Re Egbe Khọkhọ Jehova Bi Jesu Bhi Uwedẹ Nin Uwẹ Rẹ Ria Eria

1-2. Be mhan ha lu nin mhan rẹ rẹman ghe mhan hoẹmhọn Jehova? Be Jesu rẹ re ọnan man yẹ?

“UWẸ dẹ re udu nọnsẹ rebhe, egbe nọnsẹ rebhe, ahu nọnsẹ rebhe bi ọkhọle nọnsẹ rebhe, rẹ hoẹmhọn Jehova nin Osẹnobulua nọnsẹ.” (Luk 10:27) Jesu da rẹman ghe, ọne uhi nan hi uhi nọn ke okhun nẹ bhi ẹwẹ uhi nin Jehova na bhi obọ Mozis gbe. Lẹn sẹbhọ ghe, mhan ha yọle ghe mhan hoẹmhọn Jehova, ọnin rẹman ghe mhan dẹ re udu rebhe, ebi mhan khu ọi, bi ebi emhin dia mhan yẹ bhi egbe rẹ re ọle man. Rẹ deba ọnin, mhan dẹ yẹ re egbe rebhe, bi ahu rebhe rẹ ha ga ọle. Sẹyẹ, mhan dẹ yẹ re ebi mhan ria bhi ọkhọle nọnsẹmhan rẹ rẹman ghe mhan hoẹmhọn Jehova. Bhi ọsi ẹmhọanta, mhan i da sabọ lẹn uwedẹ nin Jehova rẹ ria eria fo. Ọkpakinọn, mhan dẹ sabọ lẹn ebi ọle rẹ ria eria yẹ sade mhan lẹn “uwedẹ nin Kristi rẹ ria eria,” ranmhude Jesu wo re uwedẹ nin Aba ọle rẹ ria eria man.—1 Kọr. 2:16.

² Jesu da re ọkhọle rebhe rẹ hoẹmhọn Jehova. Jesu wo lẹn ebi Jehova guanọ bhi obọ ọle. Ọle da wo muegbe nin ọle rẹ lu iriọ arẹmiẹn ọle lẹnmhin ghe ọ dẹ si iloya ji ọle. Ọle da wo mun iho ọsi Aba ọle kalo bhi iẹnlẹn, sẹyẹ, ọle bha ji emhin soso da de ọle idobolo.

3. Be Pita nin odibo luẹ bhi obọ Jesu? Be Pita taman ene Kristiẹn nin ele lu? (1 Pita 4:1)

³ Pita bi ene etuegbe nekẹle wo miẹn ọne isẹhoa rẹ deba Jesu gbẹghe, yẹ luẹ emhin bhi uwedẹ nin ọle rẹ ria eria. Ẹghe nin Pita rẹ gbẹn ilẹta nin ọhẹnhẹn, ọle da taman ene Kristiẹn ghe nin ele yẹ muegbe rẹ ha ria eria bhi uwedẹ nin Jesu rẹ ria eria. (Tie 1 Pita 4:1.) Bhi urolo nin ọhẹnhẹn nin Pita rẹ gbẹn ọne ebe nan, ọle da gbẹn yọle: “Bha yẹ muegbe.” Ọle da noo ene ọta nan rẹ rẹman ghe, ene Kristiẹn dẹ muegbe beji eyokhọnlẹn rẹ muegbe ọbhi otọ sade ele ho nin ele dọ khọn. Bhiriọ, ahamiẹn Kristiẹn luẹ rẹ ha ria eria bhi uwedẹ nin Jesu rẹ ria eria, ele ki ha mhọn emhin nọn ha rẹkpa ele rẹ sabọ ha khọn ọne ọkhọle nan rẹ lu emhin ebe miotọ.—2 Kọr. 10:​3-5; Ẹfẹ. 6:12.

