UHỌNMHỌN-ỌTA NỌNZI 19
Be Imhan Ha Rẹ Sabọ Ziẹn Urẹọbhọ Nin Mhan Mhọn Da Ive ọsi Agbọn Ọsọgbọn Nin Jehova Ve Yẹ?
“[Jehova] ha tẹmhọn emhin, ọle ida be lu ọle?”—NUM. 23:19.
ILLO 142 Iruduba Nọnsẹmhan
EBI MHAN DA LUẸa
1-2. Be ọkhẹke nin mhan ha lu beji mhan rẹ khẹ agbọn ọsọgbọn?
IVE nin Jehova ve nin ọle rẹ re ọne agbọn nan kiẹn agbọn ọsọgbọn manman wo ti mhan bhọ. (2 Pet. 3:13) Arẹmiẹn mhan bha wo lẹn ẹghe nin Jehova ha rẹ mun ọne agbọn ọsọgbọn re tee, emhin ne sunu bhi ọne agbọn nan ẹlẹnan rẹkpa mhan rẹ lẹn ghe ọne ẹghe bha yẹ ree gbe.—Matt. 24:32-34, 36; Acts 1:7.
2 Ọkpakinọn, ebi mhan hi ki sẹ rẹ bue sẹ yẹ bhi oga, ọ yẹ wo khẹke nin mhan rebhe ha ziẹn urẹọbhọ nin mhan mhọn da ọne ive nan. Bezẹle? Ranmhude urẹọbhọ nọn ziẹnlẹn dẹ sabọ wẹghẹa. Bhi ọsi ẹmhọanta Pọl nin odibo da tie urẹọbhọ nọn wẹghẹa “olukhọ nọn kẹ gba mhan mun mhọn.” (Heb. 12:1) Nin mhan rẹ sabọ gbega urẹọbhọ nọnsẹmhan beji a ha da miẹn ọ bha wẹghẹa, ọkhẹke nin mhan wo ha ria eria nyan ene emhin ne re mhan rẹọbhọ ghe, ive ọsi agbọn ọsọgbọn nin Osẹnobulua vele dẹ kẹ munsẹ.—Heb. 11:1.
3. Be imhan ha zilo nyan bhi ọne uhọnmhọn-ọta nan?
3 Bhi ọne uhọnmhọn-ọta nan, mhan dẹ zilo nyan uwedẹ ea nin mhan ha rẹ sabọ ziẹn urẹọbhọ nin mhan mhọn da ive ọsi agbọn ọsọgbọn nin Jehova vele: (1) sade mhan ria eria nyan izọese nọnsi Jesu, (2) sade mhan ria eria nyan ahu nin Jehova mhọnlẹn bi (3) sade mhan lu emhin ne ha manman re mhan sikẹ Jehova. Mhan dẹ yẹ zilo nyan ebi ọta nin Jehova taman Habakọk ha rẹ sabọ ziẹn urẹọbhọ nọnsẹmhan yẹ ẹlẹnan. Ọkpakinọn, bha ji mhan ka zilo nyan idia eso nin mhan ha sabọ ha ye nian, nọn da manman khẹke nin mhan ha mhọn urẹọbhọ nọn ziẹnlẹn da ive ọsi agbọn ọsọgbọn nin Jehova vele.
