Matiu

26 Jesu ki ta ene emhin nan rebhe fo, ọle da taman edibo nesọle yọle: 2 “Ibha lẹnmhin ghe ikpẹdẹ eva ki kẹre nan ha rẹ lu iluemhin ọsi Anagbera. Ẹghenin, a ki mun Ọmọn nọnsi okpea ọbhi obọ ọsi eria, nin ele gbe ọle a bhi okhun oran.”

3 Bhi ọne ẹghe nin, ene ohẹn ne khua bi ene ewanlẹn ọsi ene ẹbho da sikoko bhi ẹgodo ọsi ojohẹn natiọle Keafas. 4 Ele da kugbe siuman ebi ele ha rẹ re eku mun Jesu yẹ, yẹ gbe ọle a. 5 Ọkpakinọn, ele da ha yọle: “Imhan ida mun ọlẹn bhi ẹghe iluemhin, nin ẹbho hẹi zughu ijerebhe a.”

6 Ẹghe nin Jesu rẹ ha ribhi Bẹtani, bhi uwa nọnsi Saimọn nọn rẹ ha khọnmhọn emianmhẹn egbekẹn, 7 okhuo ọkpa nọn re ọgọ alabasta mhọn da bu ọle re. Abhii nọn ghanlẹn nọn manman vin-ohin, ọle ribhi ẹkẹ ọne ọgọ. Ọne okhuo da munhẹn ha biri ọle ọbhi uhọnmhọn ọsi Jesu bhi eji ọle da ha le ebale. 8 Edibo nesọle ki daghe ọnan, ẹkẹ da ha khọ ele. Ele da ha yọle: “Bezẹle nin ọne okhuo nan da riia ọne abhii nan an? 9 A ha rẹ khiẹn ọlẹn ọkpẹtẹkpẹ yẹ re ọne igho nin ene ibhioguele.” 10 Ranmhude Jesu lẹn ọnan, ọle da taman ele yọle: “Bezẹle nin ibha da ha guanọ ọne okhuo nan ẹmhọn? Emhin esili ọle lu da imẹn. 11 Ibha bi ene ibhioguele dẹ ko ha ribhi enan, ọkpakinọn, imẹn ida ha ribhi ẹwẹ ibha rẹ ha khian. 12 Ọne abhii nọn vin-ohin nan nin ọle sa imẹn bhi egbe, ọ rẹ ọle mun imẹn egbe khẹ ẹghe nan ha rẹ re imẹn tọ. 13 Bhi ọsi ẹmhọanta, imẹn taman ibha ghe, bhi eji ọ hi ki rẹ khin nan da tẹmhọn ọne ọta nọn mhẹn bhi otọ agbọn nan rebhe, a dẹ yẹ tẹmhọn ebi ọne okhuo nan lu, nan rẹ ha ye ọle re.”

14 Ọkpa bhi ẹwẹ etuegbe igbeva nesọle, natiọle Judas Iskarọt, da ki bu ene ohẹn ne khua. 15 Ọle da taman ele yọle: “Be ibha ha re nin imẹn, nin imẹn rẹ khiẹn ọle nin ibha?” Ele da yọle ele dẹ ne isiliva ọgban* nanlẹn. 16 Rẹ na bhi ọne ẹghe nin ha khian, ọle da ha guanọ isẹhoa nin ọle rẹ mun Jesu khiẹn.

17 Bhi ukpẹdẹ ọhẹnhẹn bhi Iluemhin Ọsi Ibrẹd Nọn Ihuẹ, edibo nesi Jesu da bu ọle re yẹ nọọn ọlen yọle: “Ejela uwẹ guanọ nin imhan mhanmhan khẹ uwẹ nin uwẹ da le ebale ọsi Anagbera?” 18 Ọle da taman ele yọle: “Bha nabhi Jerusalẹm, bha ha diọbhi isi ọne ọria nin. Ibha taman ọlẹn ghe ‘Ọne Ọman-emhin yọle: “Ẹghe nọnsẹmhẹn sire; imẹn dẹ deba edibo nesẹmhẹn lu Anagbera bhi uwa nọnsẹ.”’” 19 Bhiriọ, ene edibo da lu beji Jesu taman ele tee. Ele da muegbe ọbhi otọ khẹ ọne Anagbera.