4. Be ọne uhọnmhọn-ọta nan ha rẹ sabọ rẹkpa mhan yẹ rẹ re obọ rẹkhan adia nin Pita re nin mhan?

⁴ Mhan dẹ zilo nyan uwedẹ nin Jesu rẹ ria eria bi ebi mhan ha rẹ re egbe khọkhọ ọle yẹ. Mhan dẹ luẹ bhi obọ Jesu ebi mhan ha rẹ (1) sabọ ha re egbe khọkhọ Jehova yẹ bhi uwedẹ nin ọle rẹ ria eria, nọn ha rẹkpa mhan rebhe rẹ ha mhọn ọkhọle ọkpa, (2) ebi mhan ha rẹ ha mhọn idegbere yẹ, bi (3) ebi mhan ha rẹ re ẹwanlẹn ha lu emhin yẹ beji mhan rẹ mun udu nyan Jehova bhi erọnmhọn.

RE EGBE KHỌKHỌ JEHOVA BHI UWEDẸ NIN ỌLE RẸ RIA ERIA

5. Ẹghe ọkpa nela Pita bha rẹ ha ria eria bhi uwedẹ nin Jehova rẹ ria eria?

⁵ Bha ji mhan zilo nyan ẹghe ọkpa nin Pita rẹ rẹman ghe ọle bha ha ria eria bhi uwedẹ nin Jehova rẹ ria eria. Jesu da taman ene etuegbe nesọle yọle ghe, ọle dẹ diọbhi Jerusalẹm. Bhi enin, ene mun ọkalo bhi oga ki mun ọlẹn, re oya nanlẹn, yẹ gbe ọle a. (Mat. 16:21) Pita lẹnmhin ghe Jesu hi ọne Mezaya nọn ha dọ miẹn ẹbho nesi Osẹnobulua fan. Bhiriọ, asabọmiẹn ọ da wo ha nọghọ ọle rẹ rẹọbhọ ghe Jehova dẹ gene re otọ nin ẹbho rẹ gbe Jesu a. (Mat. 16:16) Pita da re Jesu diọbhi obọ ọkpa yẹ taman ọlẹn yọle: “Tohan egbe ẹ, Ebeanlẹn imẹn; emhin nọn sẹ inian ida sunu ji uwẹ hiehie.” (Mat. 16:22) Ranmhude Pita bha ha ghe ọne ẹmhọn nan bhi uwedẹ nin Jehova rẹ ghe ọle, ọle zẹle nin ọle bha da ka rẹọbhọ.

6. Uwedẹ nela Jesu rẹ rẹman yẹ ghe ọle ria eria bhi uwedẹ nin Jehova rẹ ria eria?

⁶ Jesu wo ha ria eria bhi uwedẹ nin Aba ọle nọn ribhi okhun rẹ ria eria. Jesu da taman Pita yọle: “Gbera diọ imẹn bhi ikeke, Esu! Idobolo uwẹ khin rẹji imẹn. Ranmhude, uwedẹ nin eria rẹ ria eria, ọle uwẹ rẹ ria eria, ọ iyi uwedẹ nin Osẹnobulua rẹ ria eria.” (Mat. 16:23) Asabọmiẹn emhin esili Pita ha mhọn bhi ọkhọle bhi ẹghe nin ọle rẹ ta ọne ọta nin man Jesu, ọkpakinọn, Jesu bha miẹn ọne ibhude ọbhi egbe. Mhan dẹ wo sabọ miẹn emhin luẹ bhi ọnan. Ọnan da wo man Pita le ghe, ọkhẹke nin ọle ha ria eria bhi uwedẹ nin Jehova rẹ ria eria.

7. Be Pita ki rẹ rẹman yẹ ghe ọle ho nin ọle ha ria eria bhi uwedẹ nin Jehova rẹ ria eria? (Fẹ adudu nọn ribhi odalo ọle ghe.)

