Ha Mhọn Idegbere Sade Emhin Ribhọ Nin Uwẹ Bha Lẹn Otọle Nọnsẹn

1. Uwedẹ nela Jehova rẹ man mhan? Bezẹle?

JEHOVA man mhan bhi uwedẹ nin mhan ha rẹ sabọ ha ria eria, lẹn otọ emhin, yẹ re ẹwanlẹn lu emhin. Bezẹle nin ọle da re iriọ man mhan? Ranmhude ọle guanọ nin mhan “ha mhọn ilẹn-emhin” nọnsọle, yẹ noo ẹwanlẹn nọnsẹmhan beji mhan rẹ ga ọle.—Prov. 2:​1-5; Rom 12:1.

2. (a) Be ọkhẹke nin mhan lẹn rẹji egbe mhan? (Job 37:​23, 24) (Yẹ fẹ ifoto ghe.) (b) Elele nela mhan ha miẹn sade mhan re idegbere miẹnkue ghe, mhan bha lẹn emhin rebhe?

² Arẹmiẹn a man mhan bhi uwedẹ nin mhan ha rẹ sabọ ha lẹn emhin, emhin ne bunbun ribhọ nin mhan bha lẹn. (Tie Job 37:​23, 24.) Bha ji mhan fẹ ijiẹmhin ọsi Jobu ghe. Jehova da wo nọọn ọlẹn inọnta ne bunbun. Ọnan da wo rẹkpa Jobu rẹ lẹn ghe, ọ i yi emhin rebhe ọle lẹn. Ọne ebe sunu nan da rẹkpa Jobu rẹ ha mhọn idegbere, yẹ fi iria-eria nọnsọle denọ. (Job 42:​3-6) Mhan dẹ yẹ miẹn elele sade mhan re idegbere miẹnkue ghe, ọ i yi emhin rebhe mhan lẹn. Idegbere nọn sẹriọ dẹ rẹkpa mhan rẹ mun udu nyan Jehova, ghe ọle dẹ rẹkpa mhan rẹ lẹn emhin nọn gene khẹke nin mhan lẹn, beji mhan ha da zẹ emhin nọn mhẹn rẹ lu.—Prov. 2:6.

3. Be mhan ha zilo nyan bhi ọne uhọnmhọn-ọta nan?

³ Bhi ọne uhọnmhọn-ọta nan, mhan dẹ zilo nyan emhin eso nin mhan bha lẹn, bi ọnọghọ nọn ha sabọ nabhọre nin mhan bha rẹ lẹn ọlẹn. Mhan dẹ yẹ zilo nyan ebezẹle nọn da yi emhin nọn mhẹn nin mhan bha rẹ lẹn emhin eso. Mhan ha zilo nyan ene emhin nan, ọ dẹ gene rẹkpa mhan rẹ rẹọbhọ ghe, Jehova nọn mhọn ilẹnmhin nọn gbale, dẹ rẹkpa mhan rẹ lẹn emhin nọn khẹke nin mhan lẹn.—Job 37:16.

MHAN BHA LẸN ẸGHE NAN HA RẸ RE ỌKPẸNLẸN ỌBHI ỌNE AGBỌN NAN

4. Beji Matiu 24:36 rẹman, be bhọ emhin nin mhan bha lẹn?

⁴ Tie Matiu 24:36. Mhan bha lẹn ẹghe nan ha rẹ re ọkpẹnlẹn ọbhi ọne agbọn nan. Jesu bhọ bha lẹn “ọne ukpẹdẹ nin bi ọne uriagogo”a nọn ha rẹ sunu beji ọle ribhi ọne otọ nan. Akizẹbue, ọle da taman edibo nesọle yọle ghe, Jehova ọkpa lẹn ẹghe nin ọle rẹyi nin emhin eso rẹ sunu. (Iwẹn. 1:​6, 7) Jehova re ẹghe yi nin ọne agbọn nan ha rẹ kpẹn, ọkpakinọn, ọ i ribhi ahu nọnsẹmhan rẹ lẹn ọne ẹghe nin tee nin Jehova rẹyi.

