Ging-Sou Nyei Leiz Hnangv Haaix Nor Tengx Mbuo Duqv Longx?

1. Weic haaix diuc mbuo a’zuqc longc njaaux nyei waac dorh jauv mbuo?

Zeix mbuo daaih Wuov Dauh se gauh guai mbuo. Ninh hnamv haic mbuo ziouc nzauh heix taux mbuo. Ninh maiv zeiz oix bun mbuo leih go ninh, maiv longc ninh goux. (Yeˆleˆmi 10:23) Se hnangv dauh fu’jueiv-lunx a’zuqc longc ninh nyei diex maac njaaux ninh, dorh jauv ninh, mbuo yietc zungv m’daaih a’zuqc longc Tin-Hungh njaaux mbuo, dorh jauv mbuo. (Iˆsaaˆyaa 48:17, 18) Ging-Sou nyei leiz se Tin-Hungh bun daaih nyei zingh nyeic njaaux mbuo, dorh jauv mbuo.​—Doqc 2 Tiˆmoˆtai 3:16.

Yeˆhoˆwaa nyei leiz njaaux mbuo ih zanc hnangv haaix nor yiem se gauh longx jiex caux bun mbuo hiuv duqv hnangv haaix nor haih duqv yietc liuz nyei zingh nyeic yiem nqa’haav hingv. Weic Tin-Hungh zeix mbuo daaih, mbuo horpc zuqc a’hneiv nyei zipv ninh bun daaih nyei waac njaaux mbuo, dorh jauv mbuo.​—Doqc Singx Nzung 19:7, 11; Laauc Yaangh 4:11.

2. Tin-Hungh nyei Waac hnangv haaix nor dorh jauv mbuo?

Ging-Sou nyei zien leiz, maaih deix se bun mbuo hiuv duqv Tin-Hungh oix mbuo hnangv haaix nor zoux yiem ziex nyungc sic. Dieh deix leiz aeqv, se bun mbuo dorh daaih longc yiem yietc nyungc yietc nyungc nyei sic. (Nzamc Leiz-Latc 22:8) Mbuo a’zuqc hnamv mangc bun mbuo bieqc hnyiouv Ging-Sou gorngv nyei zien waac mbuox mbuo oix zuqc zoux haaix nyungc. (Cong-Mengh Waac 2:10-12) Gorngv nyungc zeiv se, Ging-Sou njaaux maengc se zingh nyeic Tin-Hungh bun daaih. Naaic gorngv daaih nyei zien waac haih dorh jauv mbuo.​—Doqc Gong-Zoh 17:28.

3. Haaix deix i diuh leiz se gauh jienv jiex?

Yesu gorngv maaih i diuh leiz se gauh longc jienv jiex. Da’yietv diuh leiz se bun mbuo hiuv duqv Tin-Hungh bun maengc baamh mienh daaih zoux haaix nyungc. Baamh mienh nyei maengc se oix zuqc hiuv duqv Tin-Hungh, hnamv ninh, caux zoux hnyiouv zingx nyei taaih ninh. Da’yietv naaiv diuh leiz se oix zuqc dorh daaih hnamv mangc yiem mbuo oix zoux nyei nyungc-nyungc. (Cong-Mengh Waac 3:6) Haaix dauh ziux naaiv diuh leiz zoux nyungc-nyungc se duqv benx Tin-Hungh nyei doic, maaih zien njien-yiouh hnyiouv, yaac duqv yietc liuz nyei maengc.​—Doqc Matvˆtaai 22:36-38.

Da’nyeic diuh leiz se bun mbuo haih baengh orn horh norh nyei caux duqv njiec mienh camv. (1 Koˆlinˆto 13:4-7) Dorh da’nyeic naaiv diuh leiz daaih longc se oix zuqc zuotc Tin-Hungh hnangv haaix nor hnamv mienh.​—Doqc Matvˆtaai 7:12; 22:39, 40.

4. Ging-Sou nyei leiz hnangv haaix nor tengx mbuo duqv longx?

Ging-Sou nyei leiz njaaux hmuangv-doic hnangv haaix nor dorh hnamv mienh nyei jauv daaih tengx ninh mbuo haih lomh nzoih horpc fim dongh eix. (Eˆfeˆso 4:32; Koˆloˆsi 3:12, 14) Tin-Hungh nyei Waac yaac njaaux mbuo m’jangc caux m’sieqv dorng jaa zoux cai-doix se horpc zuqc maiv dungx bun haaix nyungc daaih caeqv nqoi ninh mbuo. Longc auv longc nqox se longc yietc seix. Tin-Hungh nyei Waac hnangv naaiv njaaux se weic oix beu jienv hmuangv-doic.​—Doqc Tin Deic Douh 2:24.

Se gorngv mbuo gan Ging-Sou njaaux nyei waac zoux nor, mbuo haih beu jienv mbuo maaih nyei ga’naaiv caux hnyiouv kuv-yiem nyei jauv. Gorngv nyungc zeiv se hnangv naaiv, gong-ziouv nzengc-nzengc oix longc dongh gan Ging-Sou njaaux nyei leiz zoux hnyiouv zaqc yaac jienh nyei wuov nyungc gong-mienh. (Cong-Mengh Waac 10:4, 26; Hipvˆlu 13:18) Tin-Hungh nyei Waac yaac njaaux mbuo se gorngv maaih nyanc maaih hopv, maaih dongh mbuo gengh qiemx zuqc longc nyei ga’naaiv, oix zuqc buangv hnyiouv aqv. Duqv benx Tin-Hungh nyei doic se gauh maaih jaax-zinh jiex ga’naaiv-longc.​—Doqc Matvˆtaai 6:24, 25, 33; 1 Tiˆmoˆtai 6:8-10.

Zoux puix Ging-Sou nyei leiz se haih beu duqv mbuo nyei sin zaangc. (Cong-Mengh Waac 14:30; 22:24, 25) Gorngv nyungc zeiv se hnangv naaiv, gan jienv Tin-Hungh nyei leiz maiv dungx hopv diuv nquin se tengx mbuo haih simv duqv niouv cie zong jaax nyei sic caux baengc haih zorqv mienh maengc nyei sic. (Cong-Mengh Waac 23:20) Yeˆhoˆwaa bun mbuo hopv diuv nyei mv baac oix zuqc hopv daaih maaih soux mouc nyei. (Singx Nzung 104:15; 1 Koˆlinˆto 6:10) Tin-Hungh nyei leiz njaaux mbuo oix zuqc mangc jienv beu jienv mbuo zoux nyei sic caux hnyiouv hnamv nyei jauv weic tengx mbuo duqv longx. (Singx Nzung 119:97-100) Mv baac, zien Giduc Mienh maiv zeiz weic ganh duqv longx cingx taaih Tin-Hungh dingc daaih nyei leiz. Ninh mbuo zoux se weic taaih Yeˆhoˆwaa.​—Doqc Matvˆtaai 5:14-16.