Kie Ziẹn Ikolu Nin Uwẹ bi Jehova Ko Mhọnlẹn

UKPE-UKPE a rẹ ne ibhio mhan nan khu bhi agbotu kiere. Ria ẹmhọn eghọnghọn nọn da ha ribhi okhun, sade ọkpa bhi ene ibhio mhan nan fikie vae. (Luke 15:7, 10) Ahamiẹn ọkpa bhi enan ne kiere bhi agbotu uwẹ khin, lẹn sẹbhọ ghe, Jesu, ene ẹhi, bi Jehova wo manman ha ghọnghọn ghe uwẹ vae. Ọrẹyiriọ, uwẹ sabọ rẹ kuẹlo da ọnọghọ eso, beji uwẹ ha rẹ ha ziẹn ikolu nin uwẹ bi Jehova ko mhọnlẹn. Be bhọ eso bhi ene ọnọghọ nan? Be ha rẹkpa uwẹ?

ỌNỌGHỌ NIN ẸBHO NE FIKIERE BU IJEHOVA HA SABỌ KUẸLO DA

Ọkhọle sẹyẹ gbe ibhio mhan ne bunbun asan aharẹmiẹn ele fikie vae bhi agbotu fo. Asabọmiẹn uwẹ lẹn ebi emhin dia iDavid nin Ojie bhi egbe yẹ. Arẹmiẹn a rẹhunmhan olukhọ nesọle fo, ọle da yọle: “Emhin ebe nesẹmhẹn re egbe lọ mẹn.” (Ps. 40:12; 65:3) Ahamiẹn ọria fikie bu iJehova re fo, ọkhọle sabọ yẹ rẹ ha gbe ọle asan, la ẹkhọle sabọ yẹ rẹ ha lo ọle rẹ na ikpe ne bunbun. Isabelle nan khu bhi agbotu na bhi ebe gbera ikpe uje,a da yọle: “Ọ da wo manman ha nọghọ mẹn rẹ rẹọbhọ ghe, Jehova dẹ rẹhunmhan imẹn.” Ahamiẹn uwẹ ji egbe lọ uwẹ, ọ dẹ sabọ kie wẹghẹ ikolu nin uwẹ be iJehova ko mhọnlẹn an. (Prov. 24:10) Dọnmhegbe nin uwẹ hẹi ji ọnan sunu ji uwẹ.

Eso kpokpo egbe ghe, asabọmiẹn ele ida sabọ lu emhin rebhe nin ele ha lu rẹ kie ziẹn ikolu nin ele bi Jehova ko mhọnlẹn. Obhio mhan nin Antoine nan re kiere bhi agbotu da yọle: “Ọ da wo dia mẹn bhi egbe ghe, mẹn yele emhin ne bunbun an nin mẹn luẹle, bi emhin nin mẹn ha lu ẹghe nin mẹn rẹ ha yi Ọsali Jehova.” Ranmhude ibhio mhan eso re inian ha ria eria, ele ire egbe rebhe rẹ wẹnna nin Jehova.

Bhi ọsi ijiẹmhin, ahamiẹn efi riia ọria uwa a, ọle sabọ rẹ ha kpokpo egbe, sade ọle ria ẹmhọn ẹghe bi ahu nin ọle ha noo rẹ hẹnhẹn ọlẹn. Iriọ yẹ nọn. Ahamiẹn ikolu nin uwẹ bi Jehova ko mhọnlẹn riia ranmhude emhin ọbe nọn kaka nin uwẹ lu, uwẹ sabọ rẹ ha riale ghe, uwẹ dẹ manman wẹnna kaka nin uwẹ rẹ kie deba iJehova ha mhọn ikolu. Ọkpakinọn, uwẹ dẹ miẹn urẹkpa.

Jehova taman mhan yọle: “Bha vae nian, nin mhan talọ ọbhi ẹmhọn nin mẹn bi bha ko mhọnlẹn.” (Isa. 1:18) Uwẹ ki ka dọnmhegbe rẹ fikeke gbe emhin nin uwẹ rẹ ha lu. Jehova wo manman hoẹmhọn uwẹ nin uwẹ rẹ sabọ lu ọnan. Ria ọnan ghe: Ranmhude uwẹ fikie bu iJehova re, ọle dẹ sabọ re ijiẹmhin nọnsẹ rẹ rẹman Esu ghe, ọbhahoghe ọle khin!​—Prov. 27:11.

Uwẹ munhẹn ha sikẹ iJehova fo nin uwẹ rẹ fikie bu ọle re. Ọle ve ghe ọle dẹ yẹ sikẹ uwẹ. (Jas. 4:8) Ọ wo re ibhio mhan ghọnghọn ghe, uwẹ fikiere bhi agbotu. Ọkpakinọn, ọkhẹke nin uwẹ wo lu gbera iriọ. Ọkhẹke nin uwẹ ha ziẹn oyẹẹ nin uwẹ mhọn da Aba ẹ bi Ọmọẹ ẹ nin Jehova. Be uwẹ ha rẹ sabọ lu ọnan yẹ?

HA MHỌN EMHANMHAN NIN UWẸ HA SABỌ MUNSẸ

Ha mhọn emhanmhan nin uwẹ ha sabọ munsẹ. Asabọmiẹn ghe, uwẹ yẹ ye emhin eso re nin uwẹ luẹle rẹji Jehova, bi ive ọsi agbọn ọfubhegbe nin ọle vele. Ọkpakinọn, ọkhẹke nin uwẹ dọnmhegbe ha tẹmhọn Osẹnobulua ẹghe rebhe, ha vae bhi ikolo oga, yẹ deba ibhio mhan ha gbe ẹghe. Bha ji mhan fẹ emhanmhan eso ghe nin uwẹ ha sabọ ha mhọnlẹn.