5. Ranmhude nin mhan bha rẹ lẹn ẹghe nin ọkpẹnlẹn ha rẹ vae, be ọ ha rẹ rẹso mhan yẹ?

⁵ Beji ọta nin Jesu tale rẹman, mhan bha lẹn eka ẹghe nin mhan ha ziẹngbe sẹ ọkuẹsẹ ọkpẹnlẹn vae. Ọnan bhọ sabọ re egbe lọ mhan, la rẹ mhan miẹn ghe mhan bha yẹ ha mhọn iziẹngbe, manman nọn sade ọ reele nin mhan mọn da ha khẹ ọkpẹnlẹn ọsi ọne agbọn nan. La ọ bhọ sabọ ha nọghọ mhan rẹ ziẹngbe ekpokpo nin mhan miẹn bhi obọ azagba-uwa nọnsẹmhan. (2 Pita 3:​3, 4) Mhan sabọ ha riale ghe, sade mhan lẹn ọne ẹghe nin tee nin ọkpẹnlẹn ha rẹ vae nọn, ọ ha rẹ rẹkpa mhan rẹ ha mhọn iziẹngbe, yẹ ziẹngbe ekpokpo.

6. Bezẹle nọn da yi emhin nọn mhẹn nin mhan bha rẹ lẹn ẹghe nin ọkpẹnlẹn ha rẹ vae?

⁶ Jehova wo re ọne isẹhoa nin mhan rẹ rẹman ghe ranmhude mhan hoẹmhọnlẹn, yẹ mun udu nyan ọlẹn zẹle nin mhan da ga ọle. Uwedẹ nin ọle rẹ lu ọnan hi, nin ọle bha rẹ taman mhan ọne ẹghe tee nin ọle ha rẹ re ọkpẹnlẹn ọbhi ọne agbọn nan. Mhan ho nin mhan ga Jehova rẹ ha khian ighegheghe, ọ i yi ranmhude ọkpẹnlẹn dẹ kẹ vae zẹle nin mhan da ga ọle. Ọ bha khẹke nin mhan ha ria ẹmhọn ọne ẹghe nin tee nin “ukpẹdẹ nọnsi Jehova” ha vae, ọkpakinọn, ọkhẹke nin mhan ha ria ẹmhọn emhin esili kẹkẹ ne ha sunu sade ọne ẹghe nin vae. Mhan ha lu iriọ, ọ ki rẹkpa mhan rẹ manman ha sikẹ Osẹnobulua, yẹ rẹkpa mhan rẹ ha lu ebe ti ọle bhọ.—2 Pita 3:​11, 12.

7. Emhin nela mhan lẹn?

⁷ Ọkhẹke nin mhan denọ ẹlo ọbhi ebi mhan lẹn. Mhan lẹnmhin ghe bhi ukpe 1914, ọle ẹghe ọkike ọsi ọne agbọn nan rẹ munhẹn. Bhi Baibo, Jehova da re akhasẹ ne bunbun rẹman ghe ọne ukpe nin, ọle ẹghe ọkike ọsi ọne agbọn nan rẹ munhẹn. Ọ da yẹ re emhin ne bunbun man ne da ha sunu rẹ na bhi ọne ẹghe nin ha vade. Ranmhude ọnan, mhan wo rẹọbhọ ghe “ukpẹdẹ nọn khua nọnsi Jehova sire.” (Zeph. 1:14) Mhan yẹ lẹn iwẹnna nin Jehova guanọ nin mhan lu. Ọnin hi, nin mhan rẹ dọ wewe “ọne ọta nọn mhẹn ọsi Agbejele” man ẹbho ne bunbun. (Mat. 24:14) Mhan wo ha wewe ẹmhọn ọne Agbejele nan bhi agbaẹbho ne bun sẹbhi 240, bhi urolo ne bun gbera 1,000. Ọ bha khẹke nin mhan lẹn “ọne ukpẹdẹ nin bi ọne uriagogo” nin ọkpẹnlẹn ọsi ọne agbọn nan ha rẹ vae fo, ọkuẹsẹ mhan dọ ha re ọyaya lu iwẹnna itẹmhọn Osẹnobulua.

