GINC 6
Daic Mingh Nyei Mienh Aengx Haih Duqv Haaix Nyungc Longx Nyei Fai?
1. Maaih haaix nyungc kuv fienx gorngv taux daic mingh nyei mienh?
Dongh Yesu mingh taux Mbeˆtaaˆni Laangz wuov zanc, ninh nyei doic Laaˆsaaˆlatv daic mingh duqv biei hnoi mi’aqc. Mbeˆtaaˆni Laangz se leih Yeˆluˆsaaˆlem Zingh maiv go. Yesu caux jienv Laaˆsaaˆlatv nyei i dauh dorc, Maataa caux Maaˆliˆyaa, mingh Laaˆsaaˆlatv nyei zouv. Mingh taux wuov, maiv lauh, mienh camv nyei ziouc daaih souv jienv ga’hlen. Hnamv mangc gaax! Dongh Yesu dorh Laaˆsaaˆlatv aengx nangh daaih wuov zanc, Maataa caux Maaˆliˆyaa ndongc haaix nyei a’hneiv?—Doqc Yoˆhan 11:21-24, 38-44.
Maataa hiuv duqv wuov kuv fienx nyei, dongh gorngv taux daic mingh nyei mienh aengx haih nangh daaih wuov. Ninh hiuv duqv Yeˆhoˆwaa haih bun daic mingh nyei mienh aengx nangh daaih yiem naaiv baamh gen.—Doqc Iˆsaaˆyaa 26:19.
2. Mienh daic mingh se benx hnangv haaix?
Tin-Hungh mbuox Aaˆndam: “Meih se nie, meih oix zuqc aengx benx nzunc nie aqv.”—TIN DEIC DOUH 3:19.
Baamh mienh se nie-mbung benx daaih. (Tin Deic Douh 2:7; 3:19) Mbuo maiv maaih wuonh mbaeqv fai lingh wuonh yiem jienv mbuo nyei sin zaangc. Mbuo se benx mangc duqv buatc nyei ga’naaiv. Taux mbuo dangx qiex nyei ziangh hoc, mbuo maiv maaih wuonh mbaeqv fai lingh wuonh ca’lengc aengx ganh ziangh jienv mingh. Mbuo yietv daic mingh nor, mbuo nyei m’nqorngv-famv yaac caux jienv daic, maiv zoux gong aqv. Mbuo nyei hnyiouv hnamv nyei jauv yaac mietc nzengc mi’aqc. Hnangv naaic, Laaˆsaaˆlatv cingx maiv gorngv taux ninh daic nyei jauv se hnangv haaix nor weic zuqc daic mingh nyei mienh se maiv hiuv haaix nyungc aqv.—Doqc Singx Nzung 146:4; Gorngv Seix Zaangc 9:5, 6.
Mienh yietv daic liuz, Tin-Hungh dorh douz buov ninh mbuo, zeix ninh mbuo, bun ninh mbuo diev mun siouc kouv fai? Ging-Sou gorngv daic mingh nyei mienh maiv hiuv haaix nyungc aqv. Hnangv naaic, haaix dauh njaaux gorngv maaih deic nyuoqc nyei douz buov jienv mienh yiem se njaaux daaih gorngv-baeqc gorngv hoic Tin-Hungh hnangv. Dorh douz buov mienh zeix mienh naaic norm za’eix Tin-Hungh zungv yioux haic, zungv maiv maaih yiem ninh nyei hnyiouv.—Doqc Yeˆleˆmi 7:31.
Mangc fangx-nangh Mienh Daic Mingh Se Benx Hnangv Haaix?
3. Daic mingh nyei mienh haih caux mbuo gorngv waac nyei fai?
Daic mingh nyei mienh maiv haih gorngv waac yaac maiv haih muangx haiz haaix nyungc. (Singx Nzung 115:17) Mv baac maaih deix fin-mienh se orqv haic, ninh mbuo duqv-eix zoux benx daic mingh nyei mienh daaih caux mienh gorngv waac. (Yiuˆndaa 6) Yeˆhoˆwaa hatc mbuo, heuc mbuo maiv dungx lorz taux daic mingh nyei mienh.—Doqc Nzamc Leiz-Latc 18:10, 11.
4. Haaix dauh aengx haih duqv maengc nangh daaih?
Dongh daic mingh wuov deix ziex baeqv waanc dauh mienh aengx haih duqv maengc nangh daaih yiem naaiv baamh gen. Maaih deix se maiv hiuv Tin-Hungh yaac benx zoux waaic sic nyei mienh.—Doqc Gong-Zoh 24:15.
Aengx duqv nangh daaih wuov deix ziouc haih hoqc hiuv duqv Tin-Hungh se haaix dauh, ninh yaac hnangv haaix nor. Ninh mbuo yaac aengx haih maaih sienx fim kaux Yesu, ei ninh. (Laauc Yaangh 20:11, 12) Haaix deix aengx duqv nangh daaih yaac zoux kuv sic ziouc duqv yietc liuz njien-yiouh nyei yiem, yiem naaiv baamh gen.—Doqc Yoˆhan 5:28, 29.
5. Daic mingh aengx haih nangh daaih nyei jauv mbuox mbuo Yeˆhoˆwaa se hnangv haaix nor?
Tin-Hungh paaiv ninh nyei Dorn njiec daaih daic weic mbuo. Hnangv naaic, daic mingh nyei mienh cingx aengx haih duqv nangh daaih yiem nqa’haav hingv. Naaiv se bun mbuo hiuv duqv Yeˆhoˆwaa hnamv mienh nyei jauv caux ninh maaih nyei en, dongh mbuo zungv maiv zic duqv duqv nyei wuov nyungc en. Taux dongh daic mingh nyei mienh aengx duqv nangh daaih wuov zanc, meih oix duqv buatc haaix dauh?—Doqc Yoˆhan 3:16; Lomaa 6:23.