IDIA ESO NỌN DA KHẸKE NIN MHAN HA MHỌN URẸỌBHỌ NỌN ZIẸNLẸN
4. Idia eso nela ọ da khẹke nin mhan ha mhọn urẹọbhọ nọn ziẹn?
4 Ukpẹdẹ-ukpẹdẹ mhan rẹ zẹ emhin nin mhan ha lu. Nin mhan rẹ sabọ zẹ emhin ne mhẹn rẹ lu, ọkhẹke nin mhan ha mhọn urẹọbhọ nọn ziẹnlẹn. Bhi ọsi ijiẹmhin, mhan zẹ eria nin mhan ha deba ha muobọ, emhin nin mhan ha rẹ re egbe re ahoho, ẹmhọn isiku, ẹmhọn ibọdọ bi ire-okhuo, ẹmhọn imọn, bi unan iwẹnna nin mhan ha lu. Ọkhẹke nin mhan nọọn egbe mhan: ‘Emhin nin mẹn zẹ rẹ lu be rẹman ghe mẹn rẹọbhọ ọne agbọn nan dẹ kẹ kpẹn, sẹyẹ Jehova dẹ kẹ re ọnan agbọn kiẹn agbọn ọsọgbọn? La mẹn be lu emhin bhi uwedẹ nin ẹbho bhi ọne agbọn nan rẹ lu emhin ne bha rẹọbhọ ghe eria dẹ sabọ nyẹnlẹn bhi ighegheghe?’ (Matt. 6:19, 20; Luke 12:16-21) Mhan dẹ sabọ zẹ emhin ne mhẹn rẹ lu, sade mhan ziẹn urẹọbhọ nin mhan mhọn ghe agbọn ọsọgbọn dẹ kẹ vae.
5-6. Bezẹle nọn da khẹke nin mhan ha mhọn urẹọbhọ nọn ziẹnlẹn bhi ẹghe ọnọghọ? Re ijiẹmhin ọbhọ.
5 Mhan yẹ kuẹlo da ọnọghọ kẹkẹ nọn da khẹke nin mhan ha mhọn urẹọbhọ nọn ziẹn. Mhan sabọ rẹ kuẹlo da ekpokpo, emianmhẹn nọn manman kaka, la idia ebhebhe ne ha sabọ re egbe lọ mhan. Bhi ọsi ọhẹnhẹn, ọ sabọ rẹ wo lẹkhẹ nin mhan rẹ ziẹngbe ọle. Ọkpakinọn, ahamiẹn ọne ọkakale bha ka fo bhi otọ beji ọ kẹ wo rẹ sunu, ọ dẹ khẹke nin mhan ha mhọn urẹọbhọ nọn ziẹn, beji mhan ha da sabọ ziẹngbe ọle yẹ re eghọnghọn ha ga Jehova.—Rom. 12:12; 1 Pet. 1:6, 7.
6 Ahamiẹn mhan manman wo ha kuẹlo da ọkakale, mhan sabọ rẹ ha riale ghe agbọn ọsọgbọn ida yẹ vae. Ọnan be rẹman ghe urẹọbhọ nọnsẹmhan wẹghẹa? Eye. Mhan fẹ ọne ijiẹmhin nan ghe. Ahamiẹn amẹn manman wo rọ bhi ikpẹdẹ ne bunbun, mhan sabọ rẹ ha riale ghe ovuẹn ida yẹ zẹ. Ọkpakinọn, ovuẹn dẹ yẹ wo zẹ. Iriọ yẹ nọn, ahamiẹn idia nin mhan yẹ manman wo re egbe lọ mhan, mhan sabọ rẹ ha riale ghe agbọn ọsọgbọn ida yẹ vae. Ọkpakinọn, urẹọbhọ nọnsẹmhan ha gene deziẹn, mhan ida ha mhọn edandan ghe si Osẹnobulua dẹ mun ive nesọle sẹ. (Ps. 94:3, 14, 15; Heb. 6:17-19) Ọne urẹọbhọ nọn ziẹnlẹn nan ki rẹkpa mhan rẹ mun oga nọnsi Jehova kalo bhi iẹnlẹn nọnsẹmhan.
