Ebi Bha Rẹ Ha Nin Ibhio Bha Nyẹn Bhi Ọfure Yẹ

Ibọdọ bi iriokhuo, ọle mun azagba-uwa ọsọgbọn hẹn. Lẹn ghe, okhuo ẹ la ọdọ ẹ, ọle ki ọria kpataki nuwẹ sikẹ nẹ bhi onin otọ nan, arẹmiẹn ghe, uwẹ dẹ sẹyẹ ha mhọn ahoẹmhọn-egbe bi ekpẹn da ene biẹ ẹ. Asabọ miẹn ọnan ida lẹkhẹ nin ibhio bha eso. Ọkpa kinọn, adia nọn ribhi Baibo dẹ sabọ rẹkpa bha rẹ ha ri ẹwanlẹn khian. Bhiriọ, ọfure ki ha ribhi ẹwẹ bha, beji bha rẹ manman ha wẹnna nin bha rẹ mun azagba-uwa ọsọgbọn nọnsẹ bha mudia.

1 UWEDẸ NỌN KHẸKE NIN BHA RẸ HA GHE IBHIO BHA

EBI BAIBO TALE: ‘Mun ekpẹn nin aba ẹ bi inẹn ẹn.’ (Ephesians 6:2) Ebi uwẹ irẹ wanre sẹyẹ, ọkhẹke nuwẹ ha mun ekpẹn bi ọghọ nin ene biẹ ẹ. Lẹn ghe, ọkhẹke nin ọdọ ẹ la okhuo ẹ yẹ ha gbẹloghe aba le bi inẹn ọlẹn. ‘Ahọẹmhọn-egbe i mhọn ẹlobhọ,’ bhiriọ, hẹi ji ofẹn ha muẹn ghe okhuo ẹ la ọdọ ẹ dẹ hoẹmhọn enebiọle gbera ẹ ranmhude ọle gbẹloghe ele.—1 Corinthians 13:4; Galatians 5:26.

EBI UWẸ HA LU:

• Hẹi a hian ba ọta. Bọsi ijiẹmhin, hẹi yọle “Eghe rebhe azagba-uwa sẹbha rẹ wo zanọn mhẹn an” la “Ebi mhẹn lu i gbo mun inẹn bhi ẹlo”

• Ha dọnmhegbe nurẹ daghe emhin beji okhuo ẹ la ọdọ ẹ rẹ ghọle

2 MUDIA BHI EBI UWẸ TALE SADE ỌKHẸKE

EBI BAIBO TALE: ‘Okpea ki zi aba ọle bi inẹn ọlẹn obọ, ọle ki deba aamhẹn olẹ, ele ki dọ ha yi efun-egbe ọkpa.’ (Genesis 2:24) Aba ẹ bi inẹn ẹn dẹ sabọ ha riale ghe, ele sẹyẹ mhọn obọ bhi egbe ẹ, uwẹ arẹ bọdọ la uwẹ arẹ re okhuo. Ele ki sẹyẹ a ho nele ha talọ bhi ibọdọ bi iriokhuo nọn sẹbha, gbera beji ọkhẹke.

Obọ nọnsẹ bha veva ọki ye. Bha koko zilo eji bha da re otọ nin aba bi inẹn bha sẹ, rẹ ha talọ bha bhi iẹnlẹn. Bha sẹyẹ koko ri ọyẹẹ taman ele. Bha dẹ sabọ taman ele bhi uwẹdẹ ọsi ekpẹn. (Proverbs 15:1) Idegbere, ifuẹkẹ bi iziengbe dẹ rẹkpa bha rẹ deba ibhio bha ha mhon ukokhian nọn zeze. ‘Bha re ahoẹmhọn-egbe a nin egbe khian.’ —Ephesians 4:2.

EBI UWẸ HA LU:

• Ahamiẹn beji ibhio okhuo ẹ la ọdọ ẹ rẹ ha talọ bhi ẹmhọn nọnsẹ bha bha yẹẹ ẹ, deba ọdọ ẹ la okhuo ẹ zilọ ọle, sade emhin ki lọre

• Bha veva koko tale, yẹ re obọ bhọ ebi bha arẹ rọ khian yẹ