Ha nan erọnmhọn ji Jehova ẹghe rebhe. Aba ẹ nọn ribhi okhun lẹn sẹbhọ ghe, ahamiẹn ọkhọle gbe uwẹ asan ẹghe rebhe ranmhude emhin ọbe nin uwẹ lu, ọ ida lẹkhẹ nin uwẹ rẹ ha nan erọnmhọn ji ọle. (Rom. 8:26) Ọrẹyiriọ, wo ha nan erọnmhọn ji Jehova. Ha taman ọlẹn ghe, uwẹ wo guanọ nin uwẹ ha yi ọmọẹ ọle. (Rom. 12:12) Andrej nọn ye emhin nọn sunu ji ọle re da yọle: “Ọkhọle da wo manman ha gbe mẹn asan. Ẹkhọle da yẹ ha lo mẹn. Ọkpakinọn, ẹghe nọn hi ki rẹ khin nin mẹn rẹ nan erọnmhọn ji Jehova, mẹn iyẹ manman kpokpo egbe. Sẹyẹ, ọkhọle mẹn ki wo lọ re.” Ahamiẹn uwẹ bha lẹn ebi uwẹ ha ta bhi erọnmhọn, fẹ erọnmhọn nin David nin Ojie nan ghe bhi Psalms 51 bi 65.

Ha luẹ Baibo ẹghe rebhe. Ọnan dẹ rẹkpa uwẹ rẹ ha mhọn urẹọbhọ nọn ziẹnlẹn, yẹ rẹkpa uwẹ rẹ manman hoẹmhọn iJehova. (Ps. 19:7-11) Felipe da yọle: “Ranmhude mẹn imhọn emhanmhan nan rẹ luẹ iBaibo ẹghe rebhe, ọle zẹle nin urẹọbhọ nọnsẹmhẹn da wẹghẹ a, yẹ lu emhin nọn ba iJehova bhi egbe. Ranmhude mẹn bha guanọ nin ọnan kie sunu, mẹn da mhanmhanlẹn nin mẹn rẹ ha luẹ iBaibo ẹghe rebhe ranmhude ọ dẹ sabọ gbega mẹn.” Uwẹ dẹ yẹ sabọ lu iriọ. Ahamiẹn uwẹ guanọ uhọnmhọn-ọta nin uwẹ ha zilo nyan bhi iluẹmhin iBaibo nọnsẹ, uwẹ sabọ rẹ nọọn ọmọẹ ẹ nọn mun iJehova mhọn nọnsẹn nin ọle rẹkpa uwẹ.

Kie deba ibhio ẹ nin bha ko ga ha muobọ. Ibhio mhan eso ne fikie vae bhi agbotu da ha kpokpo egbe ghe, ibhio mhan ida ha re ẹlo esili ghe ele. Larissa da yọle: “Ẹkhọle da wo manman ha lo mẹn, ranmhude, mẹn da ha riale ghe, mẹn re ibhio mhan ọbhi unun. Ọne iria-eria nan bha kẹ sibhi ọkhọle mẹn re.” Ha mhọnlẹn bhi ọkhọle ghe, ene ewanlẹn bhi agbotu bi ibhio mhan nekẹle muegbe nin ele rẹ rẹkpa uwẹ rẹ kie deba iJehova ha mhọn ikolu. (Fẹ ọne ẹkpẹti ghe nọn yọle “Emhin Nin Ene Ewanlẹn Ha Sabọ Lu.”) Ele wo ha ghọnghọn nin uwẹ rẹ fikie bu iJehova re. Ele yẹ ha guanọ nin uwẹ ha ghọnghọn!​—Prov. 17:17.

Be uwẹ ha sabọ lu rẹ sikẹ ibhio mhan bhi agbotu? Ha deba ibhio ẹ yo ikolo oga. Uwẹ ha yẹ deba ele ha dagbare bhi inẹbho ẹghe rebhe. Be ọnan ha rẹ sabọ rẹkpa uwẹ yẹ? Felix da yọle: “Ibhio mhan bhi agbotu da wo ha khaẹloghe ẹghe nin mẹn ha rẹ fikie vae. Ọnan da rẹ mẹn lẹn ghe, ẹmhọn mẹn wo yẹẹ ele. Ele da rẹkpa mẹn rẹ kie dọ deba agbotu nọnsi Jehova, yẹ rẹkpa mẹn lẹn ghe, Jehova rẹhunmhan mẹn. Sẹyẹ, mẹn dẹ yẹ sabọ ha ga iJehova.”​—Fẹ ọne ẹkpẹti ghe nọn yọle “Emhin Nin Uwẹ Ha Sabọ Lu.”

HẸI JI EGBE LỌ UWẸ!

Esu dẹ ha si ọnọghọ ji uwẹ ne ha wẹghẹ urẹọbhọ nọnsẹ a beji uwẹ ha rẹ kie deba iJehova ha mhọn ikolu. (Luke 4:13) Bhiriọ, ọkhẹke nin uwẹ ziẹn ikolu nin uwẹ bi Jehova ko mhọnlẹn nian.

Jehova da ve rẹji ihuan nesọle yọle: “Mẹn ki guanọ ọnọn rẹ yulua, yẹ re ọnọn rẹ ha bibi khian kiere. Mẹn ki gbanọ itẹ ọsi ọnọn kuanlẹn, yẹ re ahu nin ọnọn wẹghẹ.” (Ezek. 34:16) Jehova wo rẹkpa ẹbho ne bunbun rẹ kie deba ọle ha mhọn ikolu. Ha mhọn ọlẹn bhi ọkhọle ghe, ọle guanọ nin ọle rẹkpa uwẹ deba ọle ha mhọn ikolu nọn ziẹnlẹn.