7. Iria-eria nela ọkhẹke nin mhan rẹban?
7 Ọ yẹ wo khẹke nin mhan ha mhọn urẹọbhọ nọn ziẹnlẹn nin mhan da sabọ ha lu iwẹnna itẹmhọn Osẹnobulua. Ẹbho ne bunbun nin mhan tẹmhọn Osẹnobulua man bha rẹọbhọ ghe, ene emhin esili kẹkẹ nin Agbejele nọnsi Osẹnobulua da lu mhan dẹ gene sabọ sunu. (Matt. 24:14; Ezek. 33:32) Ọkhẹke nin mhan mhọn ẹwan beji a ha da miẹn ghe iria-eria nọn sẹnian bha rẹso mhan. Nin mhan rẹ sabọ gbega egbe mhan bhi iria-eria nọn sẹnian, ọkhẹke nin mhan wo ha ziẹn urẹọbhọ nọnsẹmhan. Bha ji mhan zilo nyan uwedẹ ea nin mhan ha rẹ sabọ lu iriọ.
HA RIA ERIA NYAN IZỌESE NỌNSI JESU
8-9. Mhan da ha ria eria nyan izọese nọnsi Jesu, be ọ ha rẹ ziẹn urẹọbhọ nọnsẹmhan yẹ?
8 Uwedẹ ọkpa nin mhan ha rẹ sabọ ziẹn urẹọbhọ nọnsẹmhan hi, nin mhan rẹ ha ria eria nyan izọese nọnsi Jesu. Izọese nọnsi Jesu rẹkpa mhan rẹ lẹn ghe ive rebhe nin Jehova vele dẹ gene munsẹ. Ahamiẹn mhan manman ria eria nyan ebezẹle nin Jehova da je Jesu re nin ọle dọ yu nin mhan, bi ebi ọ re Jehova le rẹ lu ọle, ọ ki ziẹn urẹọbhọ nin mhan mhọn da ive nin Jehova vele nin mhan rẹ nyẹnlẹn bhi ighegheghe bhi agbọn ọfubhegbe. Bezẹle nin mhan ha da sabọ ta iriọ?
9 Be ọ re Jehova le rẹ je Jesu nin ọle dọ yu nin mhan? Jehova da ji Ọmọn nọnsọle nin ọle manman hoẹmhọnlẹn nẹ, nọn yẹ sikẹ ọle nẹ da sibhi okhun re, nan dọ biẹ ọle bhi ọne otọ nan. Beji Jesu ha ribhi ọne otọ nan, ọle wo ziẹngbe ọkakale kẹkẹ. Ọle da loya yẹ yu uyumhin oya. Udede emhin wo khọnan nin Jehova lu. Jehova irẹ ji Ọmọn nọnsọle da loya yẹ yu sade nin mhan rẹ gheghe ha mhọn iẹnlẹn nọn mhẹn bhi obhi ẹghe khere nọn. (John 3:16; 1 Pet. 1:18, 19) Ranmhude Jehova re Ọmọn nọnsọle nin ọle manman hoẹmhọnlẹn rẹ zọese nin mhan, ọle dẹ lu ọle nin mhan sabọ nyẹnlẹn bhi ighegheghe bhi agbọn ọsọgbọn.
HA RIA ERIA NYAN AHU NIN JEHOVA MHỌNLẸN
10. Beji Ephesians 3:20 rẹman, be Jehova sabọ lu?
10 Uwedẹ nọnzi eva nin mhan ha rẹ sabọ ziẹn urẹọbhọ nọnsẹmhan hi, nin mhan rẹ ha ria eria nyan ahu nọnsi Jehova. Ọle mhọn ọne ahu nin ọle rẹ mun ive nesọle rebhe sẹ. Bhi ọsi ẹmhọanta, ive ọsi agbọn ọsọgbọn nin eria ha da nyẹnlẹn bhi ighegheghe, sabọ rẹ diabi emhin nọn ida sabọ sunu rẹji eria. Ọkpakinọn, Jehova sẹ wo ve ive ne bunbun nin eria ida sabọ munsẹ ghe. Ọle dẹ sabọ mun ive nesọle sẹ, ranmhude ọle hi Osẹ nọn mhọn ahu nẹ. (Job 42:2; Mark 10:27) Bhiriọ, ọ bha han mhan ilo ghe ọle ve ive ọhan-ilo nin mhan.—Tie Ephesians 3:20.
