Elele Nabhọre Sade Mhan Mun Ofẹn Osẹnobulua

1-2. Bọsi Lọti, ọnọghọ nela ẹbho ne ga Jehova kuẹlo da ẹlẹnan?

MHAN ha daghe uwedẹ nin ẹbho rẹ ha nyẹn iẹnlẹn esankan bhi ọne agbọn nan ẹlẹnan, emhin ki dia mhan bhi egbe beji ọ dia Lọti le. Ọle “wo ha kiẹ egbe ranmhude esankan ọsi ene ẹbho ne bha khia,” ranmhude ọle lẹnmhin ghe Aba mhan nọn ribhi okhun he iẹnlẹn nọn sẹ iriọ. (2 Pet. 2:7, 8) Ofẹn Osẹnobulua nin Lọti ha mhọnlẹn, bi oyẹẹ nin ọle mhọn da Ọle rẹkpa ọle rẹ rẹban uwedẹ nọn imhẹn nin ẹbho ne nẹga ọle rẹ nyẹnlẹn. Ẹwẹ ẹbho ne imun ekpẹn nin Osẹnobulua bi uhi nesọle mhan da yẹ nyẹnlẹn ẹlẹnan. Ọrẹyiriọ, mhan dẹ sabọ ha nyẹnlẹn bhi uwedẹ nọn khiale sade mhan hoẹmhọn Osẹnobulua yẹ wo ha mun ofẹn ọlẹn.—Prov. 14:2.

² Nin mhan rẹ sabọ lu ọnan, Jehova re adia nin mhan ne ha sabọ rẹkpa mhan bhi ebe ọsi Proverbs. Eguọmhandia nesi Jehova rebhe rẹ dọ sẹbhi ibhokhan dẹ wo manman miẹn elele sade ele zilo nyan ọta ẹwanlẹn ne ribhi ọne ebe nan.

Ọ GBEGA MHAN SADE MHAN MUN OFẸN OSẸNOBULUA

3. Beji Proverbs 17:3 rẹman, emhin kpataki nela zẹle nin mhan ha da ha gbega ọkhọle nọnsẹmhan? (Yẹ fẹ ifoto ghe.)

³ Emhin kpataki nọn zẹle nin mhan ha da ha gbega ọkhọle nọnsẹmhan hi, Jehova fẹ ọle ghe. Ọnan rẹman ghe, Jehova daghe gbera ebi eria daghe bhi egbe mhan. Ọle lẹn unan ọria nin mhan gene khin bhi ẹkẹ ọkhọle. (Tie Proverbs 17:3.) Ọle dẹ hoẹmhọn mhan sade mhan ria eria nyan ọta ẹwanlẹn nesọle ne ha rẹkpa mhan rẹ sabọ miẹn iẹnlẹn ighegheghe. (John 4:14) Mhan da ha lu iriọ, uwedẹ esankan nin ẹbho rẹ nyẹnlẹn bhi ọne agbọn nan ẹlẹnan, bi ohoghe nin Esu rẹ khian ida sabọ rẹso mhan. (1 John 5:18, 19) Beji mhan ha rẹ manman ha sikẹ Jehova, oyẹẹ bi ekpẹn nin mhan mhọn da ọle ki ha tuẹn okhun. Ranmhude mhan bha ho nin mhan lu emhin nọn ha ba Aba mhan bhi egbe, mhan ida dọ ha ria ẹmhọn emhin nọn bha gba, nan rẹ ha biẹn nin mhan rẹ dọ lu ọle. Ahamiẹn mhan kuẹlo da edọnmhẹn nin mhan rẹ lu emhin nọn imhẹn, mhan ki nọọn egbe mhan yọle: ‘Be imẹn ha rẹ taan ẹlo a lu emhin nọn ha ba Ọria bhi egbe nọn re inian hoẹmhọn mẹn?’—1 John 4:9, 10.

