Uwẹ Be Yẹ Yere?

Uwẹ be sẹ gbẹlokotọ tie ene ebe Ọkhẹughe nan ne dagbare bhi ọne ukpe nan? Fẹghe si uwẹ dẹ sabọ re ewanniẹn ọbhi ene inọnta nan:

Elele nela mhan ha miẹn sade mhan noo ẹghe nọnsẹmhan rẹ ha ne Jehova talọ, ka ọle ehọ, yẹ ria ẹmhọn ọlẹn?

Mhan ki sabọ ha zẹ emhin ne mhẹn rẹ lu, ha man emhin nọnsẹn, ha mhọn urẹọbhọ nọn ziẹnlẹn, yẹ manman hoẹmhọn Jehova.—w22.01, apapale 30-31.

Be imhan ha rẹ miẹn urẹkpa yẹ sade mhan luẹ rẹ ha mun udu nyan Jehova, bi ene ọle ne ọbhi ihe?

Ejayenan ọ rẹ khẹke nin mhan luẹ rẹ ha gbaẹkẹ uwedẹ nin Osẹnobulua rẹ lu emhin, beji mhan ha rẹ ha re obọ rẹkhan adia bi emhanmhan ọsi ene ewanlẹn. Ẹghe nin ekpokpo nọn khua ha rẹ munhẹn, mhan ki sabọ muegbe rẹ re obọ rẹkhan ebi a taman mhan, aharẹmiẹn a taman mhan nin mhan lu emhin ne bha mun mhan ẹlo kore, la ne bha lẹkhẹ nan rẹ re obọ rẹkhan.—w22.02, apapale 4-6.

Be ọne ẹhi tẹmhọnlẹn ẹghe nin ọle rẹ taman Zechariah ẹmhọn “ukpiri nan rẹ maan emhin [nọn ribhi] obọ ọsi [Gọvanọ nin] Zerubbabel”? (Zech. 4:8-10)

Ọne imianlo nan da rẹkpa ẹbho nesi Osẹnobulua rẹ lẹn ghe, a dẹ bọn ọne uwa oga nin ele bọn sotọ, yẹ ha yi ebi Osẹnobulua ho nọn dia.—w22.03, apapale 16-17.

Be imhan ha rẹ sabọ “ha yi ijiẹmhin . . . uwedẹ nin [mhan] rẹ talọ” yẹ? (1 Tim. 4:12)

Mhan ki re uwedẹ ifuẹkẹ bi ekpẹn rẹ ha ne ẹbho talọ bhi inẹbho, re ọkhọle rebhe ha so illo, yẹ re ewanniẹn ọbhi inọnta ẹghe rebhe bhi ikolo oga, ha ta ẹmhọanta, yẹ bọn ẹbho okhun, sẹyẹ rẹban ihẹn nan khunmhun.—w22.04, apapale 6-9.

Bezẹle nin ene emhin nin elanmhẹn ẹwẹ enẹn (ene ugbẹloghe) mhọn nan tẹmhọnlẹn bhi Daniẹl uhọnmhọnlẹn 7 da ha ribhi egbe ọsi elanmhẹn ẹwẹ ọkpa nan tẹmhọnlẹn bhi Revelation 13:1, 2?

Ọne elanmhẹn ẹwẹ nan tẹmhọnlẹn bhi Revelation 13 bha mundia nin gọvamẹnt ọkpa, bọsi Romu. Sokpan, ọ mundia nin gọvamẹnt rebhe ne sẹ gbẹloghe ọne agbọn nan.—w22.05, apapale 9.

Uwedẹ kpataki nela mhan ha rẹ rẹman yẹ ghe mhan rẹọbhọ ghe Osẹnobulua dẹ sabọ bhohiẹn bhi uwedẹ nọn gbale?

Ahamiẹn ọria khunmhun imhan, lu emhin nọn re ẹkẹ khọ mhan, la lu mhan emhin ebe, mhan ki dọnmhegbe nin mhan hẹi re ọne ẹmhọn gbanọ bhi ẹkẹ. Mhan ki zẹ ọne ẹmhọn obọ nin Jehova. Ọle dẹ re ikuan-egbe rebhe kie nin olukhọ sire.—w22.06, apapale 10-11.

Be ọkhẹke nin obhio mhan nin okpea nọn nan erọnmhọn bhi ikolo oga ha mhọn bhi ọkhọle?

Ahamiẹn mhan bhii, ọ bha khẹke nin mhan ha noo ọle rẹ re adia nin ibhio mhan bhi agbotu, la rẹ ha taman ele emhin kẹkẹ. Ọ bha khẹke nin mhan ha noo “ọta ne bunbun” sade mhan bhii, manman nọn ahamiẹn a khian mun ikolo hẹn. (Matt. 6:7)—w22.07, apapale 24-25.

Uwedẹ nela ẹbho ne “lu khọlọ” ha rẹ miẹn “uriọkpanọ ọsi ibhohiẹn”? (John 5:29)

A ida re uwedẹ nin ele rẹ ka nyẹnlẹn rẹ bhu ele ohiẹn. A dẹ re uwedẹ nin ele rẹ nyẹnlẹn sade a riọ ele kpanọ fo bhi uu rẹ bhu ele ohiẹn.—w22.09, apapale 18.

Ọta izebhudu nela obhio mhan nin J. F. Rutherford rẹman bhi usikoko bhi Sẹtẹmba 1922?

Bhi usikoko bhi Cedar Point, Ohio, U.S.A., ọle da da yọle: “Ọne Ojie munhẹn ha gbẹloghe! Bha mhọn ọne isẹhoa nin bha rẹ ta ọnan man ọrebhe. Bhiriọ, bha wewe ọle, wewe ọle, wewe ọle, ọne Ojie bi Agbejele nọnsọle!”—w22.10, apapale 3-5.

Uwedẹ ea nela Osẹnobulua rẹ rẹkpa mhan ziẹngbe nin Isaiah uhọnmhọnlẹn 30 tẹmhọnlẹn?

Ọne uhọnmhọnlẹn nan rẹman ghe, ọle (1) ka mhan ehọ sade mhan bhii ji ọle, yẹ re ewanniẹn ọbhọ, (2) ọle dia mhan, bi (3) ọle nan erọnmhọn nin mhan nian, yẹ lu iriọ bhi ẹghe odalo.—w22.11, apapale 9.

Bezẹle nin mhan ha da sabọ yọle ghe ene ọta ne ribhi Psalm 37:10, 11, 29 munsẹ bhi ẹghe ẹdẹlẹ, sẹyẹ, ọ dẹ munsẹ bhi ẹghe odalo?

Ene ọta nin Devid tale rẹman emhin esili ne sunu bhi otọ Izrẹl, bọsi ẹghe nin Solomọn rẹ ha gbẹloghe. Jesu da sunu bhi ulọnlẹn nọnzi 11 rẹ talọ ji agbọn ọfubhegbe nọn vade bhi ẹghe odalo. (Matt. 5:5; Luke 23:43)—w22.12, apapale 8-10, 14.