⁷ Akizẹbue, Pita da rẹman ghe ọle ho nin ọle ha ria eria bhi uwedẹ nin Jehova rẹ ria eria. Ọne ẹghe da sẹ nin ẹbho ne i yi ibhokhan Ju rẹ dọ deba ẹbho nesi Osẹnobulua. Osẹnobulua da je Pita nọn dọ tẹmhọn ọlẹn man Kọniliọs. Kọniliọs hi ọria ọhẹnhẹn nọn i yi obhokhan Ju nọn dọ kiẹn Kristiẹn. Ibhokhan Ju i ne ẹbho ne i yi ibhokhan Ju muobọ, bhiriọ, ọ dẹ khẹke nin Pita fi uwedẹ nin ọle rẹ ria eria denọ beji ọle ha da sabọ tẹmhọn Osẹnobulua man ene i yi ibhokhan Ju. Beji Pita ki dọ lẹn emhanmhan nọnsi Jehova rẹji ẹbho ne i yi ibhokhan Ju, ọle da fi iria-eria nọnsọle denọ. Ranmhude ọnan, ọle da bu Kọniliọs dọ tẹmhọn Osẹnobulua man ọlẹn, ọle “bha siegbe re ikeke.” (Iwẹn. 10:​28, 29) Ọle da tẹmhọn Osẹnobulua man Kọniliọs bi azagba-uwa nọnsọle. Bhiriọ, ele da mianmẹn.—Iwẹn. 10:​21-23, 34, 35, 44-48.

8. Be mhan ha rẹ rẹman yẹ ghe mhan ria eria bhi uwedẹ nin Jehova rẹ ria eria? (1 Pita 3:8)

⁸ Ikpe eso ki gbera, Pita da taman ibhio ọle nin ele ko ga nin ele ha “mhọn ọkhọle ọkpa.” (Tie 1 Pita 3:8) Mhan dẹ sabọ deba ibhio mhan bhi agbotu ha mhọn ọkhọle ọkpa, sade mhan re egbe khọkhọ Jehova bhi uwedẹ nin ọle rẹ ria eria nin mhan luẹle bhi Baibo. Bhi ọsi ijiẹmhin, Jesu yọle nin ene rẹkhan ọlẹn ha mun ẹmhọn Agbejele kalo bhi iẹnlẹn. (Mat. 6:33) Ranmhude ọnan, ọria bhi agbotu nin mhan ye sabọ rẹ zẹ ghe ọle ho nin ọle ha lu iwẹnna ọkanẹfan, la lu iwẹnna oga ọsi ẹghe rebhe. Ọ bha khẹke nin mhan taman ọlẹn nin ọle dọ zẹ emhin ọbhebhe rẹ lu bhi iẹnlẹn. Ọkpakinọn, ọkhẹke nin mhan ji ọle lẹn ghe emhin esili ọle zẹ rẹ lu, mhan ha yẹ dọnmhegbe rẹ rẹkpa ọle.

HA MHỌN IDEGBERE

9-10. Be Jesu rẹ manman re idegbere man yẹ?

⁹ Ọne ukpasọn ọkuẹsẹ Jesu yu, ọle da man Pita bi ene etuegbe nekẹle emhin kpataki rẹji ẹmhọn idegbere. Ọkuẹsẹ ọne ẹghe nan, Jesu da je Pita bi Jọni nin ele dọ hẹnhẹn emhin ọbhi otọ, ranmhude ebale nọn kike nin ọle ha deba ele le. Rẹ deba ene emhin kẹkẹ nin ele dọ hẹnhẹn ọbhi otọ, asabọmiẹn ele yẹ mun itasa, bi ukpọn nan rẹ ka amẹn bhi egbe ọbhi otọ beji a ha da miẹn ẹbho ne ha vae ki sabọ kpe oẹ nọnsele a ọkuẹsẹ ele le ebale. Ọkpakinọn, họla da gene degbere kpe oẹ ọsi ẹbho ne vae?