4. Be ofẹn Jehova nin obhio mhan ha mhọn rẹ rẹkpa ọle yẹ rẹ re egbe nẹ bhi edọnmhẹn?

⁴ Obhio mhan natiọle Marta nọn na bhi Croatia vae nọn kuẹlo da edọnmhẹn nin ọle rẹ gboghẹ da gbẹn yọle: “Ọ da wo ha nọghọ mẹn rẹ ha ria eria nọnsẹn, yẹ rẹ sabọ khọn ọne ọkhọle nin mẹn rẹ lu emhin nọn bha gba. Ọkpakinọn, ofẹn nin mẹn mhọn da Jehova hi emhin nọn gbega mẹn.”b Be ọ rẹ gbega ọle yẹ? Marta da yọle ghe, ọle da ria eria nyan emhin ne imhẹn ne da nabhọre sade ọle dọ lu emhin nọn bha gba. Mhan dẹ yẹ sabọ lu iriọ. Ọbalọ nọn si ji Jehova hi emhin nọn khọ nẹ nọn nabhọre sade mhan dọ lu emhin nọn bha gba. Rẹ deba ọnin, mhan ki sibhi ọne uwedẹ re nin mhan rẹ sabọ ga ọle rẹ sẹbhi ighegheghe.—Gen. 6:5, 6.

5. Be imhan miẹn luẹ bhi ebe sunu ji Leo?

⁵ Ahamiẹn mhan mun ofẹn Jehova, mhan dọnmhegbe nin mhan hẹi dọ deba ẹbho ne ire obọ rẹkhan uhi nesọle ha mun obọ. Obhio mhan nin Leo nọn nyẹnlẹn bhi Congo miẹn ọbalọ nọn nabhọre sade a deba ẹbho ne imhẹn ha muobọ. Ikpe enẹn beji ọle mianmẹn fo, ọle da deba ẹbho ne imhẹn ha muobọ. Ọle da ha riale ghe ọle bha lu emhin ebe beji a miẹn ọle bha deba ele ha lu emhin ne bha gba. Ọ bha ree gbe, ene imọẹ ọle da si ọle ọbhọ rẹ ha lu ilọnmhọn oghẹ yẹ ha danyọn gbe-ebge. Ọle ki da dọ munhẹn ha ria ẹmhọn ebi ene biẹ ọle man ọle le, bi eghọnghọn nin ọle ha mhọn ẹghe nin ọle rẹ ha ga Jehova. Be ki nabhọre? Ọle da dọ munhẹn ha lu emhin ne khẹke. Ranmhude uwedẹ nin ene ewanlẹn rẹ rẹkpa ọle, ọle da kie dọ ha ga Jehova. Ẹlẹnan nian, ọwanlẹn bi ọkanẹfan kpataki ọle ki khin bhi agbotu.

6. Ijiẹmhin ọsi ikhuo eva nela mhan ha zilo nyan nian?

⁶ Bha ji mhan zilo nyan ẹmhọn ikhuo eva nan tẹmhọnlẹn bhi Proverbs uhọnmhọnlẹn nọnzi 9. Ọkpa bhi ene ikhuo mundia nin ẹwanlẹn, ọnọnkẹle mundia nin uuki. (Yẹ fẹ Romans 5:14; Galatians 4:24.) Beji mhan ha rẹ ha zilo nyan ọlẹn, ha mhọnlẹn bhi ọkhọle ghe, ẹmhọn inegbe-nowẹ nọn bha khia bhi ẹlo nọnsi Osẹnobulua, bi nan rẹ ha ghe ifoto la vidio ọsi ẹbho ne banọn an, ọle ẹbho lu ilọnmhọn ọlẹn bhi ọne agbọn Esu nan ẹlẹnan. (Eph. 4:19) Bhiriọ, ọkhẹke nin mhan dọnmhegbe ha mun ofẹn Osẹnobulua yẹ rẹban emhin ne imhẹn. (Prov. 16:6) Bhi ọsi ẹmhọanta, mhan rebhe dẹ miẹn elele bhi adia nọn ribhi ọne uhọnmhọnlẹn nan bhi Baibo. Baibo yọle ghe, ọdeọde bhi ene ikhuo nan da ha tie ene uuki—ene “iwanlan.” Ele da ha yọle, ‘Bha vae bhi uwa nọnsẹmhẹn dọ le ebale.’ (Prov. 9:1, 5, 6, 13, 16, 17) Ọkpakinọn, emhin nin ẹbho ne vae bhi uwa ọsi ene ikhuo nan ha miẹn dẹ wo dikẹ.

