Ibuobu E be Ta nọ A Wo Ẹrọwọ

“JESU o gbunu! A rẹ ruẹ obọ riẹ hẹ!” ere aye ọgba-egagọ jọ evaọ obọ Brazil ọ ta. Evaọ uzẹme, a rẹ vro ogaga odẹ Jesu hu. Evaọ ikuigbe kpobi, u no ahwo eva ze re a ruẹ-uye je whu kẹe.

Ikọ na Pita avọ Jọn a rehọ ‘odẹ Jesu’ ta usiuwoma evaọ Jerusalẹm. Fiki ere oruo, a te mu ai jẹ fae. Ghele na, “a tẹ nyavrẹ no aro ogbẹguae, yọ a ghọghọ epanọ a kele ai gbe enọ ighine te erọjẹfiẹ fiki odẹ na.”—Iruẹru 5:28, 41.

Antipas yọ Oleleikristi ikpe-udhusoi ọsosuọ ọfa nọ o rri odẹ Jesu ghaghae. Evaọ obe urere Ebaibol na, Eviavia, Jesu o se rie “ose-isẹi mẹ, ọnọ ọ rọwo mẹ na, ọnọ a kpe udevie rai, oria nọ Setan ọ rẹ ria.” (Eviavia 2:13) Kuomagbe Ileleikristi efa evaọ Pẹgamọm, Antipas ọ se nọ ọ rẹ vro ẹrọwọ riẹ fihọ Kristi. Antipas o kru odẹ Jesu gaga te epanọ a ro kpei fihọ iẹe!

Ole ikpe udhuvẹ gbe ikpe evaọ obaro, evaọ 155 C.E., Polycarp, ọnọ o se oma riẹ Oleleikristi, ọ rẹriẹ ovao ku odawọ utioye na nọ a ta kẹe nọ ọ la Kristi eka. Uyo riẹ họ: “Mẹ gọ Riẹ te ikpe 86 no, yọ o ti ru omẹ thọ họ. Ẹvẹ mẹ rẹ rọ la Ovie mẹ nọ o siwi omẹ eka?” Fikinọ ọ se nọ ọ rẹ se Kristi, a tẹ rọ erae mahe Polycarp kpe.

U no ikọ na, Antipas, gbe amọfa eva ze re a rọ uwhu dhesẹ isẹri rai kpahe Kristi! Kọ ẹvẹ kpahe ahwo nẹnẹ?

Odẹ Jesu Nẹnẹ

Odẹ Jesu u gbe bi duobọ te ahwo iroro. Evaọ Latin America, unu ichọche nọ e ta nọ a rọwo Jesu i bi dhe evievihọ evaọ ikpe jọ nọ e vrẹ na. Makọ imiwhre na dede i wo ichọche Pẹntikostal rai. Eva okiovo na, ichọche na i bi kpomahọ egọmeti na viere. Wọhọ oriruo, evaọ Ogbẹgwae gbe Isuẹsu ọrọ Brazil, ahwo ichọche enana a rehọ egbara 31.

Jesu ọvona họ ohwo nọ egagọ ọkpokpọ jọ evaọ United States a be fodẹ. Ilele rai a se oma rai Ikoko Eyaa. Emagazini ọ Time ọ n’iyẹrẹ evaọ 1997 nnọ ahwo nọ a bi kpohọ ichọche na a bu no 4,200 evaọ 1991 rite ima 1.1 evaọ 1996. Ole rai jọ nọ a rẹ so o ta nọ: “O obokparọ evaọ Jesu, Osiwi mẹ bẹdẹ bẹdẹ.”

Ghele na, orọnikọ eme kpobi nọ a rọ odẹ Jesu ta i woma ha. Ẹsibuobu a be rehọ odẹ Jesu fiẹmo. A kpe ahwo Ju no, a kpe egedhọ no, a lahiẹ enọ i kie no ichọche no, a bru oma rai no, a gba rai fihọ ire mahe—enana kpobi evaọ odẹ Jesu. Yọ kẹle na, ekiọthuọ ichọche o viodẹ no. Enana kpobi yọ idhere nọ a be rọ rehọ odẹ Jesu ruiruo thọthọ!

Ofariẹ, o kpare enọ ilogbo jọ ze: Eme o gwọlọ re a fi ẹrọwọ họ odẹ Jesu? Eme họ eriwo ọ Isẹri Jihova evaọ ẹme ọnana? Uzoẹme n’otha na o te kiyo enọ enana.