¹⁰ Jesu bha ha siegbe re ikeke rẹ miẹn ọne ẹsọn nan, ọle da wo rẹman ghe ọle mhọn idegbere. Ọ da wo han ene etuegbe ilo rẹ daghe Jesu miẹn ẹsọn nọn khẹke nin igbọn ha lu. Jesu da kuọ ukpọn nọnsọle, yẹ diẹn ọne ukpọn nan rẹ ka amẹn bhi egbe ọbhi akun. Ọle da sa amẹn ọbhi ọne tasa yẹ munhẹn ha kpe oẹ ọsi etuegbe nesọle. (Jọni 13:​4, 5) Asabọmiẹn ọ re Jesu ẹghe rẹ sabọ kpe oẹ ọsi etuegbe 12 nesọle fo, rẹ dọ sẹbhi Judas nọn ha khiẹn ọlẹn nan gbe. Idegbere Jesu rẹ miẹn ọne ẹsọn nan sotọ. Jesu da fẹkẹ taman ele yọle: “Emhin nin mẹn lu nan be mun bha ẹlo kore? ‘Ebeanlẹn imhan’ bi ‘Ọman-emhin,’ ọle bha tie mẹn le. Ibha bha bha ohoghe ranmhude ọle mẹn gene khin. Ahamiẹn imẹn nin Ọman-emhin, bi Ebeanlẹn ibha kpe oẹ nọnsẹbha, ọ bha be khẹke nin bha ha kpe oẹ ọsi ibo bha?”—Jọni 13:​12-14.

11. Be Pita rẹ rẹman yẹ ghe ọle luẹ ebi a rẹ mhọn idegbere yẹ? (1 Pita 5:5) (Yẹ fẹ ifoto ghe.)

¹¹ Pita wo miẹn emhin luẹ bhi uwedẹ nin Jesu rẹ re idegbere man. Ẹghe nin Jesu ki rẹ ha khian okhun fo, Pita da re egbe daan okpea ọkpa nọn ha yi akhun rẹ nabhi ẹghe nan rẹ biẹ ọle. (Iwẹn. 1:​8, 9; 3:​2, 6-8) Ẹbho ne bunbun ne daghe ọne emhin ọhan-ilo nan da vẹ nẹga Pita. (Iwẹn. 3:11) Arẹmiẹn ẹbho manman guanọ nan ha gẹn ele bhi eji Pita na vae, Pita bha ha guanọ nin ene usun ẹbho ha gẹn ọlẹn bhi ọne emhin ọhan-ilo nin ọle lu. Ọkpakinọn, ọle da re idegbere taman ene ẹbho nin ele gẹn Jehova bi Jesu. Ọle da taman ele yọle: “Ranmhude elin nọnsi Jesu, bi urẹọbhọ nin mhan mhọn da ọne elin, ọle zẹle nin egbe da daan ọne okpea nan nin bha daghe bhi enan ẹlẹnan.” (Iwẹn. 3:​12-16) Akizẹbue, Pita da gbẹn ji ene Kristiẹn rẹ ji ele lẹn ebezẹle nọn da khẹke nin ele ha mhọn idegbere. Bhi urolo nin ọhẹnhẹn nin ọle rẹ gbẹn ọne ilẹta, ikpọta nin ọle noo da rẹman ghe ọkhẹke nin ene Kristiẹn re idegbere rẹ hiẹn egbe beji a rẹ re ukpọn hiẹn egbe. Ọnan wo rẹkpa mhan rẹ yere ẹghe nin Jesu rẹ diẹn ukpọn nan rẹ ka amẹn bhi egbe ọbhi akun, yẹ kpe oẹ ọsi etuegbe nesọle.—Tie 1 Pita 5:5.