20 Ọsemuan ki re, Jesu bi etuegbe igbeva nesọle da dotua nẹga itebu. 21 Ele ki ha le ebale, ọle da yọle: “Bhi ọsi ẹmhọanta imẹn taman ibha ghe, ọkpa bhi ẹwẹ ibha dẹ mun imẹn khiẹn.” 22 Ọnan da wo manman ba ele bhi egbe, bhiriọ, ọdeọde bhi ẹwẹ ele da ha nọọn ọlẹn yọle: “Ebeanlẹn imẹn, imẹn be nọn?” 23 Jesu da wanniẹn ele yọle: “Ọria nọn deba imẹn ha le ebale bhi ukpamanku ọkpa, ọle ọnọn ha mun imẹn khiẹn. 24 Gene gene, Ọmọn nọnsi okpea dẹ fi ibha ya, beji a rẹ gbẹn ọlẹn ọbhi otọ rẹji ọle. Ọkpakinọn, ọkhọbhegbe ọsi ọne ọria nọn ha mun Ọmọn nọnsi okpea khiẹn! Ọ ha rẹ mhẹn nẹ nanlẹn sade a bha biẹ ọle hiehie.” 25 Judas nọn ho nọn mun ọlẹn khiẹn da nọọn ọlẹn yọle: “Rabai, imẹn be nọn?” Jesu da wanniẹn ọlẹn yọle: “Uwẹ tobuwẹ tale fo.”

26 Beji ele sẹyẹ ha le ebale, Jesu da re ibrẹd yẹ nan erọnmhọn ọbhọ. Jesu ki nan erọnmhọn ọbhọ fo, ọle da khuẹnẹn ọlẹn an, yẹ ne nin edibo nesọle. Ọle da taman ele yọle: “Ibha miẹn, ibha le ọle, egbe nọnsẹmhẹn ọnan mundia nan.” 27 Sẹyẹ, ọle da mun ukpu anyọn. Ọle da nan erọnmhọn ọbhọ yẹ mun nin ele. Ọle da yọle: “Ibha rebhe wọn bhọ, 28 ranmhude ọ mundia nin ‘aranlẹn ọsi ọne akovẹn’ nan ha gbekua nin ẹbho ne bunbun, beji ele ha da miẹn urẹhunmhan bhi olukhọ nọnsele. 29 Ọkpakinọn, imẹn taman ibha ghe, imẹn iyẹ da wọn bhi ọne anyọn nan, nan re ikperan ivain lu, rẹ sẹbhi ukpẹdẹ nin imẹn ha deba ibha wọn anyọn ọsọgbọn bhi Agbejele ọsi Aba imẹn.” 30 Ele ki so illo* fo, ele da kpanọ ha khian Oke ọsi Oliv.

31 Jesu da ki taman ele yọle: “Ranmhude ebe ha sunu ji imẹn ọne ukpasọn nan, urẹọbhọ nọnsẹbha rebhe dẹ wẹghẹ a.* Ranmhude a gbẹn ọlẹn ọbhi otọ yọle: ‘Imẹn dẹ gbehẹ ọne ọsun-ohuan, ihuan nesọle ki zagha a.’ 32 Ọkpakinọn, a ha riọ imẹn kpanọ bhi uu fo, imẹn ki kalo nin ibha ha khian Galili.” 33 Pita da ki taman ọlẹn yọle: “Aharẹmiẹn urẹọbhọ ọsi enekẹle nan rebhe wẹghẹ a ranmhude ebe ha sunu ji uwẹ, a bha miẹn ebe ha re urẹọbhọ nọnsẹmhẹn wẹghẹ a!” 34 Jesu da ki taman ọlẹn yọle: “Bhi ọsi ẹmhọanta, imẹn taman uwẹ ghe, bhi ọne asọn nan, ọkuẹsẹ ọkpa viẹ, igba ea uwẹ ha yọle ghe uwẹ bha lẹn imẹn.” 35 Pita da taman ọlẹn yọle: “Aharẹmiẹn imẹn dẹ yu rẹkhan ẹn, imẹn ida tale ghe imẹn bha lẹn uwẹ.” Ene odibo nekẹle da yẹ ta iriọ.

36 Jesu bi edibo nesọle da vae bhi eji a tiọle Gẹtsimani. Ọle da taman edibo nesọle yọle: “Ibha dotua bhi enan, nin imẹn diọbhi obọ nin dọ nan erọnmhọn.” 37 Ọle da re Pita bi imikpea eva nesi Zẹbẹdi rẹkhan egbe. Ọle da wo manman ha lu akhiẹ, yẹ manman ha kpokpo egbe. 38 Ọle da ki taman ele yọle: “Ọbalọ nin imẹn ye khian gbe imẹn an. Ibha debhi enan, yẹ deba imẹn ha ganẹdẹ.” 39 Ọle ki khian re odalo khere, ọle da diguẹ yẹ si ẹlo ru bhi otọ, yẹ ha nan erọnmhọn yọle: “Aba imẹn, sade ọ dẹ ji a lu, ji ọne ukpu nan gbera imẹn. Ọrẹyiriọ, ji iho nọnsẹ munsẹ, ọ iyi iho nọnsẹmhẹn.”

