‘Bha Wo Ha Ria Eria Nyan Ene Emhin Nan’

Emhin nela a yọle nin mhan ha ria eria nyan? Ebe nọnsi Philippians 4:8 da yọle: “Emhin ẹmhọanta, ebe yi emhin kpataki, emhin ne khiale, emhin ne mhẹn, emhin nan tẹmhọn ọlẹn nọnsẹn, emhin ne gbale bi emhin nan sabọ gẹn.” A bha re ọnan yọle ghe iBaibo ọkpa mhan ha wo ha ria ẹmhọn ọlẹn ẹghe rebhe. Ọkpakinọn, ọkhẹke nin emhin nin mhan ria ẹghe rebhe ha yi emhin ne yẹẹ iJehova. Ọ bha khẹke nin mhan ha ria eria nyan emhin soso nọn ha re ọle nọghọ mhan rẹ ha ga iJehova nọnsẹn.—Ps 19:14.

Ọ iyi emhin nọn lẹkhẹ nin mhan rẹ rẹban iria-eria ne bha gba. Ranmhude ọbha gba nin mhan, emhin ne yẹẹ efun egbe wo kẹ na mhan bhi ọkhọle. Sẹyẹ, Esu wo re ọle nọghọ nin mhan. Ọle hi “osẹ ọsi ọne agbọn nan.” (2Co 4:4) Ọle mhọn obọ bhi emhin ne bunbun ne bha gba nan rẹman bhi tẹlẹvisiọn, intanẹt, radio bi ebe kẹkẹ. Bhiriọ, ọkhẹke nin mhan ha re ẹwanlẹn zẹ emhin nin mhan ghe bi emhin nin mhan tie. Ranmhude, emhin ne na mhan bhi ọkhọle, ele mhan ria eria nyan. Sẹyẹ, emhin nin mhan ria eria nyan, ele mhan lu.—Jas 1:14, 15.

GHE ỌNE IVIDIO NATIỌLE RẸBAN EMHIN NE HA SABỌ RE ASUN-RẸKHAN NỌNSẸMHAN WẸGHẸA—IREGBE RE AHOHO NỌN BHA GBA. BHA HA KI GHE ỌLE FO, WANNIẸN ENE INỌNTA NAN:

• 

  Be ọne obhio mhan bhi ọne ividio ha ghe bhi ifoni nọnsọle? Be emhin nin ọle ha ghe rẹ ha ria ọle a yẹ?

• 

  Be ẹmhọn nọn ribhi Galatians 6:7, 8 bi Psalm 119:37 rẹ rẹkpa ọle yẹ?