Meih Hnangv Haaix Nor Haih Zieqv Duqv Zien Buoqc Zangc Nyei Jauv?

1. Se kungx maaih nduqc nyungc zien buoqc zangc nyei jauv hnangv fai?

Yesu njaaux ninh nyei sai-gorx mbuo nduqc nyungc buoqc zangc nyei jauv hnangv, se dongh zien buoqc zangc nyei jauv. Naaiv se hnangv diuh jauv dorh mienh mingh duqv yietc liuz nyei maengc. Yesu gorngv: “Lorz buatc [naaiv] diuh jauv nyei mienh zoqc” nyei. (Matvˆtaai 7:14) Tin-Hungh kungx zipv dongh ziux ninh nyei zien Waac zangc ninh wuov deix hnangv. Yietc zungv longc zien leiz zangc Tin-Hungh wuov deix se dongh diuc hnyiouv yaac juangc nduqc nyungc doz sienx.​—Doqc Yoˆhan 4:23, 24; 14:6; Eˆfeˆso 4:5, 6.

2. Yesu gorngv jaav Giduc Mienh se hnangv haaix?

Yesu jaa-ndaangc donv maaih jaav douc waac mienh oix zoux bun Giduc Mienh zangc nyei jauv lunc. Ninh mbuo beih zangc zoux hnangv zien Tin-Hungh nyei mienh. Ninh mbuo nyei leiz-baaix dorngh nyei mienh nyiemc ninh mbuo ganh benx Giduc Mienh. Mv baac ninh mbuo zoux nyei sic bun meih haih zieqv duqv ninh mbuo se haaix nyungc mienh. Hnangv haaix nor haih zieqv duqv? Kungx zien buoqc zangc nyei jauv haih maaih zien Giduc Mienh hnangv. Zien Giduc Mienh nyei fiem-fingx caux ninh mbuo zoux nyei sic se mangc duqv hiuv nyei.​—Doqc Matvˆtaai 7:13-23.

3. Meih hnangv haaix nor haih zieqv duqv zien Tin-Hungh nyei mienh?

Mangc taux naaiv deix biaa diuc jauv:

• Zien Tin-Hungh nyei mienh taaih Ging-Sou benx Tin-Hungh nyei Waac. Ninh mbuo longc hnyiouv gan longx Ging-Sou njaaux nyei jauv. Zien buoqc zangc nyei jauv caux baamh mienh longc ganh nyei cong-mengh liepc daaih nyei se maiv fih hnangv. (Matvˆtaai 15:7-9) Zien Tin-Hungh nyei mienh maiv zeiz njaaux mienh yietc nyungc, liuz mingh zoux ganh nyungc.​—Doqc Yoˆhan 17:17; 2 Tiˆmoˆtai 3:16, 17.

• 

  Ninh mbuo taaih Tin-Hungh nyei mbuox, Yeˆhoˆwaa. Yesu taaih Tin-Hungh nyei mbuox dongh ninh gorngv cuotv bun mienh hiuv duqv wuov. Ninh tengx mienh daaih hiuv duqv Tin-Hungh yaac njaaux ninh mbuo daux gaux bun mienh taaih Tin-Hungh nyei cing-nzengc mbuox. (Matvˆtaai 6:9) Dongh meih yiem nyei dorngx wuov, meih buatc haaix nyungc buoqc zangc nyei jauv zunh Tin-Hungh nyei mbuox bun mienh hiuv?​—Doqc Yoˆen 2:32; Cuotv Iˆyipv 17:15, mangc sou-juoqv nzaangc.

• Zien Giduc Mienh zunh doz gorngv taux Tin-Hungh nyei Guoqv. Tin-Hungh paaiv Yesu daaih zunh Tin-Hungh zoux Ziouv gunv mienh nyei kuv fienx. Kungx Tin-Hungh nyei Guoqv hnangv se haih tengx baamh mienh. Yesu zunh jienv naaic norm Guoqv nyei kuv fienx mingh taux ninh daic nyei hnoi. (Lugaa 4:43; 8:1; 23:42, 43) Ninh gorngv ninh nyei sai-gorx mbuo yaac oix zunh gorngv taux naaic norm Guoqv. Se gorngv maaih laanh mienh buangh zuqc meih yaac gorngv taux Tin-Hungh nyei Guoqv nor, meih hnamv daaih ninh yiem haaix nyungc buoqc zangc nyei jauv?​—Doqc Matvˆtaai 24:14.

• Yesu nyei sai-gorx maiv guei naaiv norm orqv nyei lungh ndiev. Meih haih zieqv duqv ninh mbuo weic zuqc ninh mbuo maiv caux baamh mienh nyei hungh jaa maaih buonc zoux fai maaih nzaeng hingh nyei jauv. (Yoˆhan 17:16; 18:36) Ninh mbuo yaac maiv zuotc lungh ndiev mienh nyei eix-leiz caux maiv zoux mun mienh nyei sic.​—Doqc Yaagorpc 4:4.

• Zien Giduc Mienh za’gengh maaih hnyiouv laanh hnamv laanh. Ninh mbuo hoqc hiuv duqv Tin-Hungh nyei Waac daaih, ninh mbuo maiv mangc faix haaix fingx mienh. Maiv gunv jaav buoqc zangc nyei jauv a’loc njiec qaqv bouc deic-bung mborqv jaax nyei sic, zien zangc Tin-Hungh nyei mienh maiv laengz hnangv naaic zoux. (Mikaa 4:1-3) Zien Giduc Mienh zungv guangc jienv ninh mbuo ganh nyei ziangh hoc yaac longc ninh mbuo ganh maaih nyei ga’naaiv daaih tengx mienh, kuinx mienh.​—Doqc Yoˆhan 13:34, 35; 1 Yoˆhan 4:20.

4. Meih haih zieqv duqv zien buoqc zangc nyei jauv nyei fai?

Haaix nyungc buoqc zangc nyei jauv njaaux nyei nyungc-nyungc se ziux Tin-Hungh nyei Waac njaaux, taaih Tin-Hungh nyei mbuox, caux zunh mbuox mienh camv kungx Tin-Hungh nyei Guoqv hnangv haih tengx baamh mienh? Haaix guanh mienh zoux hnamv mienh nyei jauv caux simv nqoi deic-bung mborqv jaax nyei sic? Meih hnangv haaix nor hnamv?​—Doqc 1 Yoˆhan 3:10-12.