HẸI NABHI UWA ỌSI ỌNE OKHUO NAN RẸ KHỌKHỌ UUKI

7. Beji Proverbs 9:13-18 rẹman, be ẹbho ne nabhi uwa ọsi ọne okhuo nan rẹ khọkhọ uuki da miẹn? (Yẹ fẹ ifoto ghe.)

⁷ Mhan fẹ ebi ọne okhuo nọn de uuki a ha ta. (Tie Proverbs 9:13-18.) Ọle da wo ha sotie ẹbho ne iwanlan nin ele vae bhi uwa nọnsọle dọ deba ọle le ebale. Be ha sunu ji ele bhi enin? “Ene uu gbe ribhi enin.” Asabọmiẹn uwẹ yẹ ye ọta ne sẹnian re nan noo bhi ije ebhebhe bhi ebe ọsi Proverbs. Bhi enin, a da sekha nin mhan rẹji ọne okhuo “nọn miokan” bi ọne okhuo “nọn sankan” yọle: “Uu uwa nọnsọle ji ọria le.” (Prov. 2:11-19) Proverbs 5:3-10 da yẹ sekha mhan rẹji okhuo ọbhebhe nọn riia a. Ọ da yọle ghe, “uu ukpoẹ nin ọle zẹ si re.”

8. Emhin nela ọdeọde bhi ẹwẹ mhan mhọn ọne ahu rẹ yu?

⁸ Eria ne họn ebi ọne okhuo nan rẹ khọkhọ uuki ha ta, dẹ zẹ si ele dẹ re ehọ bhi ebi ọle ta, la si ele ida re ehọ ọbhọ. Asabọmiẹn mhan dẹ ke egbe mhan re bhi idia nọn sẹnian nin mhan ha da zẹ ebi mhan ha lu. Be imhan ha lu yẹ sade ọria ho nọn si mhan ọbhi ilọnmhọn oghẹ, la sade ifoto bi filmu nin ẹbho da banọn zegbere beji mhan rẹ noo intanẹt la ghe tẹlẹvisiọn?

9-10. Emhin eso nela zẹle nọn da khẹke nin mhan rẹban ilọnmhọn oghẹ?

⁹ Emhin ne mhẹn wo ribhọ ne ha re mhan re egbe nẹ bhi ilọnmhọn oghẹ. Beji a rẹ tẹmhọn ọne okhuo nọn de uuki a bhi Baibo, ọle da ha yọle: “Amẹn nan do muọn wo niẹn-niẹn.” Be bhọ hi “amẹn nan do muọn”? Baibo da re inegbe-nowẹ ọsi okhuo bi ọdọ rẹ khọkhọ amhẹn nọn mhẹn bhi egbe. (Prov. 5:15-18) Okpea bi okhuo ne bọ egbe dẹ sabọ ha sọnyẹnmhẹn bhi inegbe-nowẹ. Ọkpakinọn, ọnan wo dikẹ bhi “amẹn nan do muọn.” “Amẹn nan do muọn” sabọ rẹ mundia nin inegbe-nowẹ nọn bha gba. Ẹbho ne lu ilọnmhọn nọn sẹnian do lu ọle beji oyi rẹ do emhin nọn iyi ọsọle re. Ọne amẹn nan sabọ rẹ ha mhẹn bhi unun, manman nọn sade ẹbho ne lu ọle riale ghe a ida sabọ mun ele. Ọkpakinọn egbe ele ele mun lu ranmhude Jehova daghe emhin rebhe. Emhin iribhọ nọn khọ sẹbhọ ghe, Jehova iyẹ re ẹlo esili ghe ọria. Bhiriọ emhin nọn mhẹn bhi unun igene ribhọ. (1 Cor. 6:9, 10) Gbera ọnan, emhin ọbhebhe yẹ ribhọ nin ọne ilọnmhọn okan nan sire.

