Osẹnobulua Bẹ Mhọn Elin?

Ewanniẹn Nin Baibo Re Ọbhọ

Eria rebhe mhọn elin kẹkẹ, bhiriọ, ẹwanlẹn ibe ribhọ nin Osẹnobulua be rẹ ha mhọn elin? Itue eva ida sabọ ha yi ikolu, sade ele bha lẹn elin egbe, yẹ ha noo ọle, Ahamiẹn mhan gene guanọ nin mhan ha yi ọmọẹ Osẹnobulua, ọ bha be khẹke nin mhan rẹ lẹn elin nọnsọle yẹ ha noo ọle?

Bhi Baibo, Osẹnobulua da yọle: “Imẹn hi Jehova. Ọnin hi elin nọnsẹmhẹn.” (Isaiah 42:8) Arẹmiẹn ọle mhọn elin ovan ne bunbun, bọsi Osẹnobulua Nọn Ke Okhun Nẹ, Ebeanlẹn Mhan bi Aman Nọn Man Emhin, ekpẹn ọle re ọle mun ene ga ọle bhi egbe nin ọle rẹ ji ele da ha tie elin nọnsọle.—Genesis 17:1; Acts 4:24; 1 Peter 4:19.

Ọne elin nọnsi Osẹnobulua nan ribhi Exodus 6:3 bhi Baibo ne bunbun. Enin yọle, “Mẹn ka zegbere man Abraham, Isaac, bi Jacob khẹ bọsi Osẹnobulua nọn kokhun nẹ, ọkpakinọn, rẹji elin mẹn nin Jehova, mẹn bha ji ele da rọle lẹn mẹn.”

Ọne elin nọnsi Osẹnobulua nan, ọle hi Jehova bhi urolo Ebo. Inian a rẹ ha noo ọle bhi ore ne bunbun ha vade. Arẹmiẹn ene guanọ otọ iBaibo fẹghe, ọyẹẹ ele rẹ ha tie ọne elin nan “iYahweh,” Jehova hi elin nin ẹbho manman lẹn nẹ. Obọ ọhẹnhẹn nọn ribhi Baibo, ọ iyi urọlo Ebo a rẹ gbẹn ọlẹn, sọkpan urolo iHebrew a rẹ gbẹn ọlẹn. Ọne urolo nan, obọ obera a da tie ọle diọbhi obọ agobọ. Ikpebe enẹn ọle a rẹ gbẹn elin nọsi Osẹnobulua bhi urolo ọsi Hebrew, יהוה. Ene ikpebe enẹn bhi urolo ọsi Ebo ọle hi YHWH nan tiọle ọne Tetragrammaton.