Uwẹ Be Yẹ Yere?

Uwẹ be sẹ gbẹlokotọ tie ene ebe Ọkhẹughe nan ne dagbare bhi ọne ukpe nan? Fẹghe si uwẹ dẹ sabọ re ewanniẹn ọbhi ene inọnta nan:

Be a re ọle ta nan rẹ “fi ọkhọle denọ”? (Rom. 12:2)

Ọ gbera nin mhan rẹ gheghe lu emhin esili eso. Ọkhẹke nin mhan fẹ unan ọria nin mhan gene khin ghe, yẹ fi eji mhan ida lu nọnsẹn denọ beji mhan ha da sabọ manman ha re obọ rẹkhan uhi nesi Jehova.—w23.01, apapale 8-9.

Be ọkhẹke nin mhan rẹ ha lu emhin yẹ sade mhan daghe ebi emhin rẹ ha sunu yẹ bhi ọne agbọn nan?

Mhan wo guanọ nin mhan lẹn ebi emhin ne sunu bhi ọne agbọn nan rẹ ha mun ọta akhasẹ ne ribhi Baibo sẹ yẹ. Ọ bha khẹke nin mhan wo re ọkhọle ha nene ebi emhin ha wo rẹ sunu yẹ tee ranmhude ọ dẹ sabọ si ozughu re bhi ẹkẹ agbotu. Ọkpakinọn, mhan ji ebi mhan tẹmhọnlẹn da diẹn mun emhin nin agbotu nọnsi Jehova zẹ ọle egbe dagbare. (1 Cor. 1:10)—w23.02, apapale 16.

Be re imianmẹn ọsi Jesu bi ọsi ene rẹkhan ọlẹn dikẹ?

Agbaẹbho nin Jehova tobọle zẹ ne re egbe guẹ nanlẹn Jesu na vae, bhiriọ ọ bha khẹke nin ọle re egbe guẹ nin Jehova. Ọria nọn gbale nọn imhọn olukhọ soso bhi egbe ọle khin. Ọ bha khẹke nin ọle fidenọ bhi emhin ọbe soso.—w23.03, apapale 5.

Be imhan ha rẹ sabọ re otọ nin ẹbho ebhebhe yẹ rẹ ha re ewanniẹn ọbhi inọnta bhi ikolo oga?

Mhan hẹi ji ewanniẹn nọnsẹmhan ha tan gbe beji ẹbho ebhebhe ha da miẹn otọ rẹ talọ. Ọ bha khẹke nin mhan wo ha talọ nyan ẹmhin kpataki rebhe, ranmhude mhan ho nin ẹbho ebhebhe yẹ miẹn emhin talọ nyan.—w23.04, apapale 23.

Be bhọ “Uwedẹ ọsi Ikhiale” nan tẹmhọnlẹn bhi Isaiah 35:8 mundia nan?

Uwedẹ arẹkhọkhọ nin ibhokhan Izrẹl rẹkhan beji ele na bhi Babilọn khian otọ nọnsele, ọle a ka re “Uwedẹ ọsi Ikhiale” talọ je. Be bhọ ọne “Uwedẹ ọsi Ikhiale” khin ẹlẹnan? Ikpe eso ọkuẹsẹ a sẹbhi ukpe 1919, ikpea eso ne mun ofẹn Osẹnobulua da lu emhin kẹkẹ ọbhi otọ. Eso bhi emhin nin ele lu hi, Baibo nin ele zedu ọle yẹ printi dagbare. Ọ ree nin ẹbho nesi Osẹnobulua mọn da khian bhi ọne “Uwedẹ ọsi Ikhiale” nan. Ọne uwedẹ nan dọ re ele ha ribhi otọ ọfubhegbe ọsi ọriọn, sẹyẹ ọ dẹ re ele sẹbhi agbọn ọsọgbọn.—w23.05, apapale 15-19.

Hela ene ikhuo eva nan tẹmhọnlẹn bhi Proverbs uhọnmhọnlẹn nọnzi 9? Adia nela a re nin mhan bhi enin?

Ebe ọsi Proverbs da tẹmhọn “okhuo nọn iwanlan” nin ẹbho ne vae bhi uwa nọnsọle ki ribhi “Idin.” Ọ da yẹ tẹmhọn okhuo ọbhebhe nọn mundia nin “ẹwanlẹn ọsaje” nọn re ilẹn-otọ-emhin nin ẹbho ne vae bhi uwa nọnsọle, yẹ rẹkpa ele rẹ miẹn iẹnlẹn ighegheghe. (Prov. 9:1, 6, 13, 18)—w23.06, apapale 22-24.