¹⁰ Ilọnmhọn oghẹ si ẹkhọle re. Ọ rẹ ọria ha ghe egbe ọle bii ọria nọn bha sẹ emhin soso, ọ re ọria dọ ha lu ilọnmhọn imọn nan bha sẹ rẹ muegbe ọle, sẹyẹ, ọ zagha azagba-uwa a. Bhiriọ, emhin ẹwanlẹn nọn nin mhan rẹ rẹban uwa ọsi ọne okhuo nọn iwanlan bi ebale nọnsọle. Rẹ gbera ghe ọ dẹ sabọ riia ikolu nin mhan bi Jehova ko mhọnlẹn an, ẹbho ne bunbun ne lu ilọnmhọn oghẹ mun emianmhẹn bhọ nọn ha sabọ si uu ji ele. (Prov. 7:23, 26) Inian Proverbs uhọnmhọnlẹn nọnzi 9 ulọnlẹn 18 rẹ kpẹn: “Idin ene vae bhi uwa nọnsọle ki ye.” Ọrẹyiriọ, bezẹle nin ẹbho ne bunbun da sẹyẹ ha bu ọne okhuo nan nọn de uuki a re arẹmiẹn ọkakale kẹkẹ ọle sire?—Prov. 9:13-18.

11. Bezẹle nan rẹ ha ghe foto la vidio ọsi ẹbho ne banọn an da manman yi emhin nọn bha gba?

¹¹ Emhin ọkpa nọn wo gba ije rebhe ẹlẹnan nọn khẹke nin mhan rẹban hi, foto la filmu ọsi ẹbho ne banọn an. Ẹbho eso riale ghe okhẹnan soso iribhọ nan rẹ ha ghe ele. Bhi ọsi ẹmhọanta, okhẹnan ribhọ. Ọ re ekpẹn si ọria bhi egbe re, sẹyẹ ọ guẹ ọria egbe. Ọria ha daghe ifoto ọsi ẹbho ne banọn an, ọ nọghọ nan rẹ re sibhi ọkhọle re. Nan rẹ ha ghe foto la ividio ọsi ẹbho ne banọn an irẹkpa ọria rẹ mun egbe mhọn bhi ẹmhọn oghẹ, sokpan ọ kie re ọle manman nọghọ. (Col. 3:5; Jas. 1:14, 15) Bhi ọsi ẹmhọanta, ẹbho ne ghe foto la filmu ọsi ẹbho ne banọn an dọ ha gboghẹ.

12. Be imẹn ha rẹ rẹman yẹ ghe, mẹn dọnmhegbe rẹ rẹban foto ne ha sabọ re ọria ha ria ẹmhọn emhin ne bha gba?

¹² Be ọkhẹke nin Kristiẹn lu sade ifoto ọsi ẹbho ne banọn an zegbere bhi foni la kọmputa nọnsele? Ọkhẹke nin mhan jẹje re ẹlo sibhọre. Ọ dẹ lẹkhẹ nin mhan rẹ lu ọnan sade mhan yere ghe, ikolu nin mhan bi Jehova ko mhọnlẹn hi emhin nọn ghan nẹ nin mhan mhọnlẹn. Bhi ọsi ẹmhọanta, ifoto eso ne bha khọ gbe bhọ dẹ sabọ re ọria munhẹn ha ria ẹmhọn oghẹ. Bezẹle nọn da khẹke nin mhan rẹban ele? Ranmhude mhan bha ho nin mhan lu emhin soso nọn ha re mhan dọ ha ria ẹmhọn oghẹ bhi ọkhọle, ọ ha rẹ dia khere. (Matt. 5:28, 29) Ọwanlẹn ọkpa bhi agbotu natiọle David nọn na bhi Thailand vae da yọle: “Mẹn ki nọọn egbe mẹn yọle, aharẹmiẹn ene ifoto bha khọ gbe, Jehova dẹ ha ghọnghọn sade mẹn ghe ele? Iria-eria nọn sẹnian rẹkpa mẹn rẹ lẹn emhin nọn khẹke nin mẹn lu.”

13. Be ha rẹkpa mhan rẹ sabọ ha lu emhin ne gba?

¹³ Ahamiẹn mhan mun ofẹn Osẹnobulua, mhan ki rẹban emhin nọn hi ki rẹ khin ne ida ti ọle bhọ. Ọne ofẹn nan ki rẹkpa mhan rẹ ha lu emhin ne gba. “Nan rẹ mun ofẹn Jehova hi umunhẹn ọsi ẹwanlẹn.” (Prov. 9:10) A wo re ọnan man bhi obọle nin ọhẹnhẹn bhi Proverbs uhọnmhọnlẹn nọnzi 9. Bhi enin, a da re okhuo ọbhebhe rẹ khọkhọ ẹwanlẹn ọsaje.