MHAN BHA LẸN EBI JEHOVA HA RẸ LU EMHIN YẸ

8. Be a re ọne ukpọta “emhin rebhe nin Osẹnobulua ọsi ẹmhọanta lu” rẹ tẹmhọnlẹn? (Ecclesiastes 11:5)

⁸ Ọ i yi ẹghe rebhe mhan rẹ “lẹn emhin rebhe nin Osẹnobulua ọsi ẹmhọanta lu.” (Tie Ecclesiastes 11:5.) Ebi a re ọnan tẹmhọnlẹn hi, Jehova dẹ sabọ lu ọle nin emhin sunu la re otọ nin emhin rẹ sunu, beji iho nọnsọle ha da munsẹ. Mhan i da gene sabọ lẹn ebezẹle nin Jehova ha da sabọ re otọ ne emhin rẹ sunu, la ebi ọle ha lu rẹ rẹkpa mhan. (Ps. 37:5) A i sabọ lẹn ebi ọmọn rẹ wanre yẹ bhi ẹkẹ ọsi okhuo. Ekhẹn azemhinre bhọ bha sẹ lẹn otọ nan fo. Iriọ yẹ nọn, mhan i da sabọ lẹn iwẹnna obọ nọnsi Jehova fo.

9. Ranmhude mhan bha lẹn ebi Jehova ha rẹ rẹkpa mhan yẹ, be ọ ha rẹ rẹso mhan yẹ?

⁹ Ranmhude mhan bha lẹn ebi Jehova ha rẹ rẹkpa mhan yẹ, ọ dẹ sabọ re ọle nọghọ mhan rẹ zẹ emhin eso rẹ lu bhi iẹnlẹn. Ọ sabọ rẹ ha nọghọ mhan rẹ de obọ re bhi iẹnlẹn beji mhan ha da lu re alo bhi iwẹnna oga nin mhan lu, la diọbhi eji a da guanọ urẹkpa. Ahamiẹn mhan bha sabọ mun emhanmhan nin mhan khu ọi bhi ẹkẹ oga sẹ, la mhan bha miẹn ẹbho nin mhan ha man ele Baibo bhi iwẹnna itẹmhọn Osẹnobulua nin mhan lu, la mhan kuẹlo da ọkakale bhi ẹsọn nin mhan miẹn bhi ẹkẹ agbotu, ọ dẹ rẹ mhan ha riale si ẹmhọn mhan yẹ ti Jehova bhọ.

10. Nin mhan bha rẹ lẹn ebi Jehova ha rẹkpa mhan yẹ, ikpẹ nela ọ rẹkpa mhan rẹ ha mhọnlẹn?

¹⁰ Ranmhude nin mhan bha rẹ lẹn ebi Jehova ha rẹ rẹkpa mhan yẹ, ọ dẹ sabọ rẹkpa mhan rẹ ha mhọn idegbere. Ọnan ki rẹkpa mhan rẹ dọ kere ghe iria-eria nọnsi Jehova bi uwedẹ nesọle ke okhun nẹ ọsẹmhan. (Isa. 55:​8, 9) Ọ ki yẹ rẹkpa mhan rẹ manman mun udu nyan Jehova, yẹ rẹọbhọ ghe ọle dẹ re emhin rebhe ọi nọnsẹn. Ahamiẹn iwẹnna itẹmhọn Osẹnobulua nin mhan lu bi ẹsọn nin mhan miẹn bhi ẹkẹ agbotu wo ha lu re alo, ọkhẹke nin mhan ha re ọne ogẹn ji Jehova. (Ps. 127:1; 1 Kọr. 3:7) Ahamiẹn emhin bha sunu beji mhan rẹ mun ọkhọle ọi, ọkhẹke nin mhan yere ghe Jehova daghe emhin rebhe nọn sunu. (Isa. 26:12) Ọkhẹke nin mhan lu ọnọn khẹke mhan, mhan ha yẹ rẹọbhọ ghe Jehova dẹ lu ọnọn khẹke ọle. Mhan wo rẹọbhọ ghe Jehova dẹ wo ha dia mhan, aharẹmiẹn ọle i da re uwedẹ ọhan-ilo lu ọle beji ọle ka lu bhi ẹghe ẹdẹlẹ.—Iwẹn. 16:​6-10.

