Ebi A Rẹ Lu Ividio ọsi Usikoko Nọn Nẹ Yẹ bhi Ukpe 2020, Nọn Mhọn Uhọnmhọn-ọta Nọn Yọle: “Ha Ghọnghọn”!

Ene vidio nan rẹman bhi usikoko nọn nẹ wo manman rẹsọ mhan bhi ọkhọle. Ọ yẹ rẹkpa mhan rẹ manman lẹn otọ iBaibo nọnsẹn. Ividio ne bun sẹbhi 114, ọle a rẹman bhi ọne usikoko, deba ọta ne bun sẹbhi 43 nin Otu Nọn Sun Oga bi ene rẹkpa ele rẹman. Uwẹ be sẹ ka ria ẹmhọn ẹsọn nan miẹn, bi igho nan noo rẹ lu ene ividio nan?

Khere ibhio mhan nin ikpea bi ikhuo ne zegbere miẹn ọne ẹsọn nan bha rẹ bun sẹbhi itue 900. Ọ gbera ikpe eva nin ele rẹ lu ọne iwẹnna nan. A ha ku ẹghe nin ele rebhe gbe bhi ọne iwẹnna kugbe, khere ọ bha rẹ bun sẹbhi uri-agogo 100,000. Bhi ẹkẹ ọne ẹghe nan, ọle uri-agogo 70,000 nan noo rẹ lu arẹman ọsi Baibo yẹ ye, nọn mhọn uhọnmhọn-ọta nọn yọle, Nehemiah: “Ọnyẹnmhẹn Nọn Na Obọ IJehova Vae, Ọle Hi Ahu Nọnsẹbha.”

Bhi ọsi ẹmhọanta, a wo manman noo igho bhi ọnẹ ẹsọn nan, rẹ gbẹloghe ene ibhio mhan ne zegbere miẹn ọne ẹsọn, bi emhin kẹkẹ nan rẹ lu ọne iwẹnna, deba eji a da lu ọle.

Obhio mhan natiọle Jared Gossman nọn wẹnna bhi Audio/⁠Video, da yọle: “Ọ manman ti Otu Nọn Mhọn Obọ bhi Iman-emhin bhọ rẹ ha lu ividio nesẹmhan bhi agbaẹbho kẹkẹ, yẹ rẹ ha re ibhio mhan ne na bhi ije kẹkẹ vae man bhi ene ividio. Mhan lu ọnan ranmhude, otọ agbọn rebhe, ọle Esali Jehova na vae, mhan ho nin ọnan dagbare bhi vidio nesẹmhan. Nan rẹ sabọ lu ọnan, ibhio mhan nan gha bhi usun kẹkẹ ne bun sẹbhi 24, bhi agbaẹbho ne bun sẹbhi 11, da ku obọ kugbe miẹn ọne ẹsọn nan. Nin ene ibhio mhan nan rẹ sabo ko wẹnna kugbe, a dẹ wo manman mhanmhan emhin nọnsẹn, ọ dẹ yẹ wo manman gbe igho.”

Unan emhin eso ribhọ ne khẹke nin mhan ha mhọnlẹn nin mhan da sabọ lu ividio nesẹmhan ne bunbun. Bhi ọsi ijiẹmhin, emhin ne khẹke nin mhan rẹ lu ọne arẹma natiọle, Nehemiah: “Ọnyẹnmhẹn Nọn Na Obọ IJehova Vae, Ọle Hi Ahu Nọnsẹbha,” ijianlẹn ọkpa nan da lu ividio natiọle Mt. Ebo, nọn sikẹ Patterson, New York, U.S.A., ọle a da bọn ọlẹn. Nin ele rẹ sabọ noo igho ọsi agbotu nọnsẹn, yẹ lu ọne ividio bhi uwedẹ nọn ha rẹ khọ ebi emhin diayẹ bhi ẹghe ẹdẹlẹ, ene ibhio mhan da re emhin ne bha khua rẹ bọn egbe-uwa, nọn diabe ogbe ọsi Jerusalem bhi ẹghe ẹdẹlẹ. Eran nan rẹ lu ene egbe-uwa nan taan sẹbhi ibata 20, a da re fomu rẹ gue ene eran, a da re alo nọn ha re ene fomu nan diabe udo gbo ele. A dẹ sabọ re ene egbe-uwa nan rẹ lu obọle kẹkẹ bhi ọne ividio, bhiriọ, mhan ida yẹ bọn ene bun gbe. Ọrẹyiriọ, igho nan noo rẹ bọn emhin kẹkẹ nan rẹ lu ọne ividio nan dẹ sẹbhi ₦40,250,000.a

Beji mhan ki dọ lẹn ẹsọn nan miẹn ọbhi ọne usikoko nan, ọtibhọ nin mhan mhọn rẹ da ọle manman kie tuẹn okhun. Mhan rẹọbhọ ghe, ẹsọn rebhe nan miẹn nan rẹ sabọ lu emhanmhan ọsi ọne usikoko nan, dẹ re ogẹn ji Jehova bhi otọ agbọn nan rebhe. Bha rebhe obulu bhi uwedẹ nin bha rẹ noo donate.jw.org, la uwedẹ nọn hi ki rẹ khin, rẹ re iyobọ re bhi iwẹnna itẹmhọn Osẹnobulua nan lu bhi otọ agbọn nan rebhe.