11. Tẹmhọn ọkpa bhi ive ọhan-ilo nin Osẹnobulua vele. (Fẹ ọne ẹkpẹti ghe nọn yọle “Ive Ọhan-ilo Eso Ne Munsẹ.”)
11 Fẹ ive eso ghe nin Jehova ve nin ẹbho nesọle bhi ẹghe nọn gbera nọn diabi emhin nọn ida sabọ sunu. Jehova da taman Ebraham bi Sera ghe, ele dẹ biẹ ọmọn arẹmiẹn ghe ele manman dọmanlẹn. (Gen. 17:15-17) Ọle da yẹ taman Ebraham ghe, imọn nesọle dẹ le otọ ọsi Kenan bhi uku. Ene ikpe ne bunbun nin ibhokhan Izrẹl ne yi imọn ọsi Ebraham gbe bhi otọ Ijipt bọsi igbọn, da re ọle diabi ghe ọne ive ida sabọ munsẹ. Ọkpakinọn, ọ da munsẹ. Akizẹbue, Jehova da yọle ghe Ẹlizabẹt nọn ki manman dọmanlẹn dẹ biẹ ọmọn okpea. Ọle da yẹ taman Meri nin okhuo nọn bha sẹ hẹgẹn ghe ọle dẹ biẹ ọmọn okpea. Ọnan dẹ mun ive nin Jehova ve bhi ikpe ne bunbun ne gbera bhi ogba ọsi Idẹn sẹ.—Gen. 3:15.
12. Emhin nela Joshua 23:14 bi Isaiah 55:10, 11 ji mhan lẹn rẹji ahu nọnsi Jehova?
12 Mhan ha ria eria nyan ive nin Jehova sẹ ve, bi ebi ọle rẹ mun ele sẹ yẹ, ọ ki rẹkpa mhan rẹ lẹn ghe ọle manman mhọn ahu. Ọnan ki manman re urẹọbhọ nin mhan mhọn da ive ọsi agbọn ọsọgbọn nin ọle ve deziẹn. (Tie Joshua 23:14; Isaiah 55:10, 11.) Ọnan ki rẹkpa mhan rẹ manman muegbe rẹ rẹkpa ẹbho rẹ lẹn ghe, ive ọsi agbọn ọsọgbọn nin Jehova ve nin mhan igheghe yi okha-okha. Rẹji okhun ọsọgbọn bi otọ ọsọgbọn nin Jehova vele, ọle da yọle: “Ene ẹmhọn nan, ọta nan ha mun udu tẹ bi ọta ẹmhọanta nọn.”—Rev. 21:1, 5.
HA LU EMHIN NE HA RẸKPA UWẸ RẸ MANMAN SIKẸ JEHOVA
IKOLO OGA NESẸMHAN
Be ọnan ha rẹ sabọ rẹkpa uwẹ rẹ ziẹn urẹọbhọ nọnsẹ yẹ? (Fẹ uduọle nọnzi 13 ghe)
13. Be ikolo oga nesẹmhan rẹ ziẹn mhan urẹọbhọ yẹ? Gbotọle fanọn an.
13 Uwedẹ nọnzi ea nin mhan ha rẹ sabọ ziẹn urẹọbhọ nọnsẹmhan hi, nin mhan rẹ ha lu emhin ne ha sabọ re mhan sikẹ Osẹnobulua. Bhi ọsi ijiẹmhin, mhan fẹ ebi mhan rẹ miẹn elele yẹ bhi ikolo oga nesẹmhan ghe. Anna nọn sẹ wo re ikpe ne bunbun rẹ lu iwẹnna oga da yọle: “Ikolo oga rẹkpa mẹn rẹ manman ziẹn urẹọbhọ nọnsẹmhẹn. Aharẹmiẹn obhio mhan nọn re ọta man imanman sabọ re ọta man nọnsẹn, la emhin nin mhan ka lẹn khẹ ọle tẹmhọn ọlẹn, mẹn wo miẹn emhin bhi ọne ọta nọn ha rẹkpa mẹn rẹ manman lẹn otọ Baibo nọnsẹn, yẹ ziẹn mẹn urẹọbhọ.”b Edandan iribhọ ghe ewanniẹn nin ibhio mhan re ọbhi inọnta bhi ikolo oga yẹ wo ziẹn mhan urẹọbhọ.—Rom. 1:11, 12; 10:17.
