Tin-Hungh Zeix Baamh Gen Daaih Zoux Haaix Nyungc?

1. Weic haaix diuc Tin-Hungh zeix cuotv baamh gen?

Yeˆhoˆwaa zeix baamh gen daaih bun baamh mienh, se benx baamh mienh yiem nyei dorngx. Hnangv naaic, daauh doix baamh mienh, Aaˆndam caux Haawaa, se maiv zeiz zeix daaih bun ninh mbuo maaih fu’jueiv yiem tin-dorngh. Dongh Tin-Hungh maiv gaengh zeix baamh mienh wuov, ninh zungv zeix nzoih fin-mienh yiem jienv tin-dorngh aqv. (Yopv 38:4, 7) Tin-Hungh zeix daauh dauh m’jangc dorn daaih bun ninh yiem nzueic haic nyei orn-lorqc dorngx heuc Eˆnden Huingx. (Tin Deic Douh 2:15-17) Yeˆhoˆwaa bun ninh caux ninh oix duqv nyei fu’jueiv haih duqv njien-yiouh nyei yietc liuz yiem naaiv baamh gen.​—Doqc Singx Nzung 37:29; 115:16.

Dongh jiez gorn wuov, kungx Eˆnden Huingx se benx nzueic haic nyei orn-lorqc dorngx. Daauh doix baamh mienh a’zuqc maaih fu’jueiv hiaangx daaih buangv baamh gen. Hnangv naaic, ninh mbuo cingx haih gunv duqv mbuoqc baamh gen nyei ga’naaiv yaac tengx ceix ziangh norm baamh gen benx orn-lorqc huingx. (Tin Deic Douh 1:28) Naaiv norm baamh gen oix yietc liuz yiem yaac yietc liuz benx baamh mienh yiem nyei dorngx.​—Doqc Gorngv Seix Zaangc 1:4.

2. Weic haaix diuc baamh gen maiv benx orn-lorqc huingx?

Aaˆndam caux Haawaa maiv ei Yeˆhoˆwaa, liuz Yeˆhoˆwaa zunc ninh mbuo cuotv Eˆnden Huingx. Naaic norm orn-lorqc huingx ziouc maiv maaih aqv, yaac maiv maaih baamh mienh haih ceix jiez naaic norm Eˆnden Huingx. Ging-Sou gorngv: “Tin-Hungh zorqv baamh gen jiu bun yiem orqv mienh nyei buoz-ndiev.”—Yopv 9:24.​—Doqc Tin Deic Douh 3:23, 24.

Hnyungv, Yeˆhoˆwaa guangc ninh jiez gorn wuov norm za’eix mi’aqc fai? Maiv guangc lorqc! Ninh benx nernh jiex wuov dauh. Nyungc-nyungc ninh haih zoux duqv cuotv nyei. (Iˆsaaˆyaa 45:18) Ninh zungv oix zoux bun baamh mienh aengx benx hnangv loz yaac duqv hnangv dongh zinh ndaangc ninh oix bun ninh mbuo wuov nor.​—Doqc Singx Nzung 37:11, 34.

3. Baamh gen hnangv haaix nor haih benx orn-lorqc huingx?

Yiem Yesu benx Hungh gunv jienv baamh gen nyei ziangh hoc, baamh gen cingx daaih benx nzueic haic nyei orn-lorqc huingx. Taux mborqv jaax, heuc Aaˆlaaˆmaaˆgetcˆndon wuov, Yesu dorh Tin-Hungh nyei fin-mienh caux jienv ninh mingh mietc nzengc yietc zungv dongh caux Tin-Hungh doix-dekc wuov deix. Liuz, Yesu zorqv Saadaan wuonx 1,000 hnyangx. Tin-Hungh nyei mienh ziouc duqv njioux, maiv zuqc mietc weic zuqc Yesu goux jienv, beu jienv ninh mbuo. Ninh mbuo ziouc duqv yietc liuz nyei maengc yiem naaiv orn-lorqc baamh gen.​—Doqc Laauc Yaangh 20:3, 7; 21:3, 4.

4. Haaix zanc cingx maiv maaih kouv naanc?

Haaix zanc Tin-Hungh cingx daaih zorqv guangc nzengc orqv nyei jauv? Yesu gorngv deix jauv-louc bun mbuo hiuv haaix zanc baamh gen nyei setv mueiz oix taux. Ih jaax lungh ndiev maaih ziex nyungc sic hoic jienv baamh mienh nyei maengc. Naaiv se bun mbuo hiuv cing ih zanc mbuo yiem jienv “baamh gen nyei setv mueiz” nyei ziangh hoc aqv.​—Doqc Matvˆtaai 24:3, 7-14, 21, 22.

Taux dongh Yesu yiem tin-dorngh gunv njiec baamh gen 1,000 hnyangx wuov, ninh oix zorqv guangc nzengc yietc zungv kouv naanc. (Iˆsaaˆyaa 9:6, 7; 11:9) Yesu maiv daan benx Hungh, ninh yaac benx Domh Sai Mienh tengx zorqv guangc dongh hnamv Tin-Hungh wuov deix mienh nyei zuiz. Hnangv naaic, Tin-Hungh ziouc longc Yesu zorqv guangc nzengc baengc caux zuqc gox zuqc daic nyei jauv.​—Doqc Iˆsaaˆyaa 25:8; 33:24.

5. Haaix dauh haih duqv yiem orn-lorqc huingx?

Haaix dauh ei Tin-Hungh se duqv yiem orn-lorqc huingx. (1 Yoˆhan 2:17) Yesu paaiv dongh gan ninh wuov deix mingh lorz nyiemc ganh zoux faix nyei mienh, njaaux ninh mbuo hnangv haaix nor haih zoux horpc Tin-Hungh. Ih jaax hnoi, Yeˆhoˆwaa njaaux jienv ziex baeqv waanc dauh mienh, mbenc ninh mbuo zipv maengc yiem orn-lorqc huingx yiem naaiv baamh gen. (Seˆfanˆyaa 2:3) Yiem Yeˆhoˆwaa nyei Zorng-Zengx nyei Hungh Guoqv Dorngh, mienh hoqc hiuv duqv hnangv haaix nor haih benx kuv nqox, kuv auv, kuv die, kuv maa. Fu’jueiv caux jienv domh mienh lomh nzoih zangc Yeˆhoˆwaa, yaac hoqc hiuv duqv hnangv haaix nor dorh Tin-Hungh nyei kuv fienx daaih tengx ninh mbuo duqv longx.​—Doqc Mikaa 4:1-4.