MIẸN ẸWANLẸN ỌSAJE ỌBHI EGBE

14. Ẹmhọn ikẹ nela a noo bhi Proverbs 9:1-6?

¹⁴ Tie Proverbs 9:1-6. Enan tẹmhọn ebi Jehova nin Aman nọn man mhan, nin ẹwanlẹn ọsaje na obọ ọle vae rẹ ha tie ẹbho yẹ. (Prov. 2:6; Rom. 16:27) Ọne Baibo da tẹmhọn udede uwa nọn mhọn ikazi ihinlọn. Ọnan rẹman ghe, Jehova ze emhin bhi obọ. Ọle miẹn ọrebhe ọbhi egbe ne ho nin ele luẹ emhin bhi obọ ọle beji ele ha da sabọ ha wanlan.

15. Be Osẹnobulua ho nin mhan lu?

¹⁵ Ijiẹmhin ọsi ọne okhuo nọn mundia nin ẹwanlẹn ọsaje nan tẹmhọnlẹn bhi Proverbs uhọnmhọnlẹn nọnzi 9 rẹkpa mhan rẹ lẹn ghe, Osẹ nọn manman ze emhin bhi obọ, nọn re emhin ne bunbun nin mhan Jehova khin. Beji ọne Baibo nan rẹman, ọne okhuo tie ẹbho vae bhi uwa nọnsọle nin ele dọ le ebale nọn mhẹn bhi unun nin ọle re elanmhẹn nyẹn, bi anyọn nin ọle mun khẹ ele. (Prov. 9:2) Rẹ deba ọnan, ulọnlẹn nọnzi 4 bi 5 ji mhan lẹn ghe, ọne okhuo nan nọn mundia nin ẹwanlẹn ọsaje taman ene iwanlan yọle: “Bha vae dọ le ebale nọnsẹmhẹn.” Bezẹle nọn da khẹke nin mhan vae bhi uwa ọsi ọne okhuo nan rẹ khọkhọ ẹwanlẹn ọsaje, yẹ le ebale nin ọle mun ọlẹn egbe ọbhi otọ? Ranmhude, Jehova guanọ nin imọn nesọle ha wanlan, sẹyẹ nin ele hẹi dọ deọbhi okhẹnan. Ọle bha ho nin mhan dọ lu emhin ne bha gba ne ha si ikuan-egbe ji mhan. Ọnin zẹle ọle re ẹwanlẹn ọsaje nin eria ne mun ofẹn ọlẹn. (Prov. 2:7) Ahamiẹn mhan gene mun ofẹn Jehova, mhan ki ha ho nin mhan lu ebe ti ọle bhọ. Mhan re ehọ ọbhi ọta ẹwanlẹn nesọle, sẹyẹ ọ ti mhan bhọ rẹ re obọ rẹkhan ele.—Jas. 1:25.

16. Be ofẹn Osẹnobulua nin Alain ha mhọnlẹn rẹ rẹkpa ọle yẹ rẹ ze emhin nọn mhẹn rẹ lu? Be ki nabhọre?

¹⁶ Bha ji mhan fẹ ebi ofẹn Osẹnobulua nin obhio mhan nin Alain ha mhọn rẹ rẹkpa ọle rẹ sabọ ze emhin nọn mhẹn rẹ lu yẹ. Ọwanlẹn bhi agbotu bi ọman-emhin bhi isiku ọne obhio mhan nan khin. Ọle da yọle: “Inian ẹbho ne bunbun nin mhan ko wẹnna ghe ifimu nan da re ẹbho ne banọn an man bii uwedẹ nọn rẹkpa ele rẹ manman luẹ ẹmhọn inegbe-nowọ.” Ọkpakinọn Alain lẹnmhin ghe ọnan iyi ẹmhọanta. Ọle da yọle: “Ranmhude mẹn hoẹmhọn Osẹnobulua, sẹyẹ mẹn mun ekpẹn nanlẹn, mẹn da wo rẹban ifimu ne sẹ iriọ. Mẹn da yẹ rẹkpa ene mhan ko wẹnna rẹ lẹn ebezẹle nin mẹn ida ghe ele.” Ọle da re obọ rẹkhan adia nọn na bhi obọ “ẹwanlẹn ọsaje” vae nọn yọle ghe, nin mhan wo ha khian bhi uwedẹ ọsi ilẹn-otọ-emhin. (Prov. 9:6) Uwedẹ nin Alain rẹ lu emhin da rẹso ẹbho nin ele ko wẹnna rẹ sẹbhọ ghe, ele da munhẹn ha luẹ Baibo yẹ ha vae bhi ikolo oga nesẹmhan.