IWẸNNA ITẸMHỌN OSẸNOBULUA
Be ọnan ha rẹ sabọ rẹkpa uwẹ rẹ ziẹn urẹọbhọ nọnsẹ yẹ? (Fẹ uduọle nọnzi 14 ghe)
14. Be iwẹnna itẹmhọn Osẹnobulua rẹ ziẹn mhan urẹọbhọ yẹ?
14 Mhan yẹ ziẹn urẹọbhọ nọnsẹmhan sade mhan lu iwẹnna itẹmhọn Osẹnobulua. (Heb. 10:23) Obhio mhan natiọle Barbara nọn sẹ ga Jehova bhi ebe gbera ikpe 70 nian da yọle: “Mẹn wo dọ kere ghe, iwẹnna itẹmhọn Osẹnobulua manman wo ziẹn mẹn urẹọbhọ. Beji mẹn rẹ manman tẹmhọn ive nesi Jehova man ẹbho, iriọ urẹọbhọ nọnsẹmhẹn rẹ wo manman ziẹn ọbhọ.”
EMHIN NIN MHAN TOBỌMHAN LUẸ
Be ọnan ha rẹ sabọ rẹkpa uwẹ rẹ ziẹn urẹọbhọ nọnsẹ yẹ? (Fẹ uduọle nọnzi 15 ghe)
15. Be emhin nin mhan tobọmhan luẹ rẹ ziẹn mhan urẹọbhọ yẹ? (Yẹ fẹ ene ifoto ghe.)
15 Mhan zilo nyan emhin ọbhebhe nọn yẹ wo ziẹn mhan urẹọbhọ, ọnin hi, emhin nin mhan tobọmhan luẹ. Obhio mhan nin Susan da dọ lẹn kere ghe, ọ rẹkpa ọle sade ọle mhanmhan ẹghe nin ọle ha rẹ lu iluẹmhin nọnsọle. Ọle da yọle: “Ẹdẹ Sọnde, mẹn ki muegbe iluẹmhin ọsi Ọkhẹughe ọsi ẹdẹ uzana nọn vade ọbhi otọ. Ẹdẹ Mọnde bi Tiuzde, mẹn ki muegbe ikolo oga nan dọ bhi ẹkẹ uzana ọbhi otọ. Bhi ẹdẹ nekẹle, mẹn ki rẹ ọle rẹ luẹ ẹmhọn emhin ebhebhe.” Ranmhude ọne obhio mhan nan wo re obọ rẹkhan ẹghe nin ọle re ọbhi otọ nin ọle rẹ ha luẹ emhin, ọle da wo sabọ ha ziẹn urẹọbhọ nọnsọle. Obhio mhan nin Irene nọn sẹ wo re ikpe ne bunbun ga bhi Bẹtẹ nọn ke okhun nẹ da tẹmhọn ebi ọ rẹ ziẹn urẹọbhọ nọnsọle yẹ, sade ọle re ẹghe ọbhi otọ rẹ luẹ ẹmhọn ọta akhasẹ ne ribhi Baibo. Ọle da yọle: “Ọ manman wo ti mẹn bhọ rẹ daghe ọta akhasẹ kẹkẹ nesi Jehova wo ha munsẹ beji ọle rẹ tale tee.”c
“A IDA MIẸN EMHIN NỌN HA ZẸ Ọ BHA SUNU”
16. Bezẹle nin ọta izebhudu nin Jehova taman Habakọk da yẹ rẹso mhan ẹlẹnan? (Hebrews 10:36, 37)
