Barak, Debra, An Jieyel Difen Di Izrelait Dem

Wen im did a 110 ier uol, Jashwa ded. Im did a liid Jeuova piipl dem fi uol iip a ier, an so langks im did alaiv dem did a worship Jeuova. Bot yu si afta im ded, dem staat fi worship faalz gad, jos laik di Kienanait piipl dem. Kaa di Izrelait dem neehn a stik tu Jeuova, im mek Jiebin, wan king fram Kienan kom kom mek laif aad fi dem. Bot di piipl dem staat baal out tu Jeuova fi elp dem. So Jeuova pik wan nyuu liida fi dem we niem Barak, an im wuda elp di piipl dem fi worship Jeuova di rait wie agen.

Yu did av wan uman we niem Debra we a did wan prafit an shi sen kaal Barak. Jeuova did gi ar da mesij ya fi gi’im: ‘Kya 10,000 man wid yu an go wich paat di Kaishan riva de fi go fait Jiebin aami. A de-so yu a-go win di fait gens Sisera we a liid Jiebin aami.’ Barak tel Debra se: ‘Di onggl wie mi a-go go a ef yu kom wid mi.’ Shi se tu im se: ‘Mi wi kom wid yu, bot a no yu a-go kil Sisera. Jeuova tel mi se a wan uman gweehn kil im.’

Barak an im aami go op a Mount Tiebuor fi go redi op demself fi fait Sisera an Debra go wid dem. Az Sisera ier dis so, im kya im aas an bogi kyaat dem we im yuuz fi fait waar an im suoja dem ga’a di vali we de a Mount Tiebuor. Debra se tu Barak se: ‘Tide tide, Jeuova a-go mek yu win da waar ya.’ Barak an di 10,000 man dem go dong di mountn fi go rosh Sisera aami.

Den Jeuova mek di Kaishan riva kom dong. Di aas an bogi kyaat dem we Sisera did av stok iina di mod, so im kom outa fi im uon an tek fut an ron we. Barak an im suoja dem biit Sisera aami, bot Sisera get we. Im ron we an go aid iina wan tent. Da tent de a did fi wan uman niem Jieyel. Shi gi’im som milk fi jringk an kova im op wid wan blangkit. Sisera did taiyad bad so im jrap asliip. So Jieyel tek ar likl taim go op tu im. Shi did av wan big sitn we fieva niel we dem kaal tent pin, an shi nak it iina im ed an kil im.

Barak did a luk fi Sisera. Wen im kech a Jieyel tent, shi kom out an se tu im se: ‘Kom iin. Mek mi shuo yu di man we ya’a luk fa.’ Barak go iina di tent an im si Sisera lidong de​—stif stuon ded. Barak an Debra sing wan sang fi big op Jeuova, kaa im mek di Izrelait dem don dem enimi dem. Nobadi neva waar wid di Izrelait dem fi di neks 40 ier.