn nan, da kpanọ dọ re ọle do ẹki, yẹ miẹn talẹnt isẹn bhi elele. 17 Iriọ yẹ nọn rẹji ọne a mun talẹnt eva nan. Ọle da yẹ miẹn talẹnt eva bhi elele. 18 Ọkpakinọn, ọne ọguọmhandia nan mun talẹnt ọkpa nan, da dọ gbe igho* ọsi ebeanlẹn ọlẹn wotọ.

19 “Ọkizẹbue, ebeanlẹn ọsi ene ọguọmhandia da vae dọ nọọn ele ẹmhọn igho nọnsọle. 20 Bhiriọ, ọne a mun talẹnt isẹn nan, da mun talẹnt isẹn ebhebhe rẹkhan egbe vae, yẹ yọle, ‘Ebeanlẹn imẹn, talẹnt isẹn uwẹ mun nin imẹn; ghọle imẹn miẹn talẹnt isẹn ebhebhe bhi elele.’ 21 Ebeanlẹn ọlẹn da taman ọlẹn yọle: ‘Obulu, obulu, ọguọmhandia nọn mhẹn nan gbaẹkẹ ọle! Uwẹ wo re obhi emhin khere nan re nin uwẹ rẹ khian nọnsẹn. Imẹn dẹ mun emhin ne bunbun uwẹ bhi obọ. Deba ebeanlẹn nọnsẹ ha ghọnghọn.’ 22 Ọguọmhandia nan mun talẹnt eva nan da yẹ vae dọ yọle, ‘Ebeanlẹn imẹn, talẹnt eva uwẹ mun nin imẹn; ghọle, imẹn miẹn talẹnt eva bhi elele.’ 23 Ebeanlẹn ọlẹn da taman ọlẹn yọle: ‘Obulu, obulu, ọguọmhandia nọn mhẹn nan gbaẹkẹ ọle! Uwẹ wo re obhi emhin khere nan re nin uwẹ khian nọnsẹn. Imẹn dẹ mun emhin ne bunbun uwẹ bhi obọ. Deba ebeanlẹn nọnsẹ ha ghọnghọn.’

24 “Bhi ọkike ọle, ọne ọguọmhandia nan mun talẹnt ọkpa nan da vae. Ọ da yọle: ‘Ebeanlẹn imẹn, imẹn lẹnmhin ghe, ẹmhọn ẹn kaka gbe, ebi uwẹ bha kọ, ọle uwẹ ho nin uwẹ ha rọ. Sẹyẹ, ebale nin uwẹ bha miẹnsọn ọi, ọle uwẹ guanọ nin uwẹ ha koko. 25 Ọnan zẹle nin ofẹn da ha mun imẹn, nin imẹn da dọ gbe ọne talẹnt wotọ. Ghọle, miẹn igho nọnsẹ.’ 26 Ebeanlẹn ọlẹn da ki wanniẹn ọlẹn yọle: ‘Ọguọmhandia nọn imhẹn nọn mhọn ọdinbhẹlo uwẹ khin. Beji a miẹn uwẹ yọle eji imẹn bha da kọ, ọle imẹn da rọ, sẹyẹ, ebale nin imẹn bha miẹnsọn ọi, ọle imẹn guanọ nin imẹn ha koko, 27 be ki zẹ nin uwẹ bha da mun igho* nọnsẹmhẹn ya bhi aza, beji a ha da miẹn ghe, imẹn ha ki vae, imẹn ki miẹn asun bhọ?

28 “‘Bhiriọ, ibha miẹn ọlẹn ọne talẹnt, ibha ha mun nin ọnọn mhọn talẹnt igbe. 29 Ranmhude, ọria nọn ka mhọnlẹn khẹ, a dẹ re ba ọle le, ọle ki kie manman ha mhọnlẹn. Sokpan, ọria nọn imhọnlẹn, a bhọ dẹ miẹn ọlẹn obhi emhin khere nin ọle rẹ ha mhọnlẹn. 30 Ibha mun ọne ọguọmhandia nọn imhẹn fiọbhi ebiuki bhi olele. Enin ọle ha da ha viẹ yẹ re akọn gbe akọn.’

31 “Ẹghe nin ọmọn nọnsi okpea ha rẹ re uyi vae, ọle bi ene ẹhi, ọle ki dotua bhi ojukhuo nọn khua. 32 Ene agbaẹbho rebhe ki sikoko bhi odalo ọle. Ọle ki waa ele diọbhi usun eva, beji ọsun-ohuan rẹ hannọn ihuan sibhi ẹwẹ ẹbhe re. 33 Ọle ki ne ene ihuan ọbhi obera nọnsọle, yẹ ne ene ẹbhe ọbhi obọ agobọ nọnsọle.