17-18. Elele kẹkẹ nela eria ne ka nin ele rẹ miẹn ẹwanlẹn ọsaje ọbhi egbe miẹn nian? Be ele khuaẹloghe bhi ẹghe odalo? (Yẹ fẹ ifoto ghe.)

¹⁷ Jehova noo ijiẹmhin ọsi ene ikhuo veva nan rẹ rẹkpa mhan rẹ lẹn ebi mhan ha rẹ sabọ ha mhọn ẹghe odalo nin eghọnghọn ye yẹ. Ene re ehọ ọbhi usomhin ọsi ọne okhuo nọn mundia nin uuki wo ha sọnyẹnmhẹn bhi ilọnmhọn oghẹ. Bhi ọsi ẹmhọanta, ebi ele ha rẹ ha sọnyẹnmhẹn yẹ nian wo rẹtẹ ele. Ele izẹwẹ ria ẹmhọn ẹghe odalo. Uu emhin nin ele lu ha si ji ele.—Prov. 9:13, 17, 18.

¹⁸ Ọkpakinọn, ẹghe odalo ọsi ẹbho ne vae ọbhi uwa ọsi ọnẹ okhuo nọn mundia nin ẹwanlẹn ọsaje dẹ dikẹ. Ejayenan nian, ele wo ha ghọnghọn ranmhude ele lu emhin ne khẹke ne ha rẹkpa ele rẹ sabọ sikẹ Jehova. (Isa. 65:13) Rẹ na bhi obọ Ẹzaya nin akhasẹ, Jehova da yọle: “Bha ka mẹn ehọ nọnsẹn, bha ha le ebale nọn mhẹn. Bhiriọ, bha ki ha sọnyẹnmhẹn bhi ebe mhẹn bhi egbe.” (Isa. 55:1, 2) Mhan luẹ ebi mhan ha rẹ sabọ hoẹmhọn emhin nin Jehova hoẹmhọnlẹn yẹ, yẹ he emhin nin ọle hele. (Ps. 97:10) Sẹyẹ, ọ yẹẹ mhan rẹ ha tie ẹbho ebhebhe nin ele dọ luẹ emhin bhi obọ “ẹwanlẹn ọsaje.” Inian mhan diabe ene eguọmhandia ne mundia bhi eje manman yoyo bhi ọne agbaẹbho ha so yọle: “Ọnọn hi ki rẹ khin nọn bha lẹn eji a ye vae bhi enan.” Elele nin mhan bi ẹbho ne re ehọ ọbhi ọta ẹwanlẹn da miẹn iyi ọsi obhi ẹghe khere. Ene elele dẹ wo ha ribhọ, ele dẹ rẹkpa mhan rẹ nyẹnlẹn rẹ sẹbhi ighegheghe beji mhan ha rẹ wo ha mhọn ilẹn-otọ-emhin.—Prov. 9:3, 4, 6.

19. Beji Ecclesiastes 12:13, 14 rẹman, be ọkhẹke nin mhan muegbe rẹ lu? (Fẹ ọne ẹkpẹti ghe nọn yọle, “Elele Nabhọre Sade Mhan Mun Ofẹn Osẹnobulua.”)

¹⁹ Tie Ecclesiastes 12:13, 14. Ekpẹn nọn dinmhin nin mhan mhọn da Jehova dẹ gbega ọkhọle nọnsẹmhan. Ọ dẹ rẹkpa mhan rẹ rẹban iẹnlẹn esankan, yẹ rẹkpa mhan rẹ sikẹ Osẹnobulua bhi ọne ẹghe nan nọn bha lẹkhẹ. Sẹyẹ, ranmhude mhan mun ofẹn Jehova, mhan ki ha guanọ nin mhan lu eka nin mhan ha sabọ lu rebhe rẹ rẹkpa ẹbho rẹ dọ re ehọ ọbhi ẹwanlẹn ọsaje yẹ miẹn elele bhọ.