11. Emhin nela mhan lẹn nọn ha sabọ rẹkpa mhan?

¹¹ Mhan lẹnmhin ghe, Osẹ nọn mhọn oyẹẹ, nọn mhọn ẹwanlẹn, nọn yẹ lu emhin nọn gbale Jehova khin. Mhan yẹ lẹn ghe emhin rebhe nin mhan lu nanlẹn, bi ọne mhan lu nin ibhio mhan nin mhan ko ga manman wo ti ọle bhọ. Sẹyẹ, mhan lẹnmhin ghe Jehova dẹ re ihaosa nin eria ne sun rẹkhan ọlẹn.—Hib. 11:6.

ỌSO BHA LẸN EWIẸ

12. Beji Jemis 4:​13, 14 rẹman, emhin nela mhan bha lẹn?

¹² Tie Jemis 4:​13, 14. Bhi ọsi ẹmhọanta, mhan bha lẹn ebe ha sunu ji mhan ewiẹ. Bhi ọne agbọn nan nin mhan ye, “emhin nan bha muegbe khẹ” kẹ wo sunu ji mhan. (Eccl. 9:11) Ranmhude ọnan, mhan bha lẹn si emhanmhan nesẹmhan dẹ kiọnlẹn, la si mhan bhọ dẹ ha ribhi agbọn rẹ sabọ mun ele sẹ.

13. Be emhin dia mhan yẹ ẹgheso ranmhude nin mhan bha rẹ lẹn ebe ha sunu bhi ẹghe odalo?

¹³ Ọ sabọ rẹ ha nọghọ mhan rẹ ziẹngbe ọkakale ranmhude nin mhan bha rẹ lẹn ebe ha sunu bhi ẹghe odalo. Be ọ rẹ yi iriọ yẹ? Mhan sabọ rẹ ha kpokpo egbe ba ebe ha sabọ sunu bhi ẹghe odalo, sẹyẹ, ọnan bhọ dẹ sabọ re mhan miẹn ghe mhan bha yẹ ha ghọnghọn. Emhin iguaguako ha sunu, ọ sabọ rẹ re mhan ha lu akhiẹ, la re mhan miẹn ghe mhan bha yẹ ha ghọnghọn. Sẹyẹ, ahamiẹn emhin nin mhan rẹ mun ọkhọle ọi bha sẹ mhan obọ, ọ sabọ rẹ re egbe iẹnlẹn lọ mhan.—Prov. 13:12.

14. Be ha rẹ mhan manman ha ghọnghọn? (Yẹ fẹ ene ifoto ghe.)

¹⁴ Ahamiẹn mhan ziẹngbe ọkakale, mhan ki ha rẹman ghe oyẹẹ zẹle nin mhan da ga Jehova bhi ebe hi ki rẹ khin nọn sunu bhi iẹnlẹn nọnsẹmhan. Baibo rẹman ghe Jehova i da wo ha gbega mhan bhi ọkakale rebhe nin mhan kuẹlo da. Ọ da yẹ rẹman ghe emhin ne sunu ji mhan bhi iẹnlẹn, ọ i yi Osẹnobulua ka mhanmhanlẹn ọbhi otọ. Osẹnobulua lẹnmhin ghe, ọ i yi mhan ha lẹn ebe ha sunu ji mhan bhi ẹghe odalo ha rẹ mhan ha ghọnghọn. Sokpan, mhan ha guanọ adia bhi obọ nọnsọle, yẹ re obọ rẹkhan ọlẹn, ọle mhan ha da ha ghọnghọn. (Jer. 10:23) Ahamiẹn mhan bhii Jehova nin ọle rẹkpa mhan sade mhan ho nin mhan zẹ ebi mhan ha lu, inian ọ diabe ghe mhan yọle: “Ọ a ha yi iho nọnsi Jehova, mhan dẹ ha ribhi agbọn, la mhan dẹ lu ọnan, la mhan dẹ lu ọnin.”—Jem. 4:15.

