Isẹlobhemhin

Ha Mhọn Ẹkẹ-ẹjẹjẹ Da Ọrebhe

Ẹdọkpa, obhio mhan nin okhuo nọn nyẹnlẹn bhi New Zealand da ghe ividio natiọle,“Have . . . Concern for One Another.” Ọne ividio da tẹmhọn ebi Jehova re mhọn ẹkẹ-ẹjẹjẹ yẹ, yẹ re ọle man. (Isa. 63:7-9) Ọne obhio mhan da zẹ nin ọle rẹ re obọ rẹkhan ebi ọle luẹle. Bhiriọ, ọle da ha guanọ uwedẹ nin ọle ha rẹ rẹkpa ẹbho. Ọle ki dọ dẹ emhin bhi istọ beji a ki zẹbue bhi ọne ukpẹdẹ nin, ọle da miẹn okhuo ọkpa nọn imhọn uwa, yẹ nọọn ọlẹn si ọle dẹ ebale nanlẹn. Ọne okhuo da ka. Ẹghe nin ọle ki rẹ dẹ ọne ebale mun ji ọle, ọle da noo ọne itrati natiọle, Iloya dẹ be fo ghee? rẹ nanlẹn zilo khere.

Ọne okhuo da gbeviẹ a. Ọle da taman ọne obhio mhan ghe, ẹkẹ agbotu a da bẹẹ ọle wanre, sokpan bhi ikpe ne bunbun nian, ọle bha yẹ ha ga Jehova. Ọle da yẹ yọle ghe, bhi ẹgheso nian, ọle wo ha bhii Jehova nọn rẹkpa ọle rẹ sabọ fikie bu ọle. One obhio mhan da mun Baibo nanlẹn, yẹ mhanmhanlẹn nin ele rẹ ko ha luẹ Baibo.a

Bọsi Jehova, mhan dẹ sabọ ha re ẹkẹ-ẹjẹjẹ man ẹbho, rẹ dọ sẹbhi ẹbho bhi azagba-uwa nọnsẹmhan, bi ibhio mhan bhi agbotu. Ẹkẹ-ẹjẹjẹ mhan yẹ rẹman sade mhan guanọ isẹhoa nin mhan ha rẹ tẹmhọn Osẹnobulua man ẹbho.