34 “Ẹghenin, ọne Ojie ki taman ene ribhi obera nọnsọle: ‘Ibha vae, ibha nin Aba imẹn nan erọnmhọn nan. Ibha dọ le ọne Agbejele bhi uku, Agbejele nan mhanmhan khẹ bha rẹ na bhi umunhẹn ọsi ọne agbọn nan ha vade. 35 Ranmhude, ẹghe nin ohanmhẹn rẹ ha gbe imẹn, ibha da re ebale nin imẹn le; ẹghe nin amẹn rẹ ha ghọn imẹn, ibha da sa amẹn nin imẹn wọn. Ẹghe nin imẹn rẹ ha yi ọriọbhe, ibha da miẹn imẹn ọbhi egbe; 36 ẹghe nin imẹn bha rẹ miẹn ukpọn yọ,* ibha da re ukpọn nin imẹn yọ. Ẹghe nin imẹn rẹ ha khọnmhọn, ibha da gbẹloghe imẹn. Ẹghe nin imẹn rẹ ha ribhi ighan, ibha da dọ fẹ imẹn ghe.’ 37 Ẹghenin, ene khiale ki nọọn ọlẹn yọle: ‘Ebeanlẹn imhan, ẹghela imhan rẹ kere ghe, ohanmhẹn gbe uwẹ nin imhan da re ebale nin uwẹ le, la amẹn ghọn uwẹ nin imhan da sa amẹn nin uwẹ wọn? 38 Ẹghela uwẹ rẹ ha yi ọriọbhe, nin imhan da miẹn uwẹ ọbhi egbe, la uwẹ bha miẹn ukpọn yọ, nin imhan da re ukpọn nin uwẹ yọ? 39 Ẹghela imhan rẹ kere ghe uwẹ khọnmhọn la uwẹ ribhi ighan, nin imhan da rẹnẹ ji uwẹ?’ 40 Ọne Ojie ki wanniẹn ele yọle, ‘Bhi ọsi ẹmhọanta, imẹn taman ibha ghe, beji a miẹn ghe, ibha lu ọle nin ọkpa bhi ene khere nẹ bhi ene ibhio imẹn nan, imẹn ibha lu ọle nan.’

41 “Ọle ki taman ene ribhi agobọ nọnsọle yọle: ‘Bha sibhi eji imẹn ye re, ibha nan fi ọle unun. Bha nabhi eranlẹn ọsi ẹdẹdẹmhẹndẹ, nan mhanmhan khẹ Ojuu bi ẹhi nesọle. 42 Ranmhude, ẹghe nin ohanmhẹn rẹ ha gbe imẹn, ibha bha re ebale nin imẹn le. Ẹghe nin amẹn rẹ ha ghọn imẹn, ibha bha sa amẹn nin imẹn wọn. 43 Ẹghe nin mẹn rẹ ha yi ọriọbhe, ibha bha miẹn imẹn ọbhi egbe; ẹghe nin imẹn bha rẹ miẹn ukpọn yọ, ibha bha re ukpọn nin imẹn yọ; ẹghe nin imẹn rẹ ha khọnmhọn bi ẹghe nin imẹn rẹ ha ribhi ighan, ibha bha gbẹloghe imẹn.’ 44 Ele ki yẹ nọọn ọlẹn yọle: ‘Ebeanlẹn imhan, ẹghela imhan rẹ kere ghe ohanmhẹn gbe uwẹ, la amẹn ghọn uwẹ, la uwẹ yi ọriọbhe, la uwẹ bha miẹn ukpọn yọ, la uwẹ khọnmhọn, la uwẹ ribhi ighan nin imhan bha da gaga uwẹ?’ 45 Ọle ki wanniẹn ele yọle: ‘Bhi ọsi ẹmhọanta, imẹn taman bha ghe, beji a miẹn ibha bha lu ọle nin ọkpa bhi ene khere nẹ bhi ene ibhio imẹn nan, ibha bha yẹ lu ọle nin imẹn.’ 46 Enan ki miẹn ugbekhuelo* ọsi ighegheghe. Bhi obọ nọnkẹle, ene khiale ki miẹn iẹnlẹn ọsi ighegheghe.”