16 Ọ ree nin eso bhi eguọmhandia nesi Jehova mọn da khẹ ọkpẹnlẹn ọsi ọne agbọn nan. Bhi ẹlo ọsi eria, ọne ive sabọ rẹ diabe emhin nọn re ẹghe. Ọkpakinọn, Jehova lẹn ebi emhin dia eguọmhandia nesọle yẹ bhi egbe. Ọle da re ọnan man bhi ẹghe nin ọle rẹ taman Habakọk nin akhasẹ yọle: “Ọne imianlo dẹ munsẹ bhi ẹghe nan rẹyi nanlẹn, iriọ ọkpẹnlẹn nọnsọle yẹ rẹ tua vade. A ida miẹn ọ bha sunu. Aharẹmiẹn ọ re ẹghe, manman ha khẹ ọle! A ida miẹn emhin nọn ha zẹ ọ bha sunu. Ọ dẹ vae bhi ẹghe nan rẹyi nanlẹn tee!” (Hab. 2:3) Habakọk ọkpa Osẹnobulua be re ene ọta nan rẹ ziẹn ọlẹn udu? La ene ọta nan be yẹ rẹso mhan ẹlẹnan? Bhi Baibo, Jehova da ji Pọl nin odibo noo ene ọta nan rẹ talọ ji Kristiẹn ne wo ha khẹ agbọn ọsọgbọn. (Tie Hebrews 10:36, 37.) Bhi ọsi ẹmhọanta, aharẹmiẹn ive nin Jehova ve nin ọle rẹ miẹn mhan fan diabi ebi re ẹghe, mhan dẹ sabọ ha mhọn ọne izebhudu ghe “a ida miẹn emhin nọn ha zẹ ọ bha sunu. Ọ dẹ vae bhi ẹghe nan rẹyi nanlẹn tee!”
17. Be obhio mhan nin okhuo rẹ re obọ rẹkhan adia nin Jehova re nin Habakọk yẹ?
17 Eguọmhandia nesi Jehova ne bunbun sẹ wo rẹ obọ rẹkhan ọne adia nan nin Jehova rẹ nin Habakọk nọn yọle: “Manman ha khẹ ọle!” Eso sẹ wo lu iriọ bhi ẹkẹ ikpe ne bunbun. Bhi ọsi ijiẹmhin, mhan fẹ okha ọsi obhio mhan nin Louise ghe. Ukpe 1939 ọne obhio mhan nan munhẹn ha ga Jehova. Ọle da yọle: “Bhi ọne ẹghenin, mẹn da ha riale ghe mẹn ida sẹ yo isiku fo ọkuẹsẹ Amagẹdọn vae. Ọkpakinọn, ọ bha sunu bhi iriọ. Bhi ẹkẹ ikpe ne bunbun nian, okha ọsi ẹbho bhi Baibo nin mẹn tie ne mundia khẹ Jehova nin ọle rẹ mun ive nesọle sẹ, wo rẹkpa mẹn rẹ mundia ha khẹ ẹghe nin Jehova ha rẹ mun ive nesọle sẹ. Mẹn tie ẹmhọn Noa, Ebraham, Josẹf bi ẹbho ebhebhe ne re ẹghe nọn tanlẹn mundia khẹ Jehova ọkuẹsẹ ele miẹn ihaosa bhi obọ ọle. Nan rẹ ha mhọn ukpẹdẹ nọnsi Jehova bhi ọkhọle yẹ ha khẹ ọle, sẹ wo rẹkpa mẹn bi ẹbho ebhebhe rẹ rẹọbhọ ghe agbọn ọsọgbọn nin Jehova vele sire.” Ẹbho ne bunbun ebhebhe nọn rele nin ele mọn da ga Jehova yẹ wo rẹọbhi ọnan.
