Bha Sun Rẹkhan Egbe

IJehova guanọ nin ‘bha ha sun rẹkhan egbe.’ (Micah 6:8) Asun rẹkhan egbe bhi ibọdọ bi iriokhuo, uhọnmhọn emhin kpataki nọn. Ranmhude, usun rekhan egbe ida ribhọ, ai sabọ gba ẹkẹ egbe. Agba ẹkẹ egbe, ọle ri ihoẹmhọn egbe deziẹn.

Ẹlẹnan nian, okhuo bi ọdọ ne sun rẹkhan egbe bha yẹ kpọ. Emhin eva ribhọ nọn khẹke nuwẹ ha lu, nuwẹ da sabọ gbega ibọdọ bi iriokhuo nọnsẹ.

1 JI IBỌDỌ BI IRIOKHUO NỌNSẸ HA YI EMHIN NUWẸ MUN KALO

EBI BAIBO TALE: ‘Lẹn emhin kpataki nọn khẹke nuwẹ ka ha lu.’ (Philippians 1:10) Ibọdọ bi iriokhuo nọnsẹ bha, ọkpa nọn bhi emhin kpataki nọn ke okhun nẹ bhi iẹnlẹn nọnsẹ bha. Ọkhẹke nin bha ha mun ọlẹn kalo.

IJehova guanọ nuwẹ denẹlo ọbhi okhuo ẹ la ọdọ ẹ. ‘Bha ko ha sọyẹnmhẹn bhi iẹnlẹn.’ (Ecclesiastes 9:9) IJehova ji mhan lẹn ghe, nin okhuo bi ọdọ hẹi fi-egbe ehọa. Nele ha guanọ odẹ nele arẹ ri egbe ha ghọnghọn. (1 Corinthians 10:24) Ha lu ebi okhuo ẹ la ọdọ ẹ arẹ lẹn ghe, uwẹ hoẹmhọnlẹn, ghe emhin nọnle lu ti uwẹ bhọ.

EBI UWẸ HA LU:

• Ibha ha noo ẹghe nọnsẹ bha kugbe ẹghe-ẹghẹ, bha manman ha ka egbe ehọ

• Ha ria ẹmhọn “imhan” ọiyi “imhẹn ọkpa”

2 GBEGA ỌKHỌLE NỌNSẸ

EBI BAIBO TALE: ‘Ọnọn muegbe ha ghe okhuo nọn iyi ọsọle, ha riale ebi ọle ha rẹ nọn nowẹ yẹ, ọki nọn gboghẹ fo bhi ẹkẹ ọkhọle nọnsọle.’ (Matthew 5:28) Ọria ha ria eria ne sankaan ẹghe rebhe, ọbha diriọ sun rẹkhan okhuo ọle la ọdọ ọle.

IJehova yọle ghe ọkheke nuwẹ ‘gbega ọkhọle nọnsẹ.’ (Proverbs 4:23; Jeremiah 17:9) Uwẹ kuẹ sabọ lu ọnan, uwẹ dẹ gbega ẹlo nọnsẹ. (Matthew 5:29, 30) Rẹkhan ukpo-oẹ nin Jobu zẹle bhi iBaibo. Jobu vi ive nin ẹlo nọnsọle ghe, ọle ida ri ẹlo oghẹlẹ ghe okhuo ọbhebhe. (Job 31:1) Vi ive ghe, uwẹ ida ghe adudu ọsi eria nẹ banọnre. Taman egbe nọnsẹ ghe, uwẹ ida nin ọria ọbhebhe khiẹn ikhẹnlẹn nọn khẹke okhuo ẹ la ọdọ ẹ ọkpa.

EBI UWẸ HA LU:

• Ji ẹbho lẹn ghe uwẹ manman hoẹmhọn ọdọ ẹ la okhuo ẹ, ọle ọkpa uwẹ sun rẹkhan

• Ha ria ebi emhin dia odọ ẹ la okhuo ẹ yẹ bhi egbe. Ukokhian nuwẹ lẹn ghe ọbha yẹẹ ọdọ ẹ la okhuo ẹ, re obọ sibhọ re ẹjiẹje