Be Osẹnobulua rẹ re ẹwanlẹn bi idegbere nin Lọti lu emhin yẹ?

Jehova da noo ẹhi nesọle rẹ taman Lọti nin ọle nẹ diọbhi eji oke ye. Ẹghe nin Lọti rẹ bhii Jehova nin ọle ji ọle bi azagba-uwa nọnsọle da diọbhi eji a tiọle Zoar, Osẹnobulua da ka nin ọle rẹ diọ bhi enin.—w23.07, apapale 21.

Be okhuo nin ọdọ ọle dọ ha ghe ifoto ọsi ẹbho ne banọan ha sabọ lu?

Hẹi ha riale uwẹ zẹ. Dọnmhegbe ha ziẹn ikolu nin uwẹ bi Jehova ko mhọnlẹn. Uwẹ sabọ rẹ dọ tie okha ọsi ikhuo eso bhi Baibo ne ha ribhi ọkakale, ne miẹn ikoudure nin ele rẹ bu Jehova bhi erọnmhọn. Uwẹ dẹ yẹ sabọ rẹkpa ọdọ ẹ rẹ rẹban idia, la emhin ne ha sabọ re ọle dọ ha ghe ifoto ọsi ẹbho ne banọan.—w23.08, apapale 14-17.

Be ilẹn-otọ-emhin ha rẹ rẹkpa mhan rẹ sabọ re ẹkẹ nọn fu rẹ ne ẹbho zilo yẹ sade ele re ovan nọọn mhan inọnta rẹji ebi mhan rẹọ ọi?

Ọkhẹke nin mhan ghe ọne inọnta bii emhin nọn ha rẹkpa mhan rẹ sabọ lẹn ebe ri ọle bhi ọkhọle. Bhiriọ, mhan ki dọ sabọ re uwedẹ ekpẹn bi ifuẹkẹ rẹ wanniẹn ọlẹn.—w23.09, apapale 17.

Be imhan miẹn luẹ bhi obọ Meri rẹji uwẹdẹ nin mhan ha rẹ sabọ ha miẹn ahu bhi obọ Jehova?

Ẹghe nin Meri rẹ lẹn ghe ọle dẹ biẹ ọne Mezaya, ọle da dọ guanọ urẹkpa. Jehova da noo ẹhi natiọle Gebriẹl bi Ẹlizabẹt nin obhio ọle rẹ re izebhudu nin Meri. Bọsi Meri, uwẹ dẹ yẹ sabọ miẹn ikoudure bhi obọ ibhio ẹ nin bha ko ga.—w23.10, apapale 15.

Be Jehova ha rẹ sabọ wanniẹn erọnmhọn nọnsẹmhan yẹ?

Jehova ve ghe ọle dẹ kaehọ erọnmhọn nesẹmhan, yẹ fẹghe si ene erọnmhọn diẹn mun iho nọnsọle. (Jer. 29:12) Jehova sabọ re uwedẹ kẹkẹ rẹ wanniẹn emhin ọkpa nin ẹbho bhii ọle le, ọkpakinọn, mhan ha mhọn ọlẹn bhi ọkhọle ghe ọle dẹ wo ha rẹkpa mhan.—w23.11, apapale 21-22.

Arẹmiẹn Romans 5:2 ka tẹmhọn “iruduba,” bezẹle nan da sẹyẹ tẹmhọn ọlẹn bhi ulọnlẹn nọnzi 4?

Ọria sabọ rẹ munhẹn dọ ha mhọn ọne iruduba nin ọle rẹ nyẹnlẹn bhi agbọn ọsọgbọn bhi ighegheghe sade a tẹmhọn Osẹnobulua man ọlẹn. Ọkpakinọn, beji ọle ha ki rẹ ha miẹn ọkakale, ha ziẹngbe ele, yẹ dọ lẹn sẹbhọ ghe Osẹnobulua re ẹlo esili ghe ọlẹ, iruduba nin ọle mhọn ki manman dọ deziẹn, yẹ manman ha ti ọle bhọ.—w23.12, apapale 12-13.