12. Be mhan ha rẹ sabọ re idegbere man yẹ beji Pita lu?

¹² Mhan dẹ sabọ re egbe khọkhọ Pita bhi uwedẹ nin ọle rẹ ha mhọn idegbere. Yere ghe ọ i yi ebi mhan ta ọkpa mhan ha rẹ sabọ rẹman ghe mhan mhọn idegbere. Ọne ukpọta nin Pita noo nọn mundia nin idegbere, rẹman ghe ọria nọn mhọn idegbere i da ha ria ẹmhọn egbọle ọkpa, ọ dẹ yẹ ha ria ẹmhọn eria ebhebhe. Ranmhude mhan hoẹmhọn Jehova bi ẹbho zẹle nin mhan da rẹkpa ẹbho, ọ i yi ranmhude nin ele ha gẹn mhan zẹle. Mhan dẹ rẹman ghe mhan gene mhọn idegbere sade mhan re eghọnghọn ha ga Jehova bi ibhio mhan aharẹmiẹn ẹbho i daghe ebi mhan lu.—Mat. 6:​1-4.

“BHA JI ẸWANLẸN GBA NIN BHA”

13. Be a re ọle ta nin ọria rẹ ji ẹwanlẹn gba nanlẹn?

¹³ Be a re ọle ta nin ọria rẹ ji ẹwanlẹn gba nanlẹn? (1 Pita 4:7) Kristiẹn nin ẹwanlẹn gba nan dọnmhegbe rẹ zẹ ebe mhẹn rẹ lu nọn ha rẹman ghe ọle ria eria bhi uwedẹ nin Jehova rẹ ria eria. Ọria nọn sẹriọ lẹnmhin ghe emhin soso i ribhọ nọn lu uhọnmhọn-emhin sẹ bii ikolu nin ọle bi Jehova ko mhọnlẹn. Ọle lẹn eji ọle ha sabọ lu sẹ, ọle i riale ghe ọle lẹn emhin rebhe. Ọle yẹ nan erọnmhọn ji Jehova ẹghe-ẹghe rẹ rẹman ghe ọle mun udu nyan ọlẹn.a

14. Ẹghe ọkpa nela Pita rẹ rẹman ghe ọle bha mun udu nyan Jehova?

¹⁴ Bhi ọne ukpasọn ọkuẹsẹ Jesu yu, ọle da taman edibo nesọle yọle: “Ranmhude ebe ha sunu ji imẹn ọne ukpasọn nan, urẹọbhọ nọnsẹbha rebhe dẹ wẹghẹ a.” Pita rẹ ha riale ghe ọle wo manman deziẹn, bhiriọ ọle da wanniẹn Jesu yọle: “Aharẹmiẹn urẹọbhọ ọsi enekẹle nan rebhe wẹghẹ a ranmhude ebe ha sunu ji uwẹ, a bha miẹn ebe ha re urẹọbhọ nọnsẹmhẹn wẹghẹ a!” Bhi ọne ukpasọn nin, Jesu da taman eso bhi edibo nesọle yọle: “Ibha wo ha babegbe, ibha ha wo ha nan erọnmhọn ẹghe rebhe.” (Mat. 26:​31, 33, 41) Pita bha re obọ rẹkhan ọne adia nan. Sade ọle re obọ rẹkhan ọlẹn nọn, ọle ha rẹ sabọ yọle ghe odibo nọnsi Jesu ọle khin bhi ẹghe nan rẹ nọọn ọlẹn. Ọkpakinọn, Pita da yọle ghe ọle bha lẹn Jesu, ọnan bhọ da wo manman ba ọle bhi egbe.—Mat. 26:​69-75.

15. Be Jesu rẹ rẹman yẹ ghe ọle mhọn ẹwanlẹn bhi ọne ukpasọn ọkuẹsẹ ọle yu?

¹⁵ Jesu wo re ọkhọle rebhe mun udu nyan Jehova. Arẹmiẹn ọ gba nin Jesu, ọle da yẹ ha nan erọnmhọn igba ne bunbun. Ọnan bhọ hi ebe rẹkpa ọle rẹ sabọ lu iho nọnsi Jehova. (Mat. 26:​39, 42, 44; Jọni 18:​4, 5) Bhi ọsi ẹmhọanta, Pita bha yele a ghe Jesu wo ha nan erọnmhọn igba ne bunbun bhi ọne ukpasọn ọkuẹsẹ ọle yu.