15. Be mhan lẹn rẹji ẹghe odalo?

¹⁵ Arẹmiẹn mhan bha lẹn ebe ha sunu ewiẹ, mhan lẹnmhin ghe Jehova vele ghe mhan dẹ nyẹnlẹn bhi ighegheghe bhi ọne otọ nan la bhi okhun. Mhan lẹn ghe ọle i da sabọ bha ohoghe, sẹyẹ, emhin i ribhọ nọn ha mun ọlẹn mhọn nan da miẹn ghe ọle bha mun ive nesọle sẹ. (Tai. 1:2) Ọle ọkpa ha sabọ “tare ebi emhin da dia yẹ, rẹ na bhi ẹghe ẹdẹlẹ [ọle] rẹ ta emhin ne bha sẹ sunu.” Emhin rebhe nin ọle ka ta da wo munsẹ, bhiriọ, ebi ọle sẹ yẹ ta rẹji ẹghe odalo dẹ munsẹ. (Isa. 46:10) Bhi ọsi ẹmhọanta, mhan wo rẹọbhọ ghe emhin i ribhọ nọn ha zẹ Jehova bha yẹ re oyẹẹ nọnsọle man mhan. (Rom 8:​35-39) Ọle dẹ re ọne ẹwanlẹn nin mhan bi ahu rẹ sabọ ziẹngbe ebi ọ hi ki rẹ khin nọn ha sunu ji mhan bhi iẹnlẹn, ọle dẹ yẹ ko mhan udu rẹ. Mhan dẹ sabọ rẹọbhọ ghe Jehova dẹ rẹkpa mhan, yẹ nan erọnmhọn nin mhan.—Jer. 17:​7, 8.

MHAN I DA GENE SABỌ LẸN EBI JEHOVA LẸN MHAN SẸ YẸ

16. Be Jehova lẹn rẹ ji mhan? Be ọ dia mhan yẹ bhi egbe? (Psalm 139:​1-6)

¹⁶ Tie Psalm 139:​1-6. Aman nọn man mhan lẹn ebi ọle rẹ man mhan yẹ, ọle lẹn emhin kẹkẹ nin mhan sẹ kuẹlo da bhi iẹnlẹn. Ẹghe rebhe ọle rẹ ji ẹmhọn mhan da rẹtẹ ọle. Ọle lẹn emhin rebhe nin mhan ta, bi ebi ọ rẹ khẹke nin mhan ta, nọn ribhi ọkhọle nọnsẹmhan. Ọle lẹn emhin rebhe nin mhan lu bi ebezẹle nin mhan da lu ọle. Devid nin Ojie da yọle ghe, Jehova wo muegbe nin ọle rẹ rẹkpa mhan. Be ọ dia uwẹ yẹ bhi egbe nin uwẹ rẹ lẹn ghe ẹmhọn uwẹ manman rẹtẹ Osẹnobulua nọn Ke Okhun Nẹ, Osẹnobulua nọn man otọ, nọn man okhun! Beji Devid tale: “[Mhan] i da sabọ lẹn otọ ilẹnmhin nọn sẹriọ, ranmhude, ọ kpọnọ nẹ [mhan] gbe.”—Ps. 139:6.

17. Bezẹle nọn ha da sabọ ha nọghọ mhan rẹ rẹọbhọ ghe Jehova gene lẹn mhan nọnsẹn?

¹⁷ Ranmhude uwedẹ nan rẹ bẹẹ mhan wanre bhi azagba-uwa nọnsẹmhan, la uwedẹ nin agbaẹbho nọnsẹmhan rẹ lu emhin, la ebi iẹnlẹn nọnsẹmhan ka dia yẹ, ọ sabọ rẹ re ọle ha nọghọ mhan rẹ ha ghe Jehova bii Aba nọn mhọn oyẹẹ, nin ẹmhọn mhan ti ọle bhọ. Mhan sabọ rẹ ha riale ghe emhin ebe nin mhan lu bhi ẹghe nọn gbera, i da re Jehova ha guanọ nin ọle lẹn mhan la sikẹ mhan. Emhin nọn sẹnian ka sunu ji Devid. (Ps. 38:​18, 21) Ọria nọn dọnmhegbe nin ọle rẹ fi uwedẹ nin ọle rẹ nyẹnlẹn denọ, beji ọle ha da sabọ ha re obọ rẹkhan uhi nesi Jehova sabọ rẹ ha riale, ahamiẹn Osẹnobulua gene lẹn mẹn nọnsẹn, bezẹle nin ọle da guanọ nin mẹn fi uwedẹ nin mẹn rẹ nyẹnlẹn denọ, nọn wo ha nọghọ mẹn rẹ fidenọ?

18. Elele nela mhan ha miẹn nin mhan rẹ lẹn ghe, Jehova lẹn mhan gbera beji mhan lẹn egbe mhan sẹ? (Yẹ fẹ ene ifoto ghe.)

¹⁸ Mhan dẹ sabọ luẹ rẹ dọ rẹọbhọ ghe, Jehova lẹn mhan gbera beji mhan lẹn egbe mhan sẹ, sẹyẹ, ghe ọle daghe ọmhẹn bhi egbe nọnsẹmhan nin mhan i daghe. Arẹmiẹn ọle daghe ebe bha gba nin mhan lu, ọle sẹyẹ wo hoẹmhọn mhan, ọle lẹn ebezẹle nin mhan da lu emhin nin mhan lu. (Rom 7:15) Mhan ha dọ kere ghe Jehova daghe ọmhẹn bhi egbe nọnsẹmhan, ọ ki re ọne ọhubhudu nin mhan rẹ manman sun rẹkhan ọlẹn, yẹ re eghọnghọn ha ga ọle.

19. Be mhan lẹn rẹji Jehova?

¹⁹ Mhan lẹnmhin ghe Jehova hi ahoẹmhọn-egbe. Edandan i ribhọ. (1 Jọni 4:8) Mhan lẹnmhin ghe ranmhude oyẹẹ nin Jehova mhọn da mhan zẹle nin ọle da gbe uhi nin mhan, ọmhẹn nọnsẹmhan ọle guanọ. Sẹyẹ, ọle guanọ nin mhan ha mhọn iẹnlẹn ọsi ighegheghe. Ọle da je Ọmọn nọnsọle re nọn dọ yu nin mhan, beji mhan ha da ha mhọn iẹnlẹn ọsi ighegheghe. Ranmhude izọese nọnsi Jesu, mhan dẹ sabọ ha ga Jehova bhi uwedẹ nin ọle guanọ, arẹmiẹn ọ bha gba nin mhan fo. (Rom 7:​24, 25) Sẹyẹ, mhan yẹ lẹn ghe “Osẹnobulua lẹn emhin rebhe, sẹyẹ, ọle kpọnọ gbera ọkhọle nọnsẹmhan.” (1 Jọni 3:​19, 20) Jehova lẹn emhin rebhe rẹji mhan, sẹyẹ, ọle mhọnlẹn bhi ọkhọle ghe, mhan dẹ sabọ lu iho nọnsọle.

20. Be ha rẹkpa mhan nin mhan hẹi ha kpokpo egbe ba emhin nin mhan bha lẹn?

²⁰ Jehova bha re emhin soso he nin mhan nọn khẹke nin mhan lẹn. Mhan ha lẹn ọnan, mhan i yẹ da ha kpokpo egbe ba ene emhin nin mhan bha lẹn, ọkpakinọn, mhan ki denọ ẹlo ọbhi ene emhin ne lu uhọnmhọn-emhin nẹ. Mhan ha lu iriọ, ọnin ki rẹman ghe mhan mun udu nyan Jehova, nọn yi “Ọnọn mhọn ilẹnmhin nọn gbale.” (Job 36:4) Arẹmiẹn emhin eso ribhọ nin mhan bha lẹn otọle ẹlẹnan, mhan wo ha khuaẹloghe ẹghe nin mhan ha rẹ ha luẹ emhin ọgbọn bhi obọ Osẹnobulua nọnsẹmhan, yẹ luẹ ẹmhọn ọlẹn.—Eccl. 3:11.