40 Ọle ki fikie bu ene edibo re, ọle da kere ghe ele wẹ. Ọle da taman Pita yọle: “Ibha bha sabọ deba imẹn ganẹdẹ na bhi uriagogo ọkpa hiehie? 41 Ibha wo ha babegbe, ibha ha wo ha nan erọnmhọn ẹghe rebhe, beji a ha da miẹn ibha bha de ọbhi edọnmhẹn. Ẹmhọanta nọn ghe ibha rẹ wo muegbe nin ibha rẹ lu emhin nọn mhẹn, ọkpakinọn, efun nọnsẹbha wẹghẹ a.” 42 Bhi ọsi ugba ọzeva, ọle da kpanọ dọ nan erọnmhọn. Ọle da yọle: “Aba imẹn, ahamiẹn ọne ukpu nan ida sabọ gbera imẹn sade imẹn bha wọn ọlẹn, ji iho nọnsẹ munsẹ.” 43 Ọle ki vae, ọle da gbo kere ghe ele wẹ, ranmhude owe wo manman ha sun ele. 44 Bhiriọ, ọle da kpanọ zẹ ele obọ. Ọle da gbo dọ nan erọnmhọn ọsi ugba ọzea. Ọle da gbo ta emhin nin ọle ka ta. 45 Ọle da kie fikie bu edibo nesọle, yẹ taman ele yọle: “Ẹghe nọn sẹ inian, ọle ibha rẹ ha wẹ yẹ koahua? Ghọle! Ọne ẹghe sire nan ha rẹ mun Ọmọn nọnsi okpea ọbhi obọ ọsi eria nẹ imhẹn. 46 Bha kpanọ, bha ji mhan ha khian. Ghọle! Ọnọn ha mun imẹn khiẹn sire.” 47 Beji ọle sẹyẹ ha talọ, ghọle! Judas, nin ọkpa bhi ene etuegbe igbeva da bu ọle re. Usun ẹbho ne muno agbada bi ukpokpo mhọnlẹn da rẹkhan ọlẹn vae. Ene ohẹn ne khua bi ene ewanlẹn ọsi ene ẹbho, ele je ele re.

48 Judas nọn mun ọlẹn khiẹn ki ka taman ele yọle: “Ọria nọn hi ki rẹ khin nin imẹn ha re unun fiofio, ọle nọn; ibha mun ọlẹn.” 49 Ọle da khian bu Jesu, yẹ tuẹ ọle yọle: “Rabai, khara!” Ọle da yẹ re unun fiofio ọle. 50 Ọkpakinọn, Jesu da taman ọlẹn yọle: “Okpea, be uwẹ dọ lu bhi enan?” Ene ẹbho da ki bu Jesu re, yẹ re ọle kpanọ. 51 Ghọle! ọkpa bhi eria ne rẹkhan Jesu, da yo agbada nọnsọle a rẹ hian ehọ ọsi ọguọmhandia ọsi ọne ojohẹn fia. 52 Jesu da ki taman ọlẹn yọle: “Re agbada nọnsẹ fikie diọbhi eji uwẹ da re. Ranmhude, ọrebhe ne noo agbada, agbada a ha yẹ rẹ gbe ele a. 53 La uwẹ be riale imẹn ida sabọ taman Aba imẹn, nin ọle je ebe gbera usun igbeva ọsi ẹhi ne bunbun ji imẹn bhi ọne ẹghe nan. 54 Sokpan, imẹn ha lu iriọ, be ẹmhọn nọn ribhi Ebenọnkhiale ha rẹ munsẹ yẹ, nọn yọle ghe inian emhin ha dia?” 55 Bhi ọne ẹghe nin, Jesu da taman ene usun ẹbho yọle: “Imẹn ibha muno agbada bi ukpokpo rẹkhan egbe vae dọ mun bọsi oyi? Ukpẹdẹ-ukpẹdẹ imẹn rẹ ha man emhin bhi uwa oga, ọkpakinọn, ibha bha mun imẹn khue ẹghenin. 56 Sokpan, beji ẹmhọn nin ene akhasẹ gbẹnlẹn ha da munsẹ, ọle zẹle nin ene emhin nan rebhe da sunu.” Edibo nesọle rebhe da nẹgbe zẹ ọle obọ.

57 Ene mun Jesu da ki mun ọlẹn ha bu Keafas nin ojohẹn, bhi eji ene man uhi bi ene ewanlẹn da si egbe koko. 58 Ọkpakinọn, Pita da fẹkẹ gban egbe kie, yẹ rẹkhan ọlẹn bhi ikeke. Ọle da rẹkhan ọlẹn sẹbhi ẹgodo ọsi ọne ojohẹn. Ọle ki nabhi ọne ẹgodo fo, ọle da dọ deba ene eguọmhandia ne ribhi ọne uwa dotua, yẹ ha khẹ ebe ha sunu.

59 Ejayenan nian, ene ohẹn ne khua bi ọne ikotu Sanhẹdrin rebhe, da ha guanọ ẹbho ne ha sọsali ohoghe gbe Jesu, beji ele ha da sabọ gbe ọle a. 60 Ọkpakinọn, ele bha miẹn uhi soso nọn mun ọlẹn, arẹmiẹn eria ne bunbun vae dọ sọsali ohoghe gbe ọle. Akizẹbue, ikpea eva da vae. 61 Ele da yọle: “Ọne okpea nan yọle ghe, ọle dẹ sabọ dunmhun uwa oga nọnsi Osẹnobulua sotọ, yẹ re ikpẹdẹ ea rẹ bun ọlẹn sẹ okhun.” 62 Ọne ojohẹn da ki kpanọ, yẹ nọọn ọlẹn yọle: “Uwẹ bha miẹn ebi uwẹ ha ta ọbhi ebi ele tale? Uwẹ bha be họn ebi ene eria nan ta uwẹ bhi gbe?” 63 Ọkpakinọn, Jesu bha talọ. Bhiriọ, ọne ojohẹn da ki taman ọlẹn yọle: “Re elin nọnsi Osẹnobulua ve ihẹn ọbhọ ghe, uwẹ hi ọne Kristi, nin Ọmọn nọnsi Osẹnobulua!” 64 Jesu da taman ọlẹn yọle: “Uwẹ tobuwẹ tale fo. Ọkpakinọn, imẹn taman ibha ghe, rẹ na bhi ọne ẹghe nan rẹ ha khian, ibha dẹ daghe Ọmọn nọnsi okpea dotua bhi obera ọsi ọnọn mhọn ahu. Bha dẹ yẹ daghe ọle ghe ọle vade bhi ẹkẹ adudu amẹn bhi okhun.” 65 Ọne ojohẹn da ki nyanghan ukpọn nọnsọle a. Ọle da yọle: “Ghọle, ọle re unun ji Osẹnobulua. Bezẹle nin mhan ha da gbo ha guanọ ẹbho ne dọ sọsali? Ibha bha be họn ebi ọle rẹ re unun ji Osẹnobulua yẹ? 66 Be ibha ha ta ọbhi ọne ẹmhọn nan?” Ele da yọle: “Ọkhẹke nan gbe ọle a.” 67 Ele da ki jiẹsẹn ọle bhi ẹlo, yẹ ha fi ọle etin. Eso da yẹ ha fi ọle ubi. 68 Ele da ha yọle: “Uwẹ nin Kristi, taman imhan, họla fi uwẹ ubi?”

69 Bhi eji Pita da dotua bhi ẹgodo, ọmanmhẹn ọkpa nọn yi ọguọmhandia bhi ọne uwa da bu ọle re, yẹ taman ọlẹn yọle: “Ọkpa bhi ene rẹkhan Jesu nin obhi Galili, ọle uwẹ khin!” 70 Ọkpakinọn, ọle da sin bhi isira ẹbho rebhe yọle: “Imẹn bha lẹn ebi uwẹ tẹmhọn ọlẹn.” 71 Ẹghe nin ọle ki rẹ khian diọbhi obọ ọsi igeti ọsi ọne uwa, ọmanmhẹn ọbhebhe da gbo daghe ọle. Ọ da ha taman ene ribhi enin, yọle: “Ọne okpea nan deba ene rẹkhan Jesu nin obhi Nazarẹt.” 72 Ọle da gbo sin. Ọle bhọ da ve ihẹn ọbhọ, yọle: “Imẹn bha lẹn ọne okpea!” 73 Obhi ẹghe khere ki gbera, eria ne mundia bhi enin da bu Pita re, yẹ taman ọlẹn yọle: “Ọkpa bhi ene rẹkhan ọlẹn uwẹ gene khin. Ranmhude, uwedẹ nin uwẹ rẹ talọ bhọ re ọle man.” 74 Ọle da munhẹn ha ve ihẹn yọle: “Imẹn bha lẹn ọne ọkpea!” Bhi ọne ẹghe nin tee, ọkpa da viẹ. 75 Pita da ki yere ebi Jesu taman ọlẹn ẹghe nọn rẹ yọle: “Ọkuẹsẹ ọkpa vie, igba ea uwẹ ha yọle ghe uwẹ bha lẹn imẹn.” Bhiriọ, ọle da dagbare dọ ha viẹ.