16. Be Pita rẹ rẹman yẹ ghe ọle ji ẹwanlẹn gba nanlẹn? (1 Pita 4:7)

¹⁶ Beji ẹghe ki rẹ ha khian, Pita da dọ manman ha nan erọnmhọn ji Jehova rẹ rẹman ghe ọle mun udu nyan ọlẹn. Ẹghe nin Jesu ki rẹ riọkpanọ bhi uu, ọle da ji Pita bi ene etuegbe nekẹle lẹn ghe, a dẹ je ẹlinmhin nọn khiale ji ele beji ele ha da sabọ wewe ọne ọta nọn mhẹn man ẹbho. Ọkpakinọn, Jesu da taman ele nin ele mundia bhi Jerusalẹm rẹ sẹbhi ẹghe nin ọnan ha rẹ sunu. (Luk 24:49; Iwẹn. 1:​4, 5) Be Pita ki ha lu bhi ẹghe nin ọle rẹ ha khẹ Jesu? Pita bi ibhio ọle nin ele ko ga “da kugbe ha nan erọnmhọn.” (Iwẹn. 1:​13, 14) Akizẹbue, bhi ilẹta nin ọhẹnhẹn nin Pita gbẹn ji ene Kristiẹn, ọle da taman ele ghe nin ele ji ẹwanlẹn gba nin ele, ele ha yẹ ha nan erọnmhọn rẹ rẹman ghe ele mun udu nyan Jehova. (Tie 1 Pita 4:7.) Pita wo ha mun udu nyan Jehova, sẹyẹ, ọle da wo sabọ ha rẹkpa ibhio ọle bhi ẹkẹ agbotu.—Gal. 2:9.

17. Aharẹmiẹn mhan sabọ tobọmhan lu emhin eso, be ọkhẹke nin mhan wo ha lu? (Yẹ fẹ ifoto ghe.)

¹⁷ Nin mhan rẹ sabọ ha yi ọria nọn mhọn ẹwanlẹn, ọkhẹke nin mhan ha nan erọnmhọn ji Jehova ẹghe-ẹghe. Aharẹmiẹn mhan sabọ tobọmhan lu emhin eso, ọ yẹ khẹke nin mhan ha nan erọnmhọn ji Jehova nin ọle ha dia mhan. Bhiriọ, ọkhẹke nin mhan ha nan erọnmhọn ji Jehova nin ọle rẹkpa mhan, manman nọn sade mhan ho nin mhan zẹ emhin kpataki rẹ lu bhi iẹnlẹn, ranmhude Jehova lẹn emhin nọn mhẹn nẹ nọn ha mhẹn mhan bhi egbe.

18. Be mhan ha rẹ sabọ ha ria eria bhi uwedẹ nin Jehova rẹ ria eria yẹ?

¹⁸ Ọ manman wo re mhan ghọnghọn rẹ lẹn ghe, Jehova man mhan bhi uwedẹ nin mhan ha rẹ sabọ re egbe khọkhọ ọle bhi ikpẹ esili nin ọle rẹman. (Gen. 1:26) Bhi ọsi ẹmhọanta, mhan i da wo sabọ re egbe khọkhọ Jehova fo. (Isa. 55:9) Ọkpakinọn, ọkhẹke nin mhan dọnmhegbe ha ria eria bhi uwedẹ nin Jehova rẹ ria eria beji Pita lu. Ọ yẹ khẹke nin mhan ha mhọn idegbere, yẹ ji ẹwanlẹn gba nin mhan.