Fram di Chierman

Mi Jamiekan piipl,

A fifti ier nou Jamieka muuv we fram Ingglan an a ruul itself, an pan Jamieka fiftiyet bortdie di Baibl Sosaiyeti fi di Wes Indiz wel api fi gi di Jamiekan piipl di Nyuu Testiment iina Jamiekan.

Di Jamiekan Nyuu Testiment a wan wie fi wi selibriet di Langwij we Gad gi di Jamiekan piipl, di Langwij we ful op a laif an we stil de ya iivn duo nof piipl chrai fi get rid a it. Wen piipl ier Gad wod iina fi dem langwij, it toch dem aat diip diip. It toch dem aat iina wan wie we neva apm bifuo. A di siem ting a apm ya iina Jamieka. Wen piipl ier Gad wod iina Jamiekan, it toch dem aat an aal a di gud sitn dem we wi a si apm jos go fi shuo se Gad wi gi wi we im pramis. Da pramis de a dat enibadi we ier an fala Gad wod, dem an Krais Jiizas wi kluos an dem wi ruul wid im iina im kindom. Noftaim mi ier piipl se “Patwa a sitn we aalwiez kluos tu mi aat.“ An sins mi a Jamiekan tu, siem laik mi breda an sista dem , di Jamiekan langwij av wan speshal plies iina mi aat. Fi av di Baibl iina fi wi fos langwij jos pruuv iivn muor se Gad andastan wi wen wi taak an it mek wi kyan lov wiself fi uu wi bi.

Wi tangk evri Jamiekan, di wan dem a yaad an di wan dem we de a farin, we og op di Jamiekan Nyuu Testiment. Dem piipl de si an andastan se di Nyuu Testiment impuotant and it wot nof wen wi a pred Gad wod. Dem piipl de glad se wi av di Nyuu Testiment iina Jamiekan kaaz dem andastan wa it miin fi di Jamiekan piipl. Evritaim piipl kom tel wi ou di Jamiekan Baibl elp dem fi andstan Gad wod an ou it toch dem aat, fi wi aat get api tu an it push wi fi gwaan du wa wi a du. Nof Jamiekan piipl proud a di wok we wi a du an dem no fried fi shuo it niida. Ef yu did de a di choch sorvis iina Borminam iina di Yuunaitid Kindom, yu wuda si it fi yuself. Wen di Jamiekan piipl we did de de a worship ier Gad wod iina fi dem langwij fi di fos taim, it toch dem aat so moch an dem did so glad fi ier it dat nof taim dem get op an staat klap.

Wi afi tangk di gruup a piipl we chansiliet di Baibl an wi afi tangk di piipl we jain op an wok wid dem fram di staat an we wok wid dem ti! evriting don. Wi kyaahn se tangks inof tu di piipl dem we tek it pan demself fi prie aad aad se wi wuda don chansiliet di Jamiekan Nyuu Testiment an dat di wok we wi du wuda gud.

Wi wel api fi ier aal a wa di piipl dem we wok pan telivijan an radio, an we rait iina di nyuuzpiepa dem did av fi se. Wi api se dem did a push wi fi mek shuor se di Jamiekan Baibl tik tu wa iina di Griik Baibl an dat wen wi a chansiliet it, a riil Jamiekan wi yuuz. Wi glad se dem did a push wi fi mek shuor se di chansilieshan we wi du a did di bes wi kuda did du.

Dis a we di Laad bring wi, kaaz im gud an kain tu wi an im aalwiez shuo wi lov iivn duo wi no dizorv it. Aal priez an ana tu Gad! Wa wi a prie a dat evribadi we ier an riid di Jamiekan Nyuu Testiment - enibadi we av notn at aal fi du wid it - dat di Baibl wi no jos toch dem aat an mek it biit likl faasta bot dat it wi chienj dem aat an mek dem staat lov Gad wid aal a dem aat, wid aal a dem suol an wid aal a dem main.

Rt. Rev. Stanley Clarke

Chairman

Bible Society of the West Indies

24 Hagley Park Plaza

Kingston I0

Jamaica, W.I.