18. Mhan da ha gbẹlokotọ bhi ene emhin nin Osẹnobulua manlẹn, be ọ ha rẹ ziẹn urẹọbhọ nin mhan mhọn da ive ọsi agbọn ọsọgbọn yẹ?
18 Ẹmhọanta nọn ghe agbọn ọsọgbọn bha sẹ vae nian. Ọkpakinọn, ria eria nyan emhin eso ne ribhọ ọne agbọn nan ẹlẹnan. Emhin bii ahiẹnhiẹn, oran, ene elanmhẹn bi eria. Ẹlẹnan nian ọria iribhọ nọn da ha mhọn edandan ghe si ene emhin nan gene ribhọ, arẹmiẹn ẹghe ka ha ribhọ nin ele bha rẹ ha ribhọ. Ele ki ribhọ nian ranmhude Jehova man ele. (Gen. 1:1, 26, 27) Osẹnobulua nọnsẹmhan yẹ gbo ve ghe ọle dẹ mun agbọn ọsọgbọn re. Ọle dẹ gene mun ọne ive nan sẹ. Bhi agbọn ọsọgbọn, ẹbho dẹ ha mhọn egbe nọn daanlẹn yẹ nyẹnlẹn bhi ighegheghe. Ẹghe nin Osẹnobulua rẹ yi ha sẹ, ọle ki mun ọne agbọn ọsọgbọn nin ọle ve re. Mhan ki ha sọnyẹnmhẹn bhọ beji mhan rẹ sọnyẹnmhẹn bhi ene emhin kẹkẹ nin ọle manlẹn ne ribhọ ẹlẹnan.—Isa. 65:17; Rev. 21:3, 4.
19. Be uwẹ ha rẹ sabọ ha ziẹn urẹọbhọ nọnsẹ yẹ?
19 Bhi ejayenan nian, wo ha noo isẹhoa nọn hi ki rẹ khin nin uwẹ miẹn rẹ ziẹn urẹọbhọ nọnsẹ. Ji izọese nọnsi Jesu ha ti uwẹ bhọ. Ha ria eria nyan ahu nọnsi Jehova. Wo ha lu emhin ne ha sabọ re uwẹ manman sikẹ Jehova. Uwẹ da ha lu iriọ, uwẹ ki sabọ deba “eria ne re egbe khọkhọ ene miẹn ọne ive ranmhude urẹọbhọ bi iziẹngbe nọnsele.”—Heb. 6:11, 12; Rom. 5:5.
ILLO 139 Riale Ebi Agbọn Ọsọgbọn Ha Diayẹ
a Ẹbho ne bunbun ẹlẹnan bha rẹọbhi ive ọsi agbọn ọsọgbọn nin Jehova vele. Ele riale ghe okha-okha gheghe nọn, ghe ọ mhẹn bhi ehọ gbe nọn rẹ ha yi ẹmhọanta. Ọkpakinọn, mhan rẹọbhọ ghe ive rebhe nin Jehova vele dẹ munsẹ. Ọrẹyiriọ, ọkhẹke nin mhan wo manman dọnmhegbe rẹ ha ziẹn urẹọbhọ nọnsẹmhan. Be imhan ha rẹ lu ọle yẹ? Ọne uhọnmhọn-ọta dẹ rẹ otọle man.
b Elin ọbhebhe a mun hẹ ọle.
c Mhan dẹ sabọ miẹn uhọnmhọn-ọta ne bunbun ne tẹmhọn ọta akhasẹ ne ribhi Baibo bhi ọne ebe natiọle Watch Tower Publications Index, bhi odotọ uhọnmhọn-ọta nọn yọle “Prophecy.” Bhi ọsi ijiẹmhin, fẹ ọne uhọnmhọn-ọta ghe nọn yọle: “What Jehovah Foretells Comes to Be” bhi Watchtower ọsi Jẹnuare 1, 2008.