Bielam Dangki Staat Chat

A bout 40 ier nou di Izrelait dem de iina di wildanes. A nof difrant difrant siti dem tek uova. An nou, dem did a kyamp out a Mowab we de pan di iis said a di Jaadn Riva. Di taim did kom fi dem go iina di lan we Jeuova did pramis fi gi dem. Di king fi Mowab we niem Bielak did fried se di Izrelait dem wuda kom tek uova fi’im lan tu. So im aks wan man we niem Bielam fi kom a Mowab fi kom bring dong bad blesn pan di Izrelait dem.

Bot Jeuova tel Bielam se: ‘No go de go bring dong no bad blesn pan di Izrelait dem.’ So Bielam neehn go. King Bielak aks im fi kom agen an tel im se im wuda gi’im eniting we im waahn. Bot Bielam stil neehn go. Den Gad se: ‘Yu kyan gwaan. Bot a onggl wa mi tel yu fi se, yu fi se.’

Bielam go pan im dangki fi raid go a Mowab. Im did a plan fi go de go bring dong bad blesn pan di Izrelait dem, iivn duo Jeuova tel im se im neehn fi dwi’it. Wen im de pan di ruod, wan a Jeuova ienjel kom tan op infronta im chrii taim. Bielam kudn si di ienjel duo, bot im dangki kuda si’im. Di fos taim di ienjel tan op infronta dem, di dangki go iina wan fiil. Di sekan taim, di dangki kwiiz op imself gens wan stuon waal an jam op Bielam fut pan di waal. Yu si di tord taim wen di ienjel tan op infronta dem, di dangki no lidong iina di migl a di ruod! Di chrii taim wen di dangki du dem tingz de, Bielam lik im wid wan tik.

Afta dat, Jeuova mek di dangki staat chat. Di dangki aks Bielam se: ‘We ya’a lik-lik mi so fa?’ Bielam se: ‘Yu mek mi luk laik iidiyat. Ef mi did av wan suod, a kil mi wuda kil yu.’ Di dangki se: ‘A ierz nou yu a raid mi. Mi eva diil wid yu so yet?’

Den Jeuova mek Bielam si di ienjel. Di ienjel se tu im se: ‘Jeuova neva tel yu fi no go de go bring dong no bad blesn pan di Izrelait dem?’ Bielam se: ‘Wa mi du did rang. Mi a kom go baka mi yaad.’ Bot di ienjel se: ‘Yu kyan go a Mowab ino, bot memba se yu fi onggl se wa Jeuova tel yu fi se.’

Yu tingk Bielam did lorn im lesn? Nuo sa. Afta dat, a chrii taim im chrai fi bring dong bad blesn pan di Izrelait dem. Bot insted-a dat, evri taim im chrai fi dwi’it, Jeuova mek im bles dem. Som taim afta dat, di Izrelait dem go waar gens Mowab an Bielam en op ded. Yu no tingk it wuda gud ef im did dis lisn tu Jeuova iina di fos plies?