Usikoko Nọn Nẹ ọsi Ukpe 2020 Nan Zedu Ọle Diọbhi Urolo Kẹkẹ

Bhi uki ọsi July bi August 2020, Esali Jehova bhi otọ agbọn rebhe dẹ re ẹghe ọkpa rẹ ghe ọta nan rẹman bhi usikoko nọn nẹ ọsi ọne ukpe nan. Ọnan hi ọsi ọhẹnhẹn nin emhin nọn sẹ inian sẹ sunu. Nin ọnan rẹ sabọ sunu, ọ da khẹke nan zedu ene ọta diọbhi urolo ne bun gbera 500. Ọnan iyi obhi ẹsọn khere! Ọ dẹ sabọ sẹ ukpe ọkpa la ebe gbera iriọ nan rẹ miẹnsọn nọn sẹ inian fo. Sokpan, ranmhude emianmhẹn natiọle coronavirus nọn zegbere, ọ bha sẹ bhi uki enẹn nin ibhio mhan ha mhọnlẹn nin ele rẹ lu emhin rebhe nan ha rẹman bhi ọne usikoko nọn mhọn uhọnmhọn-ọta nọn yọle “Ha Ghọnghọn”!

Ibhio mhan ne re obọ kpa ene zedu ebe bi ibhio mhan ne mhọn obọ bhi emhin nan dẹ, ne ribhi Bẹtẹ nọn ke okhun nẹ da rẹkpa bhi ọne ẹsọn nan. Ibhio mhan ne re obọ kpa ene zedu ebe da daghe ọle ghe, ọkhẹke nan dẹ emhin iwẹnna eso nin ibhio mhan ne zedu ebe, manman nọn makrofoni nan rẹ rẹkọd. Ibhio mhan ne mhọn obọ bhi emhin nan dẹ da dẹ makrofoni nọn bun sẹbhi 1,000 yẹ je ele ji ibhio mhan bhi ije kẹkẹ ne sẹbhi 200.

Nin ele rẹ sabọ te igho, ele da re osukpa dẹ ene imakrofoni rebhe yẹ je ele ha khian ijanlẹn ọkpa, ele kuẹ na bhi enin je ele ji ibhio mhan ne zedu ebe bhi ije kẹkẹ bhi otọ agbọn rebhe. A ha lolo igho nan rẹ dẹ ene imakrofoni yẹ je ele ha khian ije kẹkẹ, ọkpa-ọkpa bhọ bha gbera ₦66,000. Sade ọkpa-ọkpa ele dẹ nọn, ọ ha rẹ ghan sẹbhi ₦80,000. Ranmhude makrofoni ne bunbun ele re osukpa dẹ, igho nan rẹ dẹ ele da manman lo gbera eka nan rẹ dẹ ukpọkpa-ukpọkpa.

Ẹkẹ uki ọsi April bi May 2020, ọle ibhio mhan ne mhọn obọ bhi emhin nan dẹ rẹ lu ene emhanmhan nan rebhe. Bhi ọne ẹghe nan, ẹki ne bunbun bha ha do ranmhude emianmhẹn natiọle coronavirus. Ọrẹyiriọ, ọkuẹsẹ uki ọsi May fo, ene emhin nan dẹ da sẹ obọ ọsi ibhio mhan ne zedu ebe, nin ele da sabọ re ele ha wẹnna.

Obhio mhan natiọle Jay Swinney, nọn yi ọwanlẹn nọn mhọn obọ bhi emhin nan dẹ da yọle: “Ibhio mhan nin Bẹtẹ ne ọbhọ nin ele dẹ ene emhin bi ẹbho nin ele ne dẹ, da wo wẹnna kugbe nọnsẹn. Ẹlinmhin nọnsi Jehova rẹkpa mhan rẹ sabọ re ẹjẹje dẹ ene emhin nan. Jehova yẹ re ẹwanlẹn nin mhan rẹ noo igho ọsi agbotu nọnsẹn.”

Obhio mhan natiole Nicholas Ahladis, ọkpa bhi ene rẹkpa ibhio mhan ne zedu ebe da yọle: “Mhan da taman ibhio mhan ne zedu ebe ghe, nin ele dọnmhegbe dọ ne makrofoni nan je ji ele, nin ele da sabọ re ele ha wẹnna aharẹmiẹn ele bha sabọ sibhi uwa re deba ibọ ele nekẹle ha wẹnna. Bhiriọ, ele da sabọ zedu ene ọta, arẹman, bi illo bhi urolo nọn bun gbera 500.”

Ene emhanmhan nan kẹkẹ zẹle nan da sabọ lu ividio ọsi usikoko nọn nẹ ọsi ukpe 2020. Igho nin ẹbho re ọkhọle nọnsele re re bhi donate.jw.org bi uwedẹ ebhebhe kẹkẹ, ọle mhan